Tɔŋ miingua 6 - BII BILA

Silaa le Mɛlɛka kaolaa

¹ «La yaŋ nilan o tɔŋndan, o silalan a o sɔɔn Mɛlɛka Hala niaa yɔngu ya le niaa pɛɛkoo-on, haliko mi la kɔ kela lecoo o lɛŋnde niaa co luɛyɔɔ nin le len hiɔlɔɔ len nin.

² La nɔ́ siòòŋii Mɛlɛka Hala niaa, mì la bii tɔŋnda ndɔlan a silala ndɔla ya co niaa tɛɛngullo lan o palɛi niaa nɔ le tosaa o ceendo coo-e kpow nin. Tɔŋnda lan la co le niaa pila, le poaa niaa a le poaa niaa imamaa. La bii lan pɛ, la viow yoomu.

³ Lelan, Israɛlla, la yaŋ nilan o sɔɔn mun, la bìí mun mì la kela lecoo, haliko mi la sɔla dɛnɛ kɛndɔɔ, mì la kui taw o lɛŋnde cɔlua a tɔlɔɔlan la naŋ nin taw-taw len nin, maa mɛɛ Mɛlɛka, Hala fuɲaa niaa mamaa dimul niaa yɛ.

⁴ La yaŋ nilan, niaa cuavaa Israɛlla, Mɛlɛka Hala naa ndu pilɛ kpé co Mɛlɛka ni.

⁵ La kaola Mɛlɛka Hala niaa a kɔlta niaalan kpow, a yoomu niaa kpow a á kpaaya niaa kpow.

⁶ Tɔŋnda ya co niaa hau tɛɛngullo lan la bɛnda mì la lo lasɛvaa niaa o lakɔl.

⁷ La pɛɛku cuavaa niaa lan, mì la luei nda lan o lebol. La dɔw baltan lecoo telen niaa vanin o laniaa lo cɛinin-ndo, telen niaa vanin kɔlan kelaa o nɛi-yo, telen niaa vanin kɔlan hinilan-ndo a telen niaa cannin-ndo.

⁸ La va layiyaa niaa o laba maa tɔɔmasele, mì la va laholaa niaa o n'tendu maa lepónda.

⁹ La sɛva lan o kèéden cɛila niaalan coo a o diola luɛyaala kobila niaalan coo.

¹⁰ Lɔ́ɔ́ Mɛlɛka Hala niaa lueinin niaa o lɛŋnde o yiilu fuɲaa niaa mamaa Abraham, Isaak a Yakɔb kpemaa le niaa yɔngoo len nin-ndo, la komalnin kobila bɛndula kɛndɛ-kɛndɛla niaa tengul te lan ndon.

¹¹ La komalnin cɛilan lapiaalan a ɲɛm kɛndɛn súú-súù ka, n niaa cuungiaa loon. La komalnin soonnda mandaa mamɛnndan latoavaa, la niaa tuw le lan. La komalnin vɛlɛ nakɔla n'rɛsɛnndan a nakɔla olivieela niaa tol te lan. Lɔ́ɔ́ niaa dianin ɲɛdiaa mi la pim ca-o,

¹² la caa dɛ! Yɔŋii niaa pɔɛɛnun Mɛlɛka soli niaa o lɛŋnde Esipte len nin-ndo, nɛɛ niaa va o cɛlen nin-nda pɛɛn.

¹³ Mɛlɛka Hala niaa kínɛí niaa bɛnda le biiloo ni, ndu pilɛ kpé niaa bɛnda le baalaa tosallo ni. O diola ndɔlan kínɛí niaa bɛnda le mɛnanndo ni.

¹⁴ La del halaa celen kɔɔli le, a vanaa-mangalaa-isɔaa balunin niaa-a co sooloo-a pɛɛn.

¹⁵ Kani Mɛlɛka Hala niaa co niaa tɛɛn-ndo, Hala paŋalaa o co ni, yɔŋii kɔl ndɔ tuwvo tol niaa coo mò cii niaa diw o lɛŋnden coo.

¹⁶ Lelan, la tɔɔndan Mɛlɛka Hala niaa mɛɛ niaa tɔɔndan ndu Massa yɛ le.

¹⁷ Kɛ la bii tɔŋndan, silalan a sɔɔn ndɔn o co niaa dimullo-on.

¹⁸ La tosa ɲɛ co o sandaa a o kɛndɔɔ Mɛlɛka o hɔl-lo, haliko mi la sɔla dɛnɛ kɛndɔɔ, mì la hɛlu lɛŋnde kɛndɛle Mɛlɛka yiilu fuɲaa niaa mamaa kpemaa, mó mɛnan le nda len yɔngoo len.

¹⁹ La toawnin yaamɔaa niaa maa mɛɛ Mɛlɛka yii kpemaa yɛ.

²⁰ Te cuavaa niaa ɲuna niaa siɔdii laci pɛ aa: ‹Le kɔlɔ yɛɛ Mɛlɛka Hala naa yɔngu yɛ niaa tɔŋndan, silalan a sɔɔn mun kpow?›

²¹ La mulul nda aa: ‹Cɛa Faraɔnnɔɔ naa n yɔŋnun o lɛŋnde Esipte len nin ni, kɛ mí Mɛlɛka soli naa lon a ba ndɔ kpaaya bɛndoo.

²² Mó tosa kaamaalan a sɔɔn kɔndɔfillon naa o hɔl, mó dɔaw lɛŋnde Esipte len, Faraɔnnɔɔ pila a cɛi ndɔɔ kpow yɛɛvɛ.

²³ Kɛ naa, mó soli naa lon le naa cuuo nanu a le naa lɛŋnde o yiilu fuɲaa naa mamaa kpemaa mó mɛnan le naa keo len yɔngoo.

²⁴ Le hee, mí Mɛlɛka Hala naa dimul naa le tɔŋndan ndan kpow biyɔɔ a le siòòŋii ndɔɛi nɔu, haliko mi n sɔla dɛnɛ kɛndɔɔ, mò ke naa yoomoo mɛɛ o co vɔ naa ndu yɔngoo hau nuaa yɛ.

²⁵ Ava, te n kela pɛ Mɛlɛka Hala naa o hɔl o tɔŋndan ndan kpow biyɔɔ nin mɛɛ o dimul naa yɛ, dɛnɛ sandaa co kon le naa ni.›»