Tɔŋ miingua 32 - BII BILA

¹ «Nɔm halataalaa, yaŋ nilan mì soo. Niaa vanaa co o lɛŋnden coo-a, la yaŋ nilan o sɔɔn co ya fula o sondo-on.

² Silala nilan la co cucɔnndo mɛɛ piɔɔ sia nuaa yɛ, sɔɛi nii co delio mɛɛ kɛmndan ma cɛɛluu nuaa yɛ, pɛɛkula nilan la co cucɔnndo mɛɛ mɔ́mndo cucun o yondo puiyaa coo nuaa yɛ.

³ Kani i pialnin diola Mɛlɛka lan. La sangala bɔɔbɔɔyɛi Hala naa!

⁴ Pow kpova bɛndoo Hala co ni, dɛnnda ndɔlan la co la tiuvanndan. Kani nɛila ndɔlan kpede la co lasandaa. Hala lo o lediom coo-o a Hala nɔ lakafa loo o co ni. Hala sandaa a Hala sakpoo o co ni.

⁵ Hali vanndacieea nda laasian bɛɛ nuaa, ndu Hala, o nɔ dɛnɛ vɔɔn te few! Le laasian nda laasian-ndo, à co lɛ cuavaa ndɔ le. À cuu lɔngɔlian má tambu labɛɛ!

⁶ Vɛ̀ɛ̀ nuaa vana tosa a Mɛlɛka ni? Éé niaa, la co diɔmaa bɛndu! La kindu lakɔl te few! O co macoaa fuɲa niaa le o co le? Vɛ̀ɛ̀ o co ndu le cɔw niaa le? O co ndu le toosiaa niaa mó kɛsi niaa le?

⁷ La loonun-ndɔ a palɛi paanduei o kɔɔ, la yiyan-ndɔ a vɔsila hiow lan, mì la ɲuna isɔɔ a lambila hiow lan o kɔɔ. La ɲuna fuɲaa niaa mà cɔm niaa, la ɲuna kaasoŋaa yuuvɛiya, mà pɛɛku niaa lecoo.

⁸ Tuma Hala-Hiow-Ɲɔɔn-Kpow-vo piɔw lɛŋnden vanndacieea tɛɛn-ndo, mó salu pɛɛngulan vanaa-mangalaa-isɔɔa tɛɛn mɛɛ cuavaa Israɛlla co sɛ́lɛ́ yɛ.

⁹ Kani kɛ́ Mɛlɛka-o ndu co yungu ndɔ kon ni. Polale Yakɔb len pɛɛn.

¹⁰ O komal Israɛlla o tàndá lɛŋnde veselɛiyo nin, o fonda yilili ɲaa biyaa co kuuliaa nin-ndo. Mó cua nda le nda bɛsio, mó pɛɛku nda. Mó manda nda maa hɔlte kúlte ndɔlen.

¹¹ Mó tosa a nda mɛɛ kovɔ́ɔ̀ landu hɔlla o vɛɛnnde ndɔlen coo yɛ. Kovɔ́ɔ̀ cɛn pɛ, o hiŋnun cuavaa ndɔa coo, o pɛɛnga kumbanndan, o cua cuale ndɔlen, o kɛsi len o kumbannda ndɔlan coo, o hiŋnun a len.

¹² Mɛlɛka ndu pilɛ kpé sím vanaa ndɔa laci ni, Hala celen ve ndu mala kɔlan a nda le.

¹³ Mó heelu nda o pembun lelɛŋndon coo, mó dɔaw nda balo a ɲɛm vaanun o ciɛɔn nin-ndon, mó yɔngu nda lɛma luɛi o powta kpovalan nin-ndan le deembuuo, mó dɔaw nda balo a cuɛima fula o powta bandílálan nin-ndan.

¹⁴ Mó yɔngu nda nɔnɔma nawva a nɔnɔma saa. Mó yɔngu nda visin macuɛin saa téndéa, visin macuɛin saa kóndóa Basan a visin macuɛin cuinaa toovia. Má pum ɲɛdiaa malun kɛndɛ-kɛndɔɔ, má kol mɔima siaŋan, mɔima fula o rɛsɛŋun kɛndɔn-ndan.

¹⁵ Kɛ mɛɛ Yesurun de mó luɛi cuɛiyan, mó kandu nila kalulan tosaa. Mó kɛɛ Hala cɔw ndu-o, mó pɛɛsa Pow kpova baŋa ndu-o.

¹⁶ Israɛlla tindi paŋala Mɛlɛka-o o halaa fondoa sooloo nin, má tuulu ndu kɔllo a dɛnnda ndala nɔɔlɛilan.

¹⁷ Má solul ɲinaa vɔɔŋaa co Hala le-a sálàlan, ɲɛm biilan ndáà sina paandu loon, má solul vɛlɛ ɲɛm biilan fula sɛnɛi-yon sálàlan, ò fuɲaa niaa ndáà ve biilu loon.

¹⁸ ‹A toɲa, Israɛlla, la kɛɛ Pow Kpova velu niaa-o, la pɔɛɛnun Hala yɔngu niaa yoomoo-o.›

¹⁹ Mɛɛ Mɛlɛka ce lende, mó tuulu kɔl a poaa ndɔa a á cuavaa ndɔa laandua.

²⁰ Mó dimi aa: ‹I co nda hɔlaa niaa faŋal, mì tofa mɛɛlula ndalan. Kani vanaa laasiannda nda co ni, a co vanaa vana kɔngan te.

²¹ A tindi paŋala nuu ya nin a ɲɛ co hala loo, a tuulu ya kɔllo a piɔmaa ndaa fondoa. Lelan, ya bɛɛ, i co nda paŋalaa luei o kɔl a vanaa-mangalaa-isɔaa co vanaa sɔvɛ le-a, i co nda kɔllo tuulu a vanaa kindu lakɔl te-a.

²² Kani yinnde kɔl ni tuwvo le mɛndulun, le kɔɛ a lomɔɔ háá ciee-piɔ́m di. Le lom lɛŋnden a tɔlɔɔla co lecoo lan, le lom pembon tumndan lɛŋ di-di.

²³ I tuisinin dɛnnda palaalan taw-taw nda coo. I vuunin nda a kɔɔn nun kpow, mí n cuu.

²⁴ Yima fofolan ma co nda cii diw, dialun tuwvon a nàà halimaa vɔɔndo ciinin nda kpow. I tosanin mì visia biyaa a kɛvaa lólòla nɛyaa dɔw nda yɛɛvɛ.

²⁵ Cɔwvo diwnin cuavaa ndaa o kpakio kɔɔli, nda pila vanin icali a siòònde o kpakio nin. Kandɔɔ a poombɔ piaandoo, kɔ bii a cuaambɔ laandoo, keiyo a cɛlɛkpɛ co vɔɛiyo-o, kɔlan tiiyaa a vana yuuvɛi yulunnde co o lebol-lo, sanga pilɔɔ kpé vanin nda coo ni.›

²⁶ Mí dimi aa i yeema mì saŋ nda fásàn. I yeema mì ɲumi diola ndalan vanndacieea tɛɛn.

²⁷ Ɲɛ ya kiisan le ken tosaa-o koni co ni, yɔŋii yaamɔɔa sɔla talen ma yei ya, yɔŋii vanaa nɔ nɛyɔn ndaa-a pɔɛɛnun mà dimi aa: ‹A kpaayaa naa naa n nɔla nda nuaa ni. O co Mɛlɛka le tosa kon kpow le.›

²⁸ Kani diɔmaa sondo vesɛiya vannda ha co ni, a nɔ kɔlkalu o lebol te.

²⁹ Bau te ndáà nɔ pɛ kɔlkaloo, ndáà biinin dɛnɔɔ ho bila, ndáà dɔawnin ɲɛ co nda cumndo-o taasi.

³⁰ Vɛɛ nɛ vanndo ndu pilɛ ndóò nɔla yɛ mì ndóò tow vannda vàá pilɛ? Vɛɛ nɛ vannda nda ŋiɔn ndáà nɔla yɛ mì ndáà tow vannda vaalan tɔ́, te pow kpova ndaa ndóò vɔngul nda le, te Mɛlɛka ndóò mel nda nda o ba le?

³¹ Kani pow bandílá ndaa co maa pow kpova niaa le. Hali yaamɔaa naa bɛɛ a kialu yamɛi ken.

³² Rɛsɛŋun ndan maa rɛsɛnndon Sodɔm n co ni, lɛŋnde rɛsɛŋun ndan tɔlnun coo len maa Komɔr le co ni. Bɔ̀tàá co o rɛsɛŋun ndan mun nin, kpɔ̀nyɔ̀la ndɔlan lollo kélélé.

³³ Mɔima ndan, maa lólò kɛwva ma co ni, maa lólòla hɔ̀ɔ̀lɔ́a mɔima ndama man ma co ni.

³⁴ Kɛ ɲɛ pum co ya o ba o kɛsiaa, i mandan ɲɛ pum o ba kɔ́dɔ́ le nda.

³⁵ Ya co vana mingiaa màá ni, ya sala vanndo le ɲɛ o tosa-o ni. Tuma nda boŋnin-ndo, ya saalanin nda ni. Kani paale dɛnɛ palaalen le co nin le tiiyaa nda coo. Dɛnɛ palaa kelun le nda-o tamalanin le tolɔɔ nda coo le.

³⁶ Kani Mɛlɛka kialunin yamɛi vanaa ndɔa. O tuinunnin vanaa baalaa ndɔa iɲíí lɔ́ɔ́ o canin maa yoomuma ndan maa cuu-o, telen o canin maa cɛ co lɛ le, hɔ́ɔ́ co lɛ loo.

³⁷ O kon, o ɲunanin aa: ‹Kuɛɛ nɛ halaa niaa fondoa co yɛ? Kuɛɛ nɛ pow bandílá niaa tiindan-ndo co yɛ?

³⁸ Kuɛɛ nɛ halaa va visin macuɛin cɔlua sálàá dioo a mɔima sálàn kolɔɔ-a co yɛ? A cɔn niko ma mala niaa va! A cɔn niko ma ven niaa va!

³⁹ Lelan, la sina maa ya co Hala ni, maa hala celen co o ya kɔɔli le. Ya yɔngù piɔ́mndo ni, ya yɔngù yoomoo ni. Ya boli vana ni, ya koni singi vana ni. Vana-vana nɔla mò hɛlu ɲɛ-ɲɛ ya o ba le.

⁴⁰ Kani i heelu baa coo mí mɛnan, mí dimi aa i co yoomu le fɛɛn a fɛɛn.

⁴¹ Te i cɛɛŋa pɛ mɔɛi nii cɔwve sondoo, te ba nuu saa pɛ dɛnɛ sandaa, i mingulnin yaamɔaa nia màá, i soaŋnin vanaa nɔ nɛyɔn nuu-a.

⁴² Mɔɛi nii cɔwve sɛɛsiaanin dialun ndan, i lɔngɔliaanin kɔɔn nun o kooma ndan nin. I cuuŋuunin kooma bolii simlacia yaamɔaa nia, kooma vanaa yɔŋulunnin-nda a kooma vanaa vanin o biyɔɔ nin-nda.

⁴³ Niaa vanaa-mangalaa-isɔaa, la tem vanaa ndɔa balan a ɲaaloo. Niaa halaa kpow, la baŋ vulan Hala o labɛngunin. Kani Mɛlɛka co màá mingi le vanaa ndɔa baalaa nda diw-va. O tuisin yaamɔaa ndɔa sanga bɛnda a nda-o coo, o salanin vanaa nɔ nɛyɔn ndɔɔ-a. Kɛ o tosa faleŋii dindiannde le lɛŋnde ndɔlen a le vanaa ndɔa ni›».

⁴⁴ Mí Moise hun dimi diomnda co lan o condei he nin-ndan kpow vannda o hɔl, Osee po Nun-ndo va ndu ikɛi.

⁴⁵ Mɛɛ o cii Israɛlla kpow sɔɔn mun kpede tɛɛngul,

⁴⁶ mó dimul nda aa: «La bii sɔɔn ya co mun niaa tɛɛngullo hau a mɛnanndo-on, mì la luei mun cuavaa niaa o lebol, haliko ma bii silala tɔŋndo ho kpow, mà kela lecoo.

⁴⁷ Kani o co sɔɛi taanin te sɔɛi he co le niaa le, sɔɛi yoomu niaa i co ni. Te la bii ndi pɛ, la sɔlanin yoomu vilɛiyo o lɛŋnde niaa co Yurdɛn taŋɔɔ le len kɔlan hiɔlɔɔ len nin.»

Mɛlɛka dimul Moise le helɔɔ o pembei Nebo coo

⁴⁸ Paale pilɛle len, mí Mɛlɛka dimul Moise aa:

⁴⁹ «Hel o pembon Abarim coo, o pembei Nebo coo, i co o lɛŋnde Moab len nin-nde, Yeriko o hɔl-ndɔ, ma mɛɛndan lɛŋnde Kanaan-nden, le ya co Israɛlla yɔngu len.

⁵⁰ O pembii n co ken helɔɔ coo-e coo n vunin ni, ma dem fuɲaa nɔmaa mamaa ciee-piɔ́m mɛɛ Aarɔn bɛ nɔm vi o pembei Hɔr coo, mó diam fuɲaa ndɔa mamaa yɛ.

⁵¹ Kani niaa ŋiɔn kpede, mí la sɛɛngiaa diom nuu Israɛlla o hɔl a sɔɛi mɛnndan Meriba o kɔɔ, Kadɛs ikɛi, o lɛŋnde veselɛilen Sin nin. La cɛl mì diondɔɔ nuu cɔmnun Israɛlla le.

⁵² Lelan, kɔɔli-kɔɔli koni n co lɛŋnde ya co Israɛlla yɔngu len cɔ ni, kɛ a luei lenin te few.»