Tɔŋ miingua 31 - BII BILA

DƐNNDA MƐƐLAALA MOISE TOSA LAN (31—34) Yosue muungu o fonda Moise-o

¹ Mí Moise kɔa vɛlɛ, mó kɔ soaa sɔɔn mun o Israɛlla kpow lo, mó dimul nda aa:

² «Hau i tiiya yoomu vɔsilan kɛmɛ a bidiin, i nɔla lɛ luɛyɔɔ a fulaa le. Nduyɛ Mɛlɛka cii nin ya dimul maa ya teŋnin peo ho le, Yurdɛn pɛɛn.

³ Mɛlɛka Hala niaa pila simnin niaa laci le kɔlan. O tɛɛmbuunin vanaa-mangalaa-isɔaa co icali lon-nda niaa laci, haliko mi la hɛlu lɛŋnde ndalen. Yosue vanin simlacinɔ niaa ni, lende Mɛlɛka dimi ni.

⁴ Mɛlɛka co nda tɛɛmbuu mɛɛ o tɛɛmbuu Sihon nda Ɔk masaa Amoriia a lɛŋnde ndalen yɛ.

⁵ O yɔngunin niaa kpaayaa mì la nɔla vanaa kan, mì la tosal nda mɛɛ ya dimul niaa le nda tosallo yɛ.

⁶ Lelan, la lueinun yoomuan mì la sim yili. Siòòŋii bii niaa le. La ɲiiya nda o hɔl te. Kani Mɛlɛka Hala niaa pila co va kɔlan a niaa latulu, o faŋannin niaa ikɛi le, o melnin niaa le.»

⁷ Mí Moise veelu Yosue Irsaɛlla kpow o hɔl, mó dimul ndu aa: «Kindikindin ma sim yili. Kani nɔm lueinin vannda ha o lɛŋnde Mɛlɛka yiilu fuɲaa ndaa mamaa kpemaa a mɛnanndo le nda len keo len nin ni. Nɔm piɔwnin nda len ni.

⁸ Mɛlɛka pila vanin kɔlan niaa laci, ndu pila vanin niaa ikɛi. O faŋannin niaa ikɛi le, o melnin niaa le. Lelan, siòòŋii bii niaa le, la ɲííyà le.»

O vɔsi ŋɔmmɛwndɔ oo vɔsi ŋɔmmɛwndɔ mɛɛlulan, tɔŋ sɛvan-ndo bɛnda mò dimin vannda o hɔl

⁹ Mí Moise sɛva tɔŋ kon, mó yɔngu vanaa-solia-lasálàá, poaa imamaa Levii-a, a ndáà cua kesu kpema Mɛlɛka-o le kɔlan a ndu-a, a kaasoŋaa kɔlkalua Israɛlla kpow.

¹⁰ Mí ndu Moise dimul nda aa: «O vɔsi ŋɔmmɛwndɔ oo vɔsi ŋɔmmɛwndɔ coo, telen vɔsi vana mal vannda haki a kueelan-ndo kandunnin-ndo, telen kafo lakùùo,

¹¹ te Israɛlla kpow a hun sim pɛ Mɛlɛka Hala niaa o hɔl o fonda ndu pila hɛlinin-ndo, a dimi tɔŋndo nda o hɔl kpow, o kon mì vana-vana tuei.

¹² Ma cuungiaa vannda kpow, kandɔɔ a vanpiaandua, vanlaandua, cuaambɔa a mialaa vanin niaa o bɛngu coo o kobila niaalan nin-nda, haliko ma yaŋ nilan o tɔŋ n vanin kon dimio-o, mà pɛɛku ndu le siòòŋii Mɛlɛka Hala niaa, mà bii sɔɔn tɔŋ kon kpow, mà kela lecoo.

¹³ O kon, cuavaa ndaa sinanin-ndɔ tɔŋ kon te-a tuɛinin ndu, mà pɛɛku ndu, haliko ma nɔ siòòŋii Mɛlɛka Hala niaa o palɛi niaa tosanin yoomu o lɛŋnde niaa kɔ hialunin telen niaa taŋnin Yurdɛn leeloo len nin.»

Israɛlla biinin diom Hala-o le

¹⁴ Mí Mɛlɛka dimul Moise aa: «Tuma n bɛnda le vuo-o tiiya. Lelan, veelu Yosue mì la kɔɛ o cɛi-kola-toandaa-labɔɔŋianndo nin, lon ya dimulnin ndu ɲɛ o bɛnda le tosaa-o ni.» O kon, mí Moise nda Yosue a kɔa o cɛi-kola-toandaa-labɔɔŋianndo, má luɛi, má sim lenin.

¹⁵ Mí Mɛlɛka cɔmnun nda lon o tindile ikumnden nin, mí tindile ikumnde len le sim o cɛi-kola-toandaa kon sondoo.

¹⁶ Mí Mɛlɛka dimul Moise aa: «Má cè nɔm hunɔɔ fuɲaa nɔmnda diomɔɔ ciee-piɔ́m! Te nɔm vi pɛ, vannda co lakɔ laasian ma soolu halaa fondoa o lɛŋnde nda co lakɔ luɛyɔɔ nin-nden nin. A faŋannin ya kɔɔli mà tɛɛmbuu kpema ya yii a nda-o.

¹⁷ Kɛ kɔl ni tuwvo toalnin nda coo paale len. I faŋannin nda ikɛi, mì vin nda hɔlaa niaa. A tambunin taw-taw, sangalan a dɛnnda palaala bɔɔ-bɔɔ la toalnin nda coo. A diminin telen kon maa a toɲa, le tùú ya Hala co lɛ nda tɛɛn too sangalan ndan kpow la tol nda coo ni.

¹⁸ Ya yɛ, i faŋalnin nda hɔlaa niaa paale len le dɛnɛ vɔɔn nda tosanin mà mulin halaa celennda sooloo-o.

¹⁹ Lelan, la sɛva condei he. Nɔm Moise pɛɛku Israɛlla ndi, pɛɛku nda condei he solio haliko mi condii kalɛi va seilen Israɛlla a ya Mɛlɛka tɛɛn.

²⁰ Kani i co nda yɔɔ o lɛŋnde ya yiilu fuɲaa ndaa mamaa kpemaa mí mɛnan le nda len yɔngoo len nin, lɛŋnde cɔlua a tɔlɔɔlan la naŋ nin taw-taw len pɛɛn. A vanin ɲɛdiaa dioo, mà va pumndo háá mì cuɛiyan ma luɛi nda. O kon, a mulinin hɔlla o halaa celennda lo, mà sooluu nda. Lende nda tuulunin ya kɔllo mà tɛɛmbuu kpema nuu ni.

²¹ Te sangalan a dɛnnda palaalan taw la tol niko nda coo pɛ, condei he vanin seilen le nda ni. Kani cuavaa ndaa imamaa pɔɛɛnunnin ndi le, a pɛnginin ndi solio le. Bau i cii nihau ɲɛ co vannda ha o kɔllo sina, i luei-yɔ nda bɛɛ fɔlɔn o lɛŋnde ya yiilu nda kpemaa mí mɛnan-nden nin te, mí sina yiyannda ndalan.»

²² Paale len, mí Moise sɛva condii ken, mó pɛɛku Israɛlla ndi.

²³ O kon kɔɔli, mí Mɛlɛka soaa o Yosue po Nun-ndo lo, mó dimul ndu aa: «Lueinun yoomuan ma sim yili. Kani nɔm co lakɔ Israɛlla luei o lɛŋnde ya yiilu nda kpemaa mí mɛnan-nden nin ni. Ya pila vanin nɔm ikɛi.»

²⁴ Mɛɛ Moise cii sɔɔn tɔŋ kon kpow sɛva o sɛbɔɔ nin,

²⁵ mó dimul leviia, á ndáà cua kesu kpema Mɛlɛka-o le kɔlan a ndu-a aa:

²⁶ «La bii sɛbɛ tɔŋndo ho, mì la kɛsi ndu o kesu kpema Mɛlɛka Hala niaa ikɛi. Lon o vanin o kɛsiaa le vaa seilen le Israɛlla ni.

²⁷ Kani i sina nila kalula niaalan a sɔɛi biyaa lepɛŋii niɛi. Bau la co vɔ Mɛlɛka simullo telen ya co vɔ hoo hau yoomu niaa tɛɛn-ndo, vɛ̀ɛ̀ la koma simulnin ndu lɔ́ɔ́ ya vunin-ndo hiovɔɔ o hoo coo le?

²⁸ Lelan, la cuungiaa vanaa co bolii lapangɛi niɛi-ya a vanaa sɛvaa niaa, mì hun dimi sɔɔn mun nda o hɔl, mì cua halataalaa a lɛŋnden seilen naa tɛɛn naa ndaa.

²⁹ Kani i sina maa te i vi pɛ, la co koma laasian, mì la faŋan o nɛi ya cɔm niaa-o coo. La tɛɛmbuunin Mɛlɛka kɔllo siɔdii laci a dɛnnda niaala vɔɔnnda niaa vanin tosaa lan, mì dɛnɛ palaa tol niaa coo taw-taw.»

Condii kpemɛi Moise condu-e

³⁰ O kon, mí Moise dimi sɔɔn co n'sɛvaa o condii ken nin-ndon kpow Israɛlla kpede o hɔl aa: