Tɔŋ miingua 30 - BII BILA

Duaa le muungoo Mɛlɛka o ibuŋ

¹ «Lɔ́ɔ́ dɛnnda lan kpow la keinin niaa coo-o, duaa a danga ya kɛsi niaa laci-o, te la cua pɛ sɔɔn mun balan tan tiɔn nɛɛ Mɛlɛka Hala niaa toawnin niaa vanaa-mangalaa-isɔɔa tɛɛn-nda,

² te la muungu pɛ Mɛlɛka Hala niaa o ibuŋ, te niaa pila a cuavaa niaa bii pɛ diom ndɔɔ a kɔlta niaalan a yoomu niaa kpow mɛɛ ya co niaa silaa hau yɛ,

³ Mɛlɛka Hala niaa tuinunnin niaa iɲíí. O solinin niaa nɛɛ niaa vanin a sɛŋiannda o cɛlen nin vanaa-mangalaa-isɔɔa tɛɛn-nda, mò mingi niaa o niaa lo.

⁴ Hali la va bɛɛ a sɛŋiannda nɛɛ lɛŋnden le mɛɛlu-a, Mɛlɛka Hala niaa kɔanin, mò kɔ soli niaa lon, mò mingi niaa cuungiaa.

⁵ O minginin niaa o lɛŋnde fuɲaa niaa mamaa ndáà nɔ len nin, mì la hɛlu len vɛlɛ. O tosalnin niaa dɛnɛ kɛndɔɔ, mò vangala niaa hiovɔɔ fuɲaa niaa mamaa coo.

⁶ Mɛlɛka Hala niaa diinin kɔlta niaalan a kɔlta cuavaa niaa tooma, la kaolanin Mɛlɛka Hala niaa a kɔlta niaalan a á yoomu niaa kpede, haliko mi la va yoomu.

⁷ O kon, Mɛlɛka Hala niaa tuisinin dangala lan yaamɔaa niaa, vanaa nɔ nɛyɔn niaa-a a vanaa tol niaa yɛlen-nda coo.

⁸ Niaa yɛ, la muungunin ndu o ibuŋ, la biinin diom ndɔɔ, mì la kela o tɔŋnda ndɔla ya co niaa hau tɛɛngullo lan coo.

⁹ Mɛlɛka Hala niaa tosalnin niaa dɛnɛ kɛndɔɔ, mì valta niaa vanin tosaa lan la naŋ niaa o ba. O yɔngunin niaa cuawva taw, o kuinin cɔlua niaa taw, mì tɔlɔɔla niaalan bɛɛ la kom ɲɛkɛndɛi. Kani ɲɔɔ hɛnannin vɛlɛ Mɛlɛka le niaa dɛnɛ kɛndɔɔ tosallo mɛɛ ɲɔɔ ndóò hɛnan ndu le fuɲaa niaa mamaa dɛnɛ kɛndɔɔ tosallo yɛ.

¹⁰ Te la kela pɛ o tɔŋnda ndɔlan a o silala ndɔla co lasɛvaa o sɛbɛ tɔŋndo ho nin-ndan coo, mì la muungu Mɛlɛka Hala niaa o ibuŋ a kɔlta niaalan a á yoomu niaa kpow, kon tosannin.»

Tɔŋ Hala-o co o kɔl vanacieo nin

¹¹ «Tɔŋ ya co hoo niaa yɔngoo hau-vo kindu taw a niaa le, o hiw niaa mayoomu le.

¹² Ó co o halataala le, yɔŋii vana dimi aa: ‹Nɛ̀ɛ́ hel-lɛnin o halataala mò kɔ cuu naa ndu, haliko mi n tuei ndu mì n kela lecoo?›

¹³ Ó co o mɛmma ihɛllan leeloo le, yɔŋii vana dimi aa: ‹Nɛ̀ɛ́ taŋ yɛnin o mɛmma ihɛllan leeloo mò kɔ cuu naa ndu, haliko mi n tuei ndu, mì n kela lecoo?›

¹⁴ Kɛ o co niaa ikɛi kpɛɛlun, o co niaa o lasondo a niaa o lakɔl, haliko mi la kela lecoo.»

La hɛli yoomoo

¹⁵ «La tofa vɔ, i kɛsi hau yoomoo a dɛnɛ kɛndɔɔ niaa laci, i kɛsi vɛlɛ piɔ́mndo a dɛnɛ vɔɔndo niaa laci.

¹⁶ Tɔŋ ya co niaa hau yɔngu-o co le Mɛlɛka Hala niaa kaolaa ni, le kɔlan o nɛila ndɔlan coo a le tɔŋnda ndɔlan, silala ndɔlan a pɛɛkula ndɔlan biyɔɔ, haliko mi la va yoomu, mì la kui, mì Mɛlɛka Hala niaa dɔw niaa duaa o lɛŋnde niaa co kɔlan luɛyɔɔ nin le len hiɔlɔɔ len nin.

¹⁷ Kɛ te kɔlta niaalan la faŋan pɛ Mɛlɛka coo, te la kɛɛ pɛ le sɔɛi ndɔɛi biyɔɔ, te la malnun pɛ halaa celennda o ba, mì la sooluu nda, mì la baŋ vulan nda o labɛngunin,

¹⁸ i co niaa ndi hau dimul maa i tɛɛmbuunin niaa. La tosa pɛ lende, la viwnin yoomu o lɛŋnde niaa co kɔlan luɛyɔɔ nin Yurdɛn leeloo le len hiɔlɔɔ len nin te few.

¹⁹ I cua hau halataalaa a lɛŋnden seilen le sɔɛi he. I kɛsi yoomoo a piɔ́mndo niaa laci, i kɛsi vɛlɛ duaa a dangaa niaa laci. Lelan, la cua yoomoo haliko mi la va yoomu, niaa a cuavaa niaa.

²⁰ La kaola Mɛlɛka Hala niaa, la bii diom ndɔɔ mì la holnun ndu. Kani kon tosanin ni mì la va yoomu, mì palɛi niɛi bandu taw, kon tosanin ni mì la va icali o lɛŋnde Mɛlɛka yiilu fuɲaa niaa mamaa Abraham, Isaak a Yakɔb kpemaa, mó mɛnan le nda len yɔngoo len nin.»