Tɔŋ miingua 26 - BII BILA

Ɲɛm vaan tason a o-tɔ́ndɔɔ

¹ «Lɔ́ɔ́ niaa luɛinin o lɛŋnde Mɛlɛka Hala niaa yɔngu niaa kɛ́ɔ len nin-ndo, te la hɛlu pɛ lɛŋnde len mì la cal lenin,

² vana-vana faŋa ɲɛ pum o kulun tasen o sɔlanin o tɔlɔɔ ndɔɔ nin o lɛŋnde len nin-ndon nin, o vow mun o kambɛiyo nin, o kɔɛ a mun o fonda Mɛlɛka hɛlinin le diola ndɔlan vaa biilɔnndo-o.

³ O tiiya pɛ, o kɔɛ o vana-solia-lasálà vanin sálàlan solio lon o palɛi ken nin-ndo lo, o dimul ndu aa: ‹I dimi hau Mɛlɛka Hala nɔmndo o hɔl maa i luɛi o lɛŋnde ndu Mɛlɛka yiilu fuɲaa naa mamaa kpemaa, mó mɛnalan nda le naa len yɔngoo len nin.›

⁴ O kon, vana-solia-lasálàá bii ndu kambɛi kon o ba, o kɛsi ndu o fonda-loamaa-lasálà Mɛlɛka Hala niaa-o o hɔl-ndɔ.

⁵ O kon kɔɔli, vana kon cua niko sɔɛi, o dimi Mɛlɛka Hala ndɔɔ o hɔl aa: ‹Aramiinɔ va kelaa-o fuɲa ni mamaa va ni, mí ndóò tuusu sindɛ Esipte a vanndacieea kɔɔli ɲɛ-pɔmbɔ, mó kɔ cal o sumialle lon a nda. Mí vanaa kan kɔ kui lon taw, má sɔla kpaayaa.

⁶ Kɛ mí Esiptea luei naa mɔnɛi, má saangiaa naa taw, má tundu naa valta kálà-kálàlan tosaa.

⁷ Kɛ mɛɛ naa n koŋul o Mɛlɛka Hala fuɲaa naa mamaa lo, mó tuɛi somisominnda naalan, mó ca mɔnɛi naa n va nin-nde, mó ca sanga naa a bɛpɛla naa n va nin-ndo.

⁸ Le hee, mó soli naa Esipte a ba ndɔɔ kpaayaa, mó luei Esiptea siòònde taw a kɔndɔfiltan a á kaamaala o va tosaa lan.

⁹ Mó hun a naa o fondaa ho nanu, mó yɔngu naa lɛŋnden nden, lɛŋnde cɔlua a tɔlɔɔlan la naŋ nin taw-taw len.

¹⁰ Lelan Mɛlɛka, sisa tofa vɔ mɛɛ ya cuu nɔm kɔmnde tasele ya sɔla o tɔlɔɔlan nin-nden yɛ, tɔlɔɔla ya tɔl o lɛŋnde n ke ya len coo lan pɛɛn.› O kon, o kɛsi ɲɛm mun Mɛlɛka Hala ndɔɔ o hɔl, o baŋ vulan ndu o labɛngunin le ndu biiloo.

¹¹ O kon kɔɔli, la dɔwnun ɲaale niaa leviinɔɔ a mial co icali niaa tɛɛn-ndo le ɲɛm kɛndɛn Mɛlɛka Hala niaa kenin niaa a yungula niaalan-ndon.»

O-tɔ́ndɔ vɔsi yàándɔɔ

¹² «Vɔsi yàándɔ oo vɔsi yàándɔ, vɔsi yɔngaa o-tɔ́ndɔɔ o vanin ni. Vana cii pɛ o-tɔ́ndɔɔ faaŋiaa o ɲɛm ndɔn kpow coo, mò piɔw leviia, mialla, vííya a vanlaandua piaandaa ndaa vi-a ɲɛm mun, mà de mà pim o kobi vana kon vanin icali nin-ndo nin,

¹³ o dimi Mɛlɛka Hala ndɔɔ o hɔl aa: ‹I soli ɲɛ siŋnun teengen-ndo o ya lo cɛinin, i yɔngu leviia, mialla, vííya a vanlaandua piaandaa ndaa vi-a ɲɛ kon mɛɛ nɔm pila dimul-la le tosaa yɛ. Tɔŋnda nɔmndan, o pilɛ bɛɛ i tɛɛmbuu le, o pilɛ bɛɛ i pɔɛɛnun vɛlɛ le.

¹⁴ I di ɲɛ-ɲɛ o ɲɛ kon nin telen ya va o sangaa nin-ndo le, i faŋa ɲɛ-ɲɛ lecoo le dɛnɛ nɔɔlɛi tosa a ndu le, i yɔngu ɲɛ-ɲɛ le dɛnɛ vana vílɛ́i le. I bii nɔm Mɛlɛka Hala nuu diom, mí tosa ɲɛ-ɲɛ n dimul-la le tosaa.

¹⁵ Lelan, lo o calta nɔmnda diandaalan nin ma tofa, lo o halataala ma tofa, ma tuisi vanaa nɔmnda duaa coo, Israɛlla pɛɛn, ma dɔw lɛŋnde n yɔngu naalen duaa, lɛŋnde n yiilu fuɲaa naa mamaa kpemaa le nda len yɔngoo len, lɛŋnde cɔlua a tɔlɔɔlan la naŋ nin taw-taw len pɛɛn.›»

Vanaa Mɛlɛka-a Israɛlla co ni

¹⁶ «Paalen nden hau, Mɛlɛka Hala niaa dimul niaa le kelaa o silala ndɔlan a o tɔŋnda ndɔlan coo. La bíí lan mì la kela lecoo a kɔlta niaalan a á yoomu niaa kpow.

¹⁷ Niaa pila dimi hau ni maa Mɛlɛka vanin Hala niaa, maa la kelanin o nɛila ndɔlan coo, mì la bii tɔŋnda ndɔlan, silala ndɔlan, pɛɛkula ndɔlan a diom ndɔɔ.

¹⁸ Mí Mɛlɛka dimi hau maa la vanin vanaa ndɔa, maa mɛɛ ndu pila dimul niaa ndi yɛ, maa la biinin tɔŋnda ndɔlan kpow,

¹⁹ haliko mo siinguu niaa vanaa bɛndua o vanaa-mangalaa-isɔɔa o cɔw-va kpow tɛɛn, mì la sɔla biiloo, diolan a bɛɛlen, mì la va yungu diandaa le Mɛlɛka Hala niaa maa mɛɛ ndu pila dimul niaa yɛ.»