Tɔŋ miingua 25 - BII BILA

Mɛɛ vana kialu yamɛi o sandei nin yɛ

¹ «Te vannda sɛɛngian pɛ, à bɛnda mà kɔ kɔɔsa nɛɛ kialaa n'yamaa. A kɔɔsa pɛ, à ke vana nɔ dí-o dí ndɔɔ, a yaala vana vɔw-vo.

² Te vana sɔla yaalaa-o bɛnda pɛ le lɔɔ sɔlaa, vana kialaa n'yamaa yambu ndu lɛŋ, à lɔɔ vana kon vana kialaa n'yamaa kon o hɔl mɛɛ o bɛnda le lɔɔ sɔlaa le dɛnɛ o tɛɛmbuu-o yɛ.

³ A nɔla ma lɔɔ ndu háá belehiɔɔlu, kɛ a hiaw lɛ o kon coo le. Kani taa hiow nin pɛ o kon coo, la dɔw puapilɛ niaa kon yɛɛvɛ, o tambu labɛɛ niaa o hɔl.»

Ɲɛ vana tosa a naw co maalon nɛiyo-o loo

⁴ La bɛnda mì la yii naw co maalon nɛiyo-o sondoo le.

Te puapilɛ vanndo vi pɛ mò mɛi hɔ́ɔ́ le

⁵ «Te puapilɛa nda ŋiɔn a va pɛ icali latulu, mì o pilɔɔ vi kɛ o vilu hɔ́ɔ́ le, lanɔ o mɛi kon-ndo bɛnda mò faŋan yungu kon o ba le kɔlan calle o nɔu nɛɛ celen te. Puapilɛ pɔnɔ ndɔ-o bɛnda mò loo ndu, mò siŋnun laa ndɔ, mò luɛi ndu coo le tùú o co puapilɛ pɔnɔ ndɔ vi-o-o.

⁶ Po tase cua kon vialunin-ndo bɛnda mò cua diola vana vi-o, mò va maa po ndɔ, yɔŋii diola vana vi kon-ndo la ɲum Israɛlla tɛɛn.

⁷ Kɛ te puapilɛ lo kon yoomu-o yeema le lanɔ puapilɛ ndɔɔ mɛi-yo lòó le, cua kon hel o kaasoŋaa kɔlkalua lo nɛɛ nda co o fonda dimia n'sɔɔ o dio kpaki kobio sondoo-a, o kɔ dimul nda aa: ‹Puapilɛ pɔnɔ nuu kɛɛ le diola puapilɛ ndɔ vi-o mɛiyo ceen Israɛlla tɛɛn, o kɛɛ le ya lòó mì siŋnun laa ndɔ. Puapilɛ pɔnɔ nuu o co ni, kɛ o kɛɛ le ya luɛyɔɔ coo.›

⁸ O kon, kaasoŋaa kɔlkalua veelu langbanɔ kon, a soo o ndu lo. Te o sim pɛ lon mò dimi aa: ‹I yeema mì lóó ndu le›,

⁹ cua kon sɔɔnguu ndu ikɛi vanaa kɔlkalua o hɔl, o soli ndu samtaa o ipelu, o tufu ndu lɔluan o hɔl. O cii pɛ kon kpede tosa, o dimi aa: ‹Nuaa vana tosal vanapɔnɔ kɛɛ le cɛi puapilɛ ndɔɔ mingio tangullo-o ni.›

¹⁰ Kandɔɔ ɲinkon, yungu ndɔɔ sɔlanin diolan Israɛlla tɛɛn aa ‹yungu vana nda soli samtaa o ipelu-o›».

Fonda vana see vanndo o cɔlɔbaa loo

¹¹ «Te vanpiaandua biyan pɛ cɔlɔbaa nda ŋiɔn, mì lanɔɔ o pilɔɔ hin kpaaliaa le pɔnɔ ndɔ hiɔlɔɔ vana nda co cɔlɔbaa-o o ba, te o saa pɛ vana co kon cɔlɔbaa nda pɔnɔ ndɔ-o labɛnguninndo,

¹² la bɛnda mì la kelu vanalanɔ kon baa. La tosa iɲíí a ndu le few.»

Sandei o yulalen nin

¹³ «Vana-vana bɛnda mò nɔ ɲɛm tuvan nɔ lusul pilɛ loon mún miun o bɔlɔ ndɔɔ nin te, o pilɛ bɛnda mò lusul taw mì o pilɔɔ va fefele le.

¹⁴ Vana-vana bɛnda mò nɔ panila hiyanndan tan tiɔn le kullon tuuvo le. O pilɛ va o bɛndu-bɛndu mì o pilɔɔ va o pɔmbɔ-pɔmbɔ le.

¹⁵ Vana-vana bɛnda mò nɔ ɲɛm tuvan co kpen-kpen-ndon a panila co kpen-kpen-ndan, haliko mi la viow yoomu taw o lɛŋnde Mɛlɛka Hala niaa co niaa yɔngoo len nin.

¹⁶ Kani Mɛlɛka Hala niaa yeema vanaa tosa delɔɔcoo vaa lende-a le few.»

Ɲɛ Israɛlla tosalnin polale Amalɛk len-ndo

¹⁷ «La loonun-ndɔ mɛɛ Amalɛkea tosal niaa nɛi-tɛɛn telen niaa cɛn Esipte mí la va hunɔɔ-o yɛ.

¹⁸ A tosa siòòŋii Hala le, má kuel niaa o nɛi niaa va hunɔɔ coo-o coo, la va a sangaa yɔkɔɔ, niáà nɔ lɛ mayoomu le, má del vanaa mɛɛlu kɔɔli má va hunɔɔ a tindaa-a coo.

¹⁹ Lelan, lɔ́ɔ́ Mɛlɛka Hala niaa baŋanin niaa yaamɔaa balu niaa-a kpow o ba, mò ke niaa pɛngi kɔlɲuloo o lɛŋnde o yɔngu niaa kɛ́ɔ len nin-ndo, la bɛnda mì la diw Amalɛkea kpow o lɛŋnden coo, haliko mi diola ndalan la ɲum o ceendo coo. La pɔɛɛnun ken te dɛ!»