Tɔŋ miingua 22 - BII BILA

Mɛɛ vaná saalun ɲɛ pila lo-o-o bɛnda le tosaa yɛ

¹ «Taa ce pɛ naw luusian puapilɛ nɔmndo o ba-o, te kon te saa luusian ndu o ba-o, mɛi cɔlu kon ndon ma kɔɛnnun te, kɛ a bɛnda mà yoo puapilɛ nɔmndo cɔlu ndɔ luusian kon-ndo.

² Te nɛɛ n co icali-a bandu pɛ taw a nɛɛ puapilɛ nɔm nɔ cɔlu kon-ndo co-a, te kon te taa sina vana cɔloo le, a kɔɛ a cɔlu kon o nɔm ndo, a manda ndu háá mi vana cɔloo hin ndu kɔɔli. O hin pɛ, a mingul ndu cɔlu ndɔɔ.

³ Taa saalun vɛlɛ pɛ sofɛlɛ ndɔɔ, doma ndɔ bɛndoo a ɲɛ-ɲɛ luusian puapilɛ nɔmndo o ba, a tosa lende. A bɛnda ma mɛi ɲɛ kon ndon ma kɔɛnnun te.

⁴ Taa komal pɛ sofɛlɛ puapilɛ nɔmndo, te kon te naw ndɔɔ o delaa o nɛi, mɛi ndu ma hiownun te, kɛ a bɛnda ma kɔ mala vana cɔlu kon cɔlu ndɔɔ cua le ndu simio.»

Silala yɛ́-yɛ́lan

⁵ «Vanalanɔɔ bɛnda mò cuɛinun volɔɔla súú vanpiaandua cuɛinun-ndan te. Vanapɔnɔɔ bɛɛ bɛnda mò cuɛinun volɔɔla súú vanlaandua cuɛinun-ndan te. Kani vanaa nɛinun Mɛlɛka-a vanaa cuɛinun lende-a co ni.

⁶ Taa komal pɛ vɛɛnnde yowvo o nɛi o yɔmndo coo, mì yow kalaa va o kuumbuanndo o peltan coo lenin, te kon te o cuawva coo, a bɛnda ma bii yow kon a pelta ndɔlan, te kon te a cuavaa ndɔa latulu le.

⁷ A bɛnda ma mal yow kalaa mo kɔɛnnun, ma cua pelta ndɔlan, te kon te cuavaa ndɔa. Taa tosa pɛ lende, a sɔla dɛnɛ kɛndɔɔ, a viow yoomu taw.

⁸ Taa tangul pɛ cɛi sɛnɛiyo, a bɛnda ma balu kpakio cɔvɔɔ o yindɔɔ coo sɔ́, yɔŋii vanndo hiɔlun ndon mo del mo vi, mì sɔɛi piɔ́m ndɔɔ i hel nɔm o lebol.

⁹ A bɛnda ma tɔl tɔlɔɔ celen o nakɔ n'rɛsɛn nɔmndo nin te, yɔŋii kɔmnde tɔlɔɔla tiɔnnda lan, rɛsɛnndon a tɔlɔɔ kon solin sálà kpow le vali Mɛlɛka-o.

¹⁰ A bɛnda ma muulian nawvo a sofɛlɔɔ yii o yɔm lebol pilɔɔ bɛngu le vàá a nda le.

¹¹ A bɛnda ma cuɛinun volɔɔ cuɛinan nda toosiaa a kola yiiŋii saa muulianndo a kola keesoo-o le.

¹² A bɛnda ma bayiaa kolala n'pɛngɛlan o cɔcɔn hiɔɔlun kola n vanin kuumbuɔnndo-o.»

Silalan le calii pɔnɔɔ a lanɔɔ

¹³ «Te vanapɔnɔɔ pum yil pɛ lanɔɔ, mò sina ndu vanalanɔ, o kon kɔɔli, mì kaola laa ndɔ kon cuu ndu o kɔl,

¹⁴ mò ɲiinduu ndu còòlan, mò tɛɛmbuu ndu diolan, mó dimi aa: ‹I yil cuaa ho o nɔ̀u nin, kɛ lɔ́ɔ́ naa n bɔŋa naa ndu o nɔ̀u nin-ndo, i komal lɛ ndu o ba ndɔ coo le.›

¹⁵ O kon, fuɲaa a kalaa vanalanɔ kon a kɔɛ o kaasoŋaa kɔlkalua kobia lo, nɛɛ nda dimi sɔɔn o dio luɛyaa kobi kon-nda a tɔɔmasele cɔm maa o komal cua kon o ba ndɔɔ coo-o.

¹⁶ A hin pɛ a ndu, fuɲaa cua kon dimul nda aa: ‹I yɔngu langbanɔɔ ho cua nuu o nɔ̀u nin, kɛ o kaola lɛ ndu le.

¹⁷ Lelan o ɲiinduu ndu còòlan coo ni, mó dimi aa o komal ndu o ba ndɔ coo le. Kɛ nduyɛ, la tofa vɔ tɔɔmasele cɔm maa o komal cua nuu o ba ndɔɔ coo-o.› O kon, o timbi kola pɛngɛlaa nda hini coo paale tasele nda bɔŋa len-ndo kaasoŋaa kɔlkalua kobio o hɔl.

¹⁸ Kaasoŋaa kɔlkalua kan ce pɛ lende, a bii vanapɔnɔ kon, a saangiaa ndu.

¹⁹ A luei ndu bɔnɔ volin latámán kɛmɛ, a yɔngu fuɲaa cua kon volin mun. Kani po kon tɛɛmbuu cuaambɔ lembu Israɛlnɔ hiw-vɔ vanapɔnɔ kɔɔli loo diolan, mó sui ndu poopoo. Lelan, le lɔ́ɔ́-lɔ́ɔ̀ nin, te po kon co vɔ pɛ yoomu, laa ndɔ cua kon co va ni. O nɔ lɛ di oo di mo kɛɛ ndu le.

²⁰ Kɛ nduyɛ, te sɔɛi vanapɔnɔɔ kon dimi-e va pɛ toɲaa, te tɔɔmasele cinnun le cɔmndo maa o komal cua kon o ba ndɔɔ coo le,

²¹ a bii cua kon, a kɔɛ a ndu o cɛi fuɲa ndɔ-o sondoo, pilacieaa ndɔa vii ndu a powtan háá mo vi. Kani dɛnɛ nɔɔlɛiyo o tosa kon Israɛlla tɛɛn ni, bau telen o va vɔ fuɲa ndɔ o bɛngu coo-o, mó suunda. Mɛɛ lende niaa bɛnda ni mi la faŋa dɛnɛ vɔɔndo niaa tɛɛn.

²² Taa bii pɛ vanapɔnɔɔ pum suundaa a vanalanɔ co o nɔu-vo, nda ŋiɔn kpow a bɛnda mà sɔla piɔ́mndo, vanapɔnɔ kon a vanalanɔ o suunda-o pɛɛn. Lende niaa bɛnda ni mi la faŋa dɛnɛ vɔɔndo Israɛlla tɛɛn.

²³ Te vanapɔnɔɔ pum fula pɛ cuaambɔ laandu lemboo kɔɔli le ndu cuaa o nɔ̀u nin, mì vanapɔnɔ celen bɔŋan a cuaambɔ laandu kon o kobio nin, mò suunda a ndu,

²⁴ la bii nda nda ŋiɔn kpow, la kɔɛ a nda o dio kobio, la vii nda a powtan háá ma vi. Cuaambɔ laandu kon co piɔ́mndo sɔla le kɛɛ o kɛɛ le yeelan mɛlio coocoo le vannda veeloo-o, nduyɛ o kobio nin dɛnɛ kon tosan ni. Langbanɔɔ ndu sɔlanin piɔ́mndo le tùú o suunda a lanɔ pilaa-o. Lende niaa bɛnda ni mi la faŋa dɛnɛ vɔɔndo niaa tɛɛn.

²⁵ Kɛ te yondoo nin langbanɔ kon bɔŋan a cuaambɔ laandu vana celen fula nin kon kɔɔli-o ni, mò kpuva ndu, mò hini a ndu, langbanɔ kon ndu pilɛ kínɛí bɛnda le piɔ́mndo sɔlaa ni.

²⁶ La tósàl cuaambɔ laandu kon ɲɛ-ɲɛ le. Kani o tɛɛmbuu dɛnɛ o bɛnda le piɔ́m sɔla le. Dɛnɛ kon tosalan ndu maa mɛɛ vanndo del vanndo coo nuaa mò dii ndu yɛ.

²⁷ Kani yondoo nin langbanɔ kon komal ndu ni, cuaambɔɔ mɛli yeelan fee vana-vana hin le ndu mala le.

²⁸ Te vanapɔnɔɔ pum saalun pɛ cuaambɔ laandu vanapɔnɔ celen fula vɔ kɔɔli loo, mò kpuva ndu, mò tɛɛmbuu dɛnɛ a ndu, taa bii nda pɛ o dɛnɛ kon tosaa,

²⁹ vanapɔnɔ suunda kon a cua pilaa-o bɛnda mò luɛi bɔnɔ, mò yɔngu fuɲaa cuaa volin latámán beleŋuɛɛnu, mò cua vɛlɛ cuaambɔ kon o nɔ̀u nin. Kani kpuvaa o kpuva ndu ni, handɔɔ o kon coo, háá mo vi o bɛnda lɛ mo kɛɛ ndu le few.