Tɔŋ miingua 2 - BII BILA

¹ «O kon, mí n muungu a makɔɔ, mí n kɔa o lɛŋnde veselɛilen nin a kpengii mɛmma ihɛlma makpɛ̀ndɛ̀an ma co-e, maa mɛɛ Mɛlɛka dimul-la le tosaa yɛ. Mí n cii palɛi taw-taw, n va pembei Seir pilapilanndo.»

Keiyo o lɛŋnde Edɔm-nden nin, o lɛŋnde Moab len nin a o lɛŋnde Amɔn-nden nin le kɔlan Kanaan

² Mí Moise dimi aa: «Paale pilɛ, mí Mɛlɛka dimul-la aa:

³ ‹O co nin lɔ́ɔ́ levil la co pembei he pilapilannd. Lelan, la kɔ a ba luaŋ-ndo.

⁴ Dimul vannda mi la kei o pɛɛngula lɛŋnde puapilɛa niaa ikɛi, cuavaa-imamaa Esau-va pɛɛn, á co icali o tàndá Seir-o nin-nda. Yungu kon yɔŋnin siòònde a niaa. Kɛ la caa dɛ!

⁵ La del nda coo a cɔw le, kani i yɔngunin niaa ɲɛ-ɲɛ o lɛŋnde ndalen nin te, hali nɛɛ kɛsiaa ipelua la sɔlanin ndon te. Kani Esau ya yɔngu tàndá n'pemboo Seir ni. Kɛ ndɔɔ co kon ni.

⁶ La bɛnda mì la pendu ɲɛ-ɲɛ niaa vanin dioo lon nda o ba a volion, hali mɛmma niaa vanin kolɔɔ-an, la bɛnda mì la pendu man nda o ba.

⁷ Kani Mɛlɛka Hala niaa dɔw niaa duaa o kpekula niaalan kpow nin, mó manda niaa telen niaa va lɛŋnde veselɛile bɛndulen nden taŋɔɔ-o. La tofa vɔ, o co nin vɔsilan belehiɔɔlu, Mɛlɛka Hala niaa co latulu a niaa, ɲɛ-ɲɛ co niaa lepɛŋ te.›

⁸ Le hee, mí n kpakpala puapilɛa naa, cuavaa-imamaa Esau-va pɛɛn, á co icali o tàndá Seir-o nin-nda, mí n keinun lándán. Mí n kei a nɛi bóllo Araba, o cɛn Eilat a Ɛsiɔn-Kebɛr-o. Kɔlan lándán, mí n faŋan o nɛi kon coo, mí n del o nɛi kɔɛ a lɛŋnde veselɛilen Moab-o coo.

⁹ O kon, mí Mɛlɛka kanalan ya aa: ‹La cá Moabua yaamɔaa niaa le, la del nda coo a cɔw le. Kani i yɔngunin niaa ɲɛ-ɲɛ o lɛŋnde ndalen nin te. Kani cuavaa-imamaa Lɔt-a ya yɔngu lɛŋnde Ar len ni, kɛ́ ndaa co kon ni.›

¹⁰ Sindɛ, Emimnda va icali lon ni, vanaa kan ndáà nɔ kpaayaa, a va sɛ́lɛ́, ndáà bandu vɛlɛ taw maa cuavaa-imamaa Anak-a.

¹¹ Emimmaa kan bɛɛ, maa Refaimnda vannda ce nda ni mɛɛ nda ce cuavaa-imamaa Anak-a yɛ, kɛ vannda Moab va nda veeloo ni aa Emimnda.

¹² Lɛŋnde Seir len vɛlɛ bɛɛ, Horiia va sindɛ icali lon ni, kɛ mí cuavaa-imamaa Esau-va toaw nda, má diw nda, má cal o fonda ndaa. Lende koni cuavaa Israɛlla tosa a lɛŋnde Mɛlɛka yɔngu Israɛl kɛ́ɔ má cal lenin-nden ni.

¹³ Mí Mɛlɛka dimul-la vɛlɛ aa: ‹Sisa, la cɔn mì la kɔɛ, la taŋ pee pɔmbɔɔ Serɛd.› O kon, mí n taŋ pee pɔmbɔɔ Serɛd.

¹⁴ Kandɔɔ a faŋan naa Kadɛs-Barnea, kɔ bii a taŋɔɔ naa n taŋ pee pɔmbɔɔ Serɛd-o, vɔsilan beleyaa a laŋɔmaa naa n cii ni, háá mi lambi vanaa cɔvaa tasea cuu vu o dɔ́ɔ́ngɔ́ɔ̀ nin mɛɛ Mɛlɛka ndóò mɛnalan nda yɛ.

¹⁵ Mɛlɛka pila lo nda diwvo o dɔ́ɔ́ngɔ́ɔ̀ nin ni háá ma cuu vu kpow.

¹⁶ Mɛɛ vanaa tiiya vɔsilan le volɔɔla cɔwlan cuaa-a cuu vu o vanaa kan tɛɛn kpow,

¹⁷ mí Mɛlɛka soaa o ya lo, mó dimul-la aa:

¹⁸ ‹Hau, la hiawnin pɛɛngula lɛŋnde Moab len, mì la taŋ lɛŋnde Ar len.

¹⁹ La tiiyanin poaa Amɔn-nda macɛlu, kɛ la del nda coo a cɔw le, la tiŋ nda a sɔngɔ le. Kani i yɔngu niaa ɲɛ-ɲɛ o lɛŋnde poaa Amɔn-nda nin te, polale Lɔt len ya yɔngu len ni. Kɛ́ ndaa co kon ni.›

²⁰ Lɛŋnde len bɛɛ, ndáà cua len maa lɛŋnde Refaimnda, kani Refaimnda va sindɛ icali lon ni, nuaa poaa Amɔn-nda ndáà veelu Refaimaa kan ni aa Samsumiia.

²¹ Vanaa kpaayaa, sɛ́lɛ́ bɛndoo a vanaa bandu taw-va vanaa kan va ni maa cuavaa-imamaa Anak-a. Kɛ mí Mɛlɛka ke poaa Amɔn-nda yoomuan, má diw vanaa kan, má hialu lɛŋnde ndalen, má cal o fonda ndaa.

²² Lende koni ndu Mɛlɛka tosa a cuavaa-imamaa Esau-va ni, á co icali o lɛŋnde Seir len nin-nda. Le nda o diw Horiia ni, mó ke nda fonda ndaa, má loo lɛŋnde ndalen, má va icali lon háá paalen nden.

²³ Lende koni o tosal vɛlɛ Aviia ni, á co icali o sɔndɔkɔltan nin háá Kaasa-a. Mɛɛ vannda pum cɛn Kaftɔr, má hun diw Aviaa kan kpow, má hialu fonda ndaa.

²⁴ Mí Mɛlɛka dimul-la lɔ́ɔ́ kon aa: ‹La cɔn mì la bii nɛiyo le kɔlan, la taŋ pee pɔmbɔɔ. I co Sihon, masa Amoriia, ó va icali Hɛsbɔn-ndo a lɛŋnde ndɔlen kpow malɔɔ niaa o ba. La kandu lɛŋnden hiɔlɔɔ lon, la del ndu coo a cɔwvo.

²⁵ Kandɔɔ hau, i co vanaa-mangalaa-isɔaa co o lɛŋnden coo-a kpow siòòŋii niɛi luei, mà yɔŋ siòònde a niaa. Vanaa-vanaa tuei pɛ maa la co nin sɔɔnguuo nda ikɛi, kan ɲiiya, a yɔŋnun yoloma-yoloma niaa o hɔl.›»

Mɛɛ Israɛlla hɛlu lɛŋnde Sihon-nden yɛ

²⁶ «N lo o lɛŋnde veselɛilen Kedemɔt nin, mí viam kiilaa o Sihon masaa Hɛsbɔn ndo a yoongu kɔlɲuloo, mí dimul ndu aa:

²⁷ ‹Mal naa mì n kei o lɛŋnde nɔmnden nin. Nɛi bɛndoo kínɛí naa n co va kɔlan kɔɔli ni, n seinin o ba kɛndɛ coo le, n seinin vɛlɛ o ba mɛl coo le.

²⁸ Piondɔɔ naa n piandunin ɲɛdiaa naa n vanin dioo-o a volion ni, piondɔɔ naa n piandunin vɛlɛ mɛmma naa n kolnin-ndan a volion ni. Kɛ le keiyo o nɔm ndo a n'pelu daama naa n yeema ni.

²⁹ Lende koni cuavaa-imamaa Esau-va, á co icali o lɛŋnde Seir len nin-nda a vannda Moab, á co icali Ar-a mal naa hiovɔɔ ni. Lelan, nɔm bɛɛ cɛl mì n kei o lɛŋnde nɔmnden nin háá mì n kɔ taŋ peo Yurdɛn, le kɔlan luɛyɔɔ o lɛŋnde Mɛlɛka Hala naa yɔngu naa len nin.›

³⁰ Kɛ mí Sihon, masaa Hɛsbɔn kuuna naa le keiyo o lɛŋnde ndɔlen nin. Kani mí Mɛlɛka Hala niaa kindi ndu nilan haliko mi ndóò del niaa o ba paale len a lɛŋnde ndɔlen kpow.

³¹ O kon kɔɔli, mí Mɛlɛka dimul-la aa: ‹Tofa vɔ, i kandu Sihon a lɛŋnde ndɔlen kpow malɔɔ niaa o ba. Lelan, kandu lɛŋnden hiɔlɔɔ o ndu lo.›

³² Mí Sihon luɛi yondo le naa cɔlɔbaa, mó del naa coo a cɔwvo Yahas a vanaa ndɔa cɔwva kpow.

³³ Kɛ mí Mɛlɛka Hala naa mal ndu naa o ba, mí n tiw nda ba, ndu pila, poaa ndɔa a vanaa ndɔa cɔwva kpow.

³⁴ O kon mí n bii kobila ndɔlan kpow, mí n diw vanaa va lenin-nda, kandɔɔ a vanpiaandua kɔ bii a cuaambɔa pɔmbɔa, vana pilɛ bɛɛ lo yoomu le.

³⁵ Fɔ cɔlua a ɲɛm naa n bii o kobila naa n tɛɛmbuu lan nin-ndon naa n mɛi le naa pila ni.

³⁶ Kandɔɔ a Aroɛr, ciee co kon o kɔngɔ feke-feke peo Arnɔn coo-o, keiyo a kobi co o bólta lan nin-ndo, kɔ tiiya háá Kalaad, n bumba kobi kɛ́-kɛ̀ biyɔɔ le. Kani mí Mɛlɛka Hala naa mal tan kpow naa o ba.

³⁷ Kɛ n pilan lɛŋnde poaa Amɔn-nda le, n pilan fonda-fonda o pee pɔmbɔɔ Yabɔk kɔngɔ le, n pilan kobila co o pembon coo lan te. Fondala Mɛlɛka Hala naa dimul naa le mɛiyo lan kpow mí n mɛi lan ndon.»