Tɔŋ miingua 19 - BII BILA

Vanaa dii vannda-a a kobila viannanndan

¹ «Lɔ́ɔ́ Mɛlɛka Hala niaa ciinin vanaa-mangalaa-isɔaa o co niaa lɛŋnde ndalen yɔngu-a tɛɛmbuu-o, lɔ́ɔ́ niaa hialunin lɛŋnden nda o ba mì la cal o kobila ndalan nin a o cɛila ndalan nin-ndo,

² la hɛli kobilan layàá o lɛŋnde Mɛlɛka Hala niaa yɔngu niaa kɛ́ɔ len tɛɛn, la siinguu lan teengen.

³ O kon la buli nɛilan ɲɛkɛndɛi le tiiyaa o kobila lan nin, haliko vana-vana dii pɛ vanacieo, o kɔ vionnun ndon. Lelan, mì la piɔw lɛŋnde Mɛlɛka Hala niaa ke niaa len-nden tàndàla bɛndulan tan yáá.

⁴ Vana dii vanacieo, mò kɔ vionnun o kobila lan o pilɛ nin, mò baŋa yoomu ndɔɔ-o co hoo ni: vana sulalle fula o ba, mo dii vanacieo, kɛ ndóò nɔ nɛyɔn ndɔ paandu loo.

⁵ Tɔɔmaseloo co hoo ni: te vanndo kɔɛ pɛ o bundɔɔ nin nda caan ndɔ le yɔmnde kioŋndo, mò sim yɔmndo lɔvaa a cuei le ndu kombaa, telen o co kon lɔvaa-o, mì cuei bɛŋin o piawvo mì i bii caan ndɔ kon, mò vi, vana dii kon ndu kon-ndo nɔla mò ɲaanun, mò kɔ vionnun o kobila lan o pum nin, mò baŋa yoomu ndɔɔ.

⁶ Hali tiŋndo bandu bɛɛ taw le tiiyaa o kobila lan o pum nin, o bɛnda mì vana co màá mingio-o lo ndu kiltan kɔɔli a kɔltuwvo háá mò bii ndu, mò dii ndu le. Kani vana kon ndóò nɔ paandu nɛyɔn vana o dii-o le. Lelan o bɛnda mò sɔla piɔ́m te few.

⁷ Le kɔlɔ kon ya dimul niaa le kobilan hɛlio tan yáá a le lan siinguuo teengen ni.

⁸ Te Mɛlɛka Hala niaa cɔɔlu yɛ pɛ lɛŋnde niaalen kuundiaa mɛɛ o yiilu fuɲaa niaa mamaa kpemaa yɛ, te o yɔngu pɛ niaa lɛŋnde o yii kpemaa le nda keo len kpow,

⁹ te la bii pɛ tɔŋnda ndɔla ya co niaa hau tɛɛngullo lan kpow mì la lo lecoo, te la kaola pɛ Mɛlɛka Hala niaa mì la kela o nɛila ndɔlan coo, mɛɛ la cɔɔlunin vɛlɛ kobila viannannda celen tan yáá handɔɔ o layàála taselan coo.

¹⁰ O kon vana venin vanaa tɛɛmbuu isɔɔ le-a diyɔɔ o lɛŋnde Mɛlɛka Hala niaa ke niaa kɛ́ɔ len nin te, yɔŋii sɔɛi piɔ́m vanaa vaa lende hel niaa o lebol.

¹¹ Kɛ te vanndo nɔ pɛ nɛyɔn vanndo, mò miingul ndu yaŋɔɔlan, mò del ndu coo, mò lɔɔ ndu háá mi vana kon vi, hali vana dii kon caando-o ɲaanun bɛɛ mò kɔ vionnun o kobila lan o pum nin,

¹² kaasoŋaa kɔlkalua co o kobi ndɔɔ nin-nda bɛnda mà vem vanndo mò kɔ hun a ndu. O hin pɛ a ndu, a mal ndu vana cɛn le màá mingio-o o ba, haliko mi ndu bɛɛ sɔla piɔ́mndo.

¹³ La tuínun vana vaa lende iɲíí le, kɛ lende niaa bɛnda ni mi la dindi Israɛlla Mɛlɛka o hɔl le piɔ́m vana tɛɛmbuu isɔɔ loo sɔla-o. La tosa pɛ lende, la sɔla dɛnɛ kɛndɔɔ.»

Silaa le pɛɛngula yondolan

¹⁴ «Lɔ́ɔ́ niaa calnin o lɛŋnde Mɛlɛka Hala niaa ke niaa kɛ́ɔ len nin-ndo, la kpeŋa powta vanaa tasea tiiyanin-nda handunin le pɛɛngulan cɔmndo yondola niaalan a yondola vanaa niaa cal-la tɛɛn-ndan te.»

Silalan le seiya a le seilen tombio

¹⁵ «Seile seiyo ndu pilɛ timbi len le tiw le vanndo yaalaa le tɛɛmbuu oo tɛɛmbuu, te kon te le haki oo haki le. Fɔ mi seiya a ŋiɔn, te kon te a yaa a timbi seilen malan yamɛi kialun.

¹⁶ Te seiyo tɛndal pɛ vanndo seilen o còòlan coo, mò ɲiinduu ndu sɔɛi pum coo,

¹⁷ nda ŋiɔn kpow a kɔɛ Mɛlɛka o hɔl, a kɔ sim vanaa-solia-lasálàá a vanaa kialaa n'yamaa vanin vali kon tosaa telen kon-nda o hɔl.

¹⁸ O kon, vanaa kialaa n'yamaa yaasiaa sɔɛi ken a taasi. Taa saalun pɛ maa còòlan fúú sei kon dimi ni, maa seile lacòòvalen o timbi ni,

¹⁹ la tuisi ndu pila sanga ndóò yeema le caando tuisio coo-o coo. Lende niaa tosanin le yɔŋ vɔɔndo solio niaa tɛɛn ni.

²⁰ Siòònde biinin vanaa tɔ̀a tuɛinin sɔɛi ken-nda, o kon vana-vana tɔɔndan ndɛnin le dɛnɛ kɔlvesɛi vaa lende tosaa niaa tɛɛn te.

²¹ La tuínun vana vaa lende iɲíí le. Kani tɔŋndo dimi aa: vana dii pɛ vanacieo ndu bɛɛ a dii ndu, vana pɛl pɛ vanndo hɔlten, ndu bɛɛ a pɛl ndu hɔlten, vana bɛŋi pɛ vanndo ciŋnde, ndu bɛɛ a bɛŋi ndu ciŋnde, vana yem pɛ vanndo baa, ndu bɛɛ a yem ndu baa, vana yem pɛ vanndo pelei, ndu bɛɛ a yem ndu pelei.»