Tɔŋ miingua 17 - BII BILA

¹ La solul Mɛlɛka Hala niaa sálàá a cɔlu namtaa le, o va naw o va saa. Kani dɛnɛ nɔɔlɛiyo co kon le Mɛlɛka Hala niaa ni.

² Te o va pɛ maa o kobila Mɛlɛka Hala niaa ke niaa lan o pum nin, vanapɔnɔɔ pum, te kon te vanalanɔɔ pum niaa tɛɛn o tosa dɛnɛ hɛnan Mɛlɛka Hala niaa loo, mò del kasi a kpema Mɛlɛka-o,

³ mò kɔ sooluu halaa celen, mò tundun tombun celen o labɛngunin, mò sooluu paalen, paangei, te kon te ɲɛm co o halataala-on, mɛɛ o tosa ɲɛ ya kuuna-o.

⁴ Te vannda saalun ndu pɛ, mì sɔɛi ken komal niaa, la bɛnda mì la yaasiaa ndi ɲɛkɛndɛi. Te toɲaa dɛnɛ kon yɔŋnun ni, te lekɛ́ndɛi dɛnɛ nɔɔlɛi kon tosan Israɛl ni,

⁵ la bii vana tosa dɛnɛ vɔɔn kon-ndo, la kɔɛ a ndu o sondo kpaki kobi niaa kon, la vii ndu a powtan háá mò vi.

⁶ Kɛ fɔ mì seiya a ŋiɔn, te kon te a yaa a timbi fɔlɔn seilen maa lende o tosa ni, malan niaa dii ndu. Seile vana pilɛ le tiw le vanndo diyɔɔ le.

⁷ Seyaa timbinin seilen maa o tosa lende-a fɔlɔn a kandunin ndu viiyo a powtan le ndu diyɔɔ ni. Nda kandu pɛ, vanaa tɔ̀a sɔɔnguu niko nda mayoomu le vana kon viiyo a powtan háá mò vi. Lende niaa tosanin le dɛnɛ vɔɔndo faŋaa niaa tɛɛn ni.»

Dɛnnda vanaa co baalaa o Cɛi-Diandaa nin-nda bɛnda mà kelu iyama lan

⁸ «Te o va pɛ mi kpundɛ diyaa vanacieo, sɛɛngianndo, yɔŋulɔnndo, te kon te sulalle pum fula o dɛnɔɔ pum nin o kobi niaa pum nin, te yamaa co lon-nda nɔla yamɛi ken kiolɔɔ le, te dɛnɛ kon hiow pɛ nda mayoomu, la kɔɛ a sɔɛi ken o fonda Mɛlɛka Hala niaa hɛlinin-ndo.

⁹ La kɔ komal leviaa-solia-lasálàá, a vana kialaa n'yama vanin yamɛi kiolɔɔ telen kon-ndo, la hivi sɔɛi ken nda o ba. O kon, nda cɔm niaa mɛɛ vana kialu yamɛi vaa lende yɛ.

¹⁰ O kon, la kɔ tosa mɛɛ nda dimulnin niaa o fonda Mɛlɛka hɛlinin-ndo yɛ, la kelu yamɛi mɛɛ nda cɔmnin niaa yɛ kpafii.

¹¹ O tɔŋnda nda yɔngunin niaa le yamɛi kiolɔɔ lan coo kpafii niaa bɛnda le kɔlan ni, mì la kelu yamɛi mɛɛ nda dimulnin niaa yɛ. La bɛnda mì la tundun o ba kɛndɛ coo, te kon te a ba mɛl coo le.

¹² Te vanndo pum tosa pɛ yongaa, mò kɛɛ le yamɛi vana-solia-lasálà co baalaa tosaa le Mɛlɛka Hala niaa-o kelu-e cɛlɔɔ, te kon te mò kɛɛ le diom vana kialaa n'yamaa biyɔɔ, vana kon bɛnda mò sɔla piɔ́mndo kangalan. Lende niaa tosanin le dɛnɛ vɔɔndo faŋaa Israɛlla tɛɛn ni.

¹³ Te vanaa tɔ̀a tuei pɛ lende, siòònde bii nda taw. O kon, vana-vana tosa lɛnin dɛnɔɔ a yongaa lende le.»

Tɔŋndan le masaa suilio

¹⁴ «Lɔ́ɔ́ niaa luɛinin o lɛŋnde Mɛlɛka Hala niaa yɔngu niaa len nin-ndo, te la hɛlu pɛ lɛŋnde len mì la cal lenin, te la dimi pɛ aa: ‹N hɛlin masaa pum mò tosa masalen naa coo maa vanaa-mangalaa-isɔaa balu naa-a›,

¹⁵ la nɔla mì la suili masa Mɛlɛka Hala niaa hɛlinin-ndo. Kɛ puapilɛ niaa Israɛlnɔɔ o pilɛ niaa suilinin le masalen tosaa niaa coo ni, la cua miallo mi la siinguu ndu masaa niaa coo le.

¹⁶ Masa niaa suilinin kon-ndo bɛnda mò nɔ soa taw le, o bɛnda mò mingi vɛlɛ Israɛlla pum Esipte le soa sɔlaa taw-taw le. Kani Mɛlɛka dimul niaa aa: ‹La muungu lɛ o nɛi kon coo le.›

¹⁷ Masa kon bɛnda mò yil laandua taw le, yɔŋii o laasian mò mulul Hala kɔɔ. O bɛnda vɛlɛ mo cuungiaa volion a sianion taw-taw le.

¹⁸ Te o sul pɛ masaa, leviaa-solia-lasálàá bɛnda mà tɛɛngul ndu tɔŋndo, mò sɛva ndu o sɛbɔɔ nin le ndu pila.

¹⁹ Tɔŋ o sɛvanin kon-ndo bɛnda mò kɔɛ ndu levil te, o bɛnda mò va ndu dimio lepalaa-lapala o ceen ndɔɔ nin, haliko mo nɔ siòòŋii Mɛlɛka Hala ndɔɔ, mò bii tɔŋ kon, mò kela o silala lan kpow coo.

²⁰ Kon tosan pɛ, o kuundiannin mo cennun maa o hiow puapilɛa ndɔa le, o túndùnin tɔŋndo o ba kɛndɛ coo, te kon te o ba mɛl coo le. O kon, ndu pila a cuavaa ndɔa a viow o masalen coo o lɛŋnde Israɛl-ten nin taw.»