Tɔŋ miingua 16 - BII BILA

Kafo-hiavaa-coo

¹ «La loonun a paangii Abib-e mì la tosa kafo-hiavaa-coo lenin le Mɛlɛka Hala niaa biiloo. Kani ɲumma pilɛ o paangii ken nin Mɛlɛka Hala niaa soli niaa Esipte ni.

² La bɛnda mì la soli sálà kafo-hiavaa-coo a nawva, a saa, te kon te a cuinnda le Mɛlɛka Hala niaa biiloo, mì la dii cɔlua kan o fonda Mɛlɛka pila hɛlinin le diola ndɔlan vaa biilɔnndo lon-ndo.

³ La bɛnda mì la de ɲɛdiaa sálà kon a bulu toosian a lɛvɛnndo-o latulu le. O palɛi ndii ŋɔmmɛw bɛngu, la bɛndu mi la va bulu toosian a lɛvɛn too dioo. Bulu imɔnɔ kon vanin niaa yiyalanndo ni maa a kiltan niaa fula o lɛŋnde Esipte len nin ni. O kon, le fɛɛn a fɛɛn, la vanin loonɔnndo a paale niaa faŋan Esipte len.

⁴ O palɛi ŋɔmmɛvii ken bɛngu, lɛvɛnndo bɛnda mò va o lɛŋnde niaalen kpow nin te. Cɔlu sálà niaa diinin vɛlɛ o paale tasele kafo kon coo icɔllo-o, la bɛnda mì la manda visin ndɔn háá diimandɔɔ le.

⁵ La bɛnda mì la dii cɔlu niaa sálà kafo-hiavaa-coo kon o kobi oo kobi nin o kobila Mɛlɛka Hala niaa yɔngu niaa le calle lan nin te,

⁶ fɔ o fonda ndu Mɛlɛka pila hɛlinin le ndu pila cɔmnɔnndo-o niaa bɛnda le ndu diyɔɔ ni. La bɛnda mì la dii cɔlu kon a paale yɔngannden, a telen niaa faŋan Esipte-o kpafii.

⁷ La yaw pɛ visin mun, la de mun o fonda Mɛlɛka Hala niaa hɛlinin-ndo. Diimandɔɔ idiiyo, la muungu o laniaa lo.

⁸ O palɛi ndii ŋɔmpum bɛngu, la bɛnda mì la va bulu toosian a lɛvɛn too dioo. Paale ŋɔmmɛwndɔlen, la tosa cuungian lekaando le Mɛlɛka Hala niaa biiloo. La bɛnda mì la tosa baala ɲinkon te.»

Kafo koavaa

⁹ «Paale niaa kandunin ciɛɔn niaan kovɔɔ len, la cɔm lɔ́ɔ́lan tan ŋɔmmɛw,

¹⁰ o lɔ́ɔ́la lan mɛɛlulan, la tosa kafo koavaa a le Mɛlɛka Hala niaa biiloo. O kon, la ke ndu ɲɛm niaa kialunin a yeemɛi niɛi-yon mɛɛ duaa ó vanin niaa dɔvɔɔ-o vanin yɛ.

¹¹ Mì la dɔwnun ɲaale Mɛlɛka Hala niaa o hɔl o fonda o hɛlinin le ndu pila cɔmnɔnndo-o niaa poaa niaa, cuavaa niaa laandua, buɛyaa niaa piaandua, buɛyaa niaa laandua, leviaa vanin icali o kobila niaalan nin-nda, mialaa vanin icali niaa o bɛngu coo-a, vííya a vanlaandua piaandaa ndaa vi-a, á vanin icali niaa tɛɛn-nda.

¹² La loonun maa cɛa niaa va Esipte ni, o kon mì la bii silalan-ndan.»

Kafo lakùùo

¹³ «Tuma niaa ciinin malun niaan luei o lakonda mi la cii mɔima niaan toosiaa-o, la tosa kafo lakùùo o palɛi ndii ŋɔmmɛw bɛngu.

¹⁴ La vanin o kɔlkɛndɔɔ nin le kafo kon tosaa niaa poaa niaa, cuavaa niaa laandua, buɛyaa niaa piaandua, buɛyaa niaa laandua, leviaa vanin o kobila niaalan nin-nda, mialaa vanin niaa o bɛngu coo-a, vííya a vanlaandua piaandaa ndaa vi ma va icali niaa tɛɛn-nda.

¹⁵ O palɛi ndii ŋɔmmɛw bɛngu, la bɛnda mì la tosa kafoo le Mɛlɛka Hala niaa biiloo o fonda ndu pila hɛlinin-ndo. Kani o dɔawnin niaa duaa o valta niaalan nin kpow a o ɲɛ-ɲɛ niaa vanin tosaa nin, haliko mi la va a kɔlkɛndɔɔ taw.

¹⁶ Bɛmbɛ leyáá o vɔsio nin, vanpiaandua kpow a bɛnda mà hun cuungian Mɛlɛka Hala niaa o hɔl o fonda o hɛlinin-ndo: telen kafo bulu toosian a lɛvɛn too, telen kafo koavaa a telen kafo lakùùo. Vana-vana hun bala fondo Mɛlɛka o hɔl te.

¹⁷ Vana-vana bɛnda mò yɔngu ɲɔɔn mɛɛ Mɛlɛka Hala niaa dɔawnin ndu duaa yɛ.»

Silalan a yamɛi kiolɔɔ o kɔɔ

¹⁸ «O kobila Mɛlɛka Hala niaa yɔngunin niaa lan kpow nin, la bɛnda mì la handu vanaa kialaa n'yamaa a vanaa sɛvaa o polama niaan coo. Nda vanin vannda yaman kiolɔɔ tɛɛn o sandei nin ni.

¹⁹ La tósà kafalan o yaman kiolɔɔ nin te. La hiyan vannda le, la cɛl ɲɛm nda vanin niaa yɔngoo le niaa luɛyɔɔ nin-ndon te. Kani ɲɛm mun suumiaa vanaa kɔlkalua ni mi n laasiaa di vanaa tɛɛmbuu isɔɔ le-a.

²⁰ Dɛnɛ sandaa kínɛí niaa bɛnda le nuwviaa ni, haliko mi la va yoomu, mi lɛŋnde Mɛlɛka Hala niaa co niaa yɔngu len le lo niaa o ba.»

La sooluu piɔmnda le

²¹ «La baŋ yɔm soolaa le, la tɔal yɔm oo yɔm soolaa o fonda-loamaa-lasálà niaa tengulnin Mɛlɛka Hala niaa-o ikɛi le.

²² La baŋ vɛlɛ powta sálàla nɛinun Mɛlɛka Hala niaa lan o niaa lo le.