Tɔŋ miingua 15 - BII BILA

O vɔsi ŋɔmmɛwndɔ oo vɔsi ŋɔmmɛwndɔ coo, kueelan la bɛnda le malnɔnndo

¹ «Vɔsi ŋɔmmɛwndɔ oo vɔsi ŋɔmmɛwndɔ, kueelan la bɛnda mì la malnun.

² Mɛɛ kueela lan la bɛnda le malnɔnndo yɛ co hoo ni: te vɔsi malaa lakueo tiiya pɛ, ma yonda le vanaa cua kueelan-nda hakio malɔɔ le Mɛlɛka, vana-vana pilaciee ndɔɔ cua kueo o ba, o bɛnda mò mal kuee kon, mò mal vana cua ndu kueo o ba-o, o co puapilɛ ndɔɔ-o haki a kuee kon. O bɛnda mò suuku lɛ ndu, te kon te mo bii lɛ ndu ɲɛ celen o ba le.

³ Le mialaa vanin niaa tɛɛn-nda yɛ, la nɔla mi la suuku nda ma salal niaa kueela nda cua niaa o ba lan. Kɛ la bɛnda mì la mal kueela Israɛlaa pilacieaa niaa cua niaa o ba lan.

⁴ Nduyɛ, o bɛnda mì vana ikɔɔ va niaa tɛɛn te, bau Mɛlɛka Hala niaa dɔawnin niaa duaa taw-taw o lɛŋnde o yɔngunin niaa kɛ́ɔ, mì la loo len-nden nin.

⁵ Kɛ fɔ mì la yaŋ fɔlɔn nilan o sɔɛi ndɔɛi, mì la bii tɔŋnda ndɔla ya co niaa tɛɛngullo hau lan, mì la kela lecoo.

⁶ Kani Mɛlɛka Hala niaa dɔawnin niaa duaa mɛɛ o yiilu niaa kpemaa yɛ. O kon la vanin vanaa-mangalaa-isɔaa celen taw kueelan yɔngoo, kɛ niaa la cuenin kuee le. Vanaa-mangalaa-isɔaa bɔɔ-bɔɔ a calnin niaa o ba bɛngu, kɛ niaa la celnin vana-vana o ba bɛngu le.

⁷ Te kuɛi kɔ bii pɛ pilaciee niaa o kobi niaa vanin icali nin-ndo nin o lɛŋnde Mɛlɛka Hala niaa yɔngunin niaa len nin, la yíílù ndu hɔlla mì la kɛɛ le ndu malaa le.

⁸ La bɛnda mì la mala ndu, mì la dɔnda ndu ɲɛm o nɔ makoo-on le kpekula ndɔlan toosiaa.

⁹ La mandan le yiyan vɔɔndo sɔlaa o kɔlta niaalan nin mì la dimi aa: ‹Vɔsi ŋɔmmɛwndɔɔ bendu lɛ le tiiyaa le, vɔsi vana mal vannda haki le kueelan-ndo›, yɔŋii niaa tofa puapilɛ niaa co o kuɛi nin-ndo tofa vɔɔndo, mì la tuŋ ndu ɲɛm niaan. Te la tosal ndu pɛ lende, mò koŋul o Mɛlɛka lo a niaa o sondo, mɛɛ hakio niaa tosa lende ni.

¹⁰ Lelan, la bɛnda mì la yɔngu ndu ɲɛ o nɔ makoo-o a kɔlkɛndɔɔ, o va a kɔl tambɛi le. Te la yɔngu pɛ ndu a kɔlkɛndɔɔ, Mɛlɛka Hala niaa dɔw niaa duaa o kpekula niaalan kpow nin a o ɲɛ-ɲɛ niaa vanin tosaa kpow nin.

¹¹ La sina pɛngu maa vanaa balahavɛiya co va lɔ́ɔ́-lɔ́ɔ̀ o lɛŋnde niaalen nin. Lelan, i sila niaa mì la va pilacieaa niaa malaa a ɲɛm niaan: vanaa ikɔɔa a vanaa bala fondoa co o lɛŋnde niaalen nin-nda pɛɛn.»

Hebreaa co o cɛlen nin-nda bɛnda mà sɔla baŋaa o vɔsi ŋɔmmɛwndɔɔ nin

¹² «Te puapilɛ niaa Hebreenɔɔ lendulun pɛ niaa o ba, o va vanapɔnɔ o va vanalanɔ, o bɛnda mò tosal niaa vallo le vɔsilan laŋɔmpum. O vɔsi ŋɔmmɛwndɔɔ nin, la yɔngu ndu hɔ́ɔ́yɛi ndɔɛi, la mal ndu o kɔɛnnun.

¹³ Kɛ la va pɛ ndu malɔɔ, la mal ndu kɔnndan bala fondo le.

¹⁴ La bɛnda mì la toolu ndu a ɲɛm Mɛlɛka Hala niaa dɔawnin niaa duaa-on, mì la yɔngu ndu cuinnda, saa, maalon a mɔiyan.

¹⁵ La loonun maa niaa pila bɛɛ cɛa niaa yɔŋnun o lɛŋnde Esipte len nin ni, kɛ mí Mɛlɛka Hala niaa baŋa niaa, mó soli niaa lon. Le kɔlɔ kon ya yɔngu niaa hau tɔŋndo ho ni.

¹⁶ Bɔɔle mi vana co nɔm o ba o cɛlen nin-ndo dimi aa: ‹I yeema lɛ mi faŋan nɔm o ba le›, kani o kaola nɔm a yungu nɔmndo, o connun o dɛnɛ kɛndɔɔ nin nɔm o ba.

¹⁷ O dimi pɛ lende, a cua yɔɛi bulia lani-e, a yambu ndu nilen o koŋndo, a buli ndu len. O kon, o siŋnun cɛ nɔmndo le fɛɛn a fɛɛn. Lende koni n bɛnda ma tosa a cɛ nɔm laandoo ni.

¹⁸ La tambu kɔl le cɛa co niaa o ba-a hɔ́ɔ́yɛi ndɛi yɔngoo le, kani o vɔsilan tan ŋɔmpum bɛngu, a lueilul niaa tɔnɔɔ hiovɔɔ tɔnɔ kɔntalanɔɔ lueilùl niaa-o bɛmbɛ lediin. Lelan, la yɔngu nda hɔ́ɔ́yɛi ndɛi, mì Mɛlɛka Hala niaa koma dɔw niaa duaa o ɲɛ-ɲɛ niaa vanin tosaa nin.»

Tɔŋndo a cɔlua piaandua tasea o kɔɔ

¹⁹ «La bɛnda mì la soli cɔlua piaandua tasea cɔlua niaa vanin komɔɔ-a kpow sálà o Mɛlɛka Hala niaa lo: o va naw, o va cuin, o va saa. La bɛnda mì la tosa vallo a navaa tovaa tasea navaa niaa vanin komɔɔ-a le, la kili vɛlɛ saa kóndóa tasea saa niaa vanin komɔɔ-a yiinde le.

²⁰ Vɔsi oo vɔsi, la bɛnda mì la va nda dioo Mɛlɛka Hala niaa o hɔl niaa yungula niaalan, o fonda Mɛlɛka hɛlinin-ndo.

²¹ Te cɔlua kan o pilɛ nɔ pɛ namtalen lekɔɔ, te o va pɛ cɔlu co tindaa-o, te kon te cɔlu sumɛiyo, te o nɔ pɛ namtale vɔɔnnde súú-súù o n'dial, la bɛnda mì la solul Mɛlɛka Hala niaa cɔlu vaa lende sálàá le.

²² La nɔla mi la de cɔlu vaa lende nɛɛ niaa vanin icali-a. Vana-vana nɔla mo de ndu, o va vana co o diandaa, o va vana co o nɔɔlɛi, nda kpow a nɔla ma de mɛɛ vana dia visin kial piaandoo a visin púvɔ́ɔ́ nuaa yɛ.

²³ Kɛ o va bɛɛ lende, la dia koovan te. La bɛnda mì la cuiŋi man lɛŋ maa mamɛn.»