Tɔŋ miingua 14 - BII BILA

Naamula kuunan Israɛlla a dɛnɛ biisio o kɔɔ lan

¹ «Cuavaa Mɛlɛka-a niaa co ni, Hala niaa pɛɛn. Lelan, la kiaŋnun vaasan lekɔɔ le, la sendin temboo o kpokpoo coo le dɛnɛ vana vílɛ́iyo le.

² Kani vanaa diandaa niaa co le Mɛlɛka Hala niaa ni. Mɛlɛka hɛli niaa o vanaa-mangalaa-isɔaa co o lɛŋnden kpow coo-a tɛɛn, haliko mi la va yungu sɔvɛɔ, ó siŋnun teengen le ndu Mɛlɛka-o.

³ Lelan, la dia ɲɛ-ɲɛ nɔɔlɛi le.

⁴ Visia niaa bɛnda mì la de-a co haa ni: nawvo, saa, cuinndo,

⁵ kial piaandoo, púvɔ́ɔ́, sengoo, cuin yondoo, vovaa, saa yondoo, bovaa,

⁶ a visi oo visi nɔ buuku piasaa mo kpukula.

⁷ Kɛ a pum a co buukula piasaalan koni nda nɔ ni, a kpukula le: la dia kan te. La dia vɛlɛ a kpukula kɛ a nɔ buukula piasaa le-a le. Lelan la dia ɲɔɔmɛɔ le, la dia saŋndo a damanndo le, kani nda kpukula kɛ a nɔ buuku piasaa le. La cɔ nda maa visia nɔɔlɛiya nda co ni.

⁸ Pewvo ndu, o nɔ buuku piasaa, kɛ o kpukula le. La cɔ ndu maa o nɔɔlɛiyo o co ni. La dia visin visia kan te, hali pilanndo la pilan nda a vílɛ́iya le.

⁹ O visia a suvaa co o peelo a o mɛmma ihɛllan nin-nda tɛɛn, la nɔla mì la de a nɔ pɛɛpɛɛlan a kɛkɛwlan-nda.

¹⁰ Kɛ la dia a nɔ lapɛɛpɛɛ a lakɛkɛw le-a le. La cɔ nda maa a nɔɔlɛiya nda co ni.

¹¹ La nɔla mì la de yovaa co a diandaa-a kpow.

¹² O yowva tɛɛn, a niaa bɛnda mì la de le-a co haa ni: kovɔ́ɔ̀, tɔmkumbaa, duàá,

¹³ siɔ́ɔ̀, peele-bɔ́lɔ́ɔ́ a yovaa vel ndu-a kpow,

¹⁴ basabasakoendea súúlan kpow,

¹⁵ soninkɔnɔɔ, huo, kòòndo a súúla ndɔla yɛ́-yɛ́lan kpow,

¹⁶ hu pollo, kpukulukpuo, hu bundɔɔ,

¹⁷ yow yɔɔyaa, kpáfúlaa, hɔ̀lɔ́hɔ̀lɔ́ɔ̀,

¹⁸ yow yɔɔyaa vilɛiyo, duàá-nawva a súúla ndalan kpow, yovaa n'kpoa a tɔnganndo.

¹⁹ La bɛnda mì la ce kambalaa nɔ bɔɔlan-nda maa a nɔɔlɛiya nda co ni, la dia nda le.

²⁰ Kɛ la nɔla mi la de kambalaa can coocoo ma va a diandaa-a.

²¹ La dia visi vi a ba ndɔ-o le. La nɔla mì la yɔngu ndu vanaa co calle niaa o bɛngu coo-a, mì nda de ndu, te kon te la nɔla mì la pisi cɔlu vílɛ́i vaa lende mialla o ba. Kani niaa niaa, yungu diandaa niaa co le Mɛlɛka Hala niaa ni. La yaw cuin cuaa o mɛɛma kala ndɔan nin te.»

Le o-tɔ́ndɔɔ solio o tɔlɔɔlan a o cɔlua nin

²² «Vɔsi oo vɔsi, la bɛnda mì la faŋa o-tɔ́ndɔɔ o ɲɛm niaa vàá o ciɛɔn niaan nin-ndon kpow coo.

²³ La bɛnda mì la de o-tɔ́ndɔ niaa Mɛlɛka o hɔl, o fonda o hɛlinin le diola ndɔlan vaa biilɔnndo-o nin. O va o-tɔ́ndɔ niaa solinin o malun niaa nin-ndo, o va o niaa solinin o mɔima niaama sɛnɛiyan nin-ndo, o va o niaa solinin o cuɛima niaan nin-ndo, o va cɔlua piaandua tasea cɔlua niaa vanin komɔɔ-a. O kon, la pɛɛku mɛɛ niaa bɛnda le siòòŋii Mɛlɛka Hala niaa nɔu le fɛɛn a fɛɛn yɛ.

²⁴ Lɔ́ɔ́ Mɛlɛka dɔawnin niaa duaa taw o ɲɛ-ɲɛ nin-ndo, te fonda vanndo vanin icali-o bandu pɛ taw a fonda Mɛlɛka Hala niaa hɛlinin le diola ndɔlan vaa biilɔnndo lon-ndo, te vana kon nɔla o-tɔ́ndɔ ndɔɔ vilio le kɔlan a ndu lon te,

²⁵ o pisi ndu a volion, o cua volin mun, o kɔɛ a mun o fonda Mɛlɛka Hala niaa hɛlinin kon-ndo.

²⁶ O tiiya pɛ lon, o pendu ɲɛ-ɲɛ o yeema a volin mun: o va naw, o va saa, o va cuin, o va mamɔi, o va ɲɛ-ɲɛ vana kol mì hɔlla hiŋ vana. Ɲɛ-ɲɛ vana kon yeema pɛ, o pendu, o de ndu te kon te o kol ndu Mɛlɛka Hala ndɔɔ o hɔl lon, o dɔwnun ɲaale a yungule ndɔlen.

²⁷ Kɛ la pɔɛɛnun le ɲɛm mun piɔvanndo niaa leviaa co o kobila niaalan nin-nda le. Kani nda sɔla kɛ́ lelɛŋ maa niaa le.

²⁸ Te vɔsila yaa la hiow pɛ, la soli o-tɔ́ndɔ co le vɔsi kon-ndo, la kɛsi ndu o kobila niaalan nin.

²⁹ O kon, leviaa nɔ yondo kɛ́ maa niaa le-a, mialaa vanin icali niaa o bɛngu coo-a, vííya a vanlaandua piaandaa ndaa vi ma va icali o kobila niaalan nin-nda hin, a hun dio ɲɛm mun a pim ca. La tosa pɛ lende, Mɛlɛka Hala niaa dɔawnin niaa duaa o valta niaa vanin tosaa lan kpow nin.»