Tɔŋ miingua 12 - BII BILA

TƆŊNDA MƐLƐKA LAN (12—26)

¹ «La tuei-yɔ tɔŋndan a silala niaa bɛnda le biyɔɔ a le kelaa coo le fɛɛn a fɛɛn o lɛŋnde Mɛlɛka, Hala fuɲaa niaa mamaa yɔngu niaa le hiɔlɔɔ len nin-ndan.»

Cɛi-Diandaa vana piɛi Hala nin-ndo

² «La bɛnda mì la tɛɛmbuu sooluula vanaa niaa co lakɔ tovɔɔ-a. O va o pembun bɛndu coo, o va o pembun pɔmbɔ coo, o va o yɔm puiyaa bɛngu.

³ La bɛnda mì la puusiaa máánnda ndalan, mì la pesi powta ndala sálàlan, mì la lom sungbuma ndama soolan, mì la koombiaa piɔmaa ndaa, mì la ɲumi diola ndalan a tɔ́ɔ́ ndaa o tàndà kon nin.

⁴ Le Mɛlɛka Hala niaa biiloo ndu, la bɛnda mì la tosa maa nda le.

⁵ Mɛlɛka hɛlinin fondaa o tàndàla polama niaan ma vanin icali nin-ndan tɛɛn, le diola ndɔlan vaa biilɔnndo lon a le calta ndɔlan kɛsio lon, lon daama niaa vanin kɔlan ndu piɛiyo ni.

⁶ O fonda kon niaa vanin kɔlan a sálàla loamaala niaalan a á sálàla niaalan tɔ̀lan kpow ni. Lon niaa vanin kɔlan a o-tɔ́ndɔla niaalan a á cuungiaala niaala niaa vanin solio o valta niaalan nin-ndan ni. Lon koni niaa vanin kɔlan a ɲɛm niaa baa yoolen o Mɛlɛka-on le yoole len timbio ni, lon niaa vanin vɛlɛ ɲɛm niaa vanin yɔngoo a yeemɛi niɛi-yon a cɔlua piaandua tasea cɔlua niaa vanin komɔɔ-a kpow yɔɔ ni.

⁷ O fonda kon niaa vanin ɲɛdiaa dioo Mɛlɛka Hala niaa o hɔl ni, lon niaa vanin a kɔlkɛndɛ bɛndoo niaa yungula niaalan le valta niaala Mɛlɛka Hala niaa vanin duaa dɔvɔɔ lan ni.

⁸ Lelan, la bɛnda lɛ mi la tosa dɛnndan mɛɛ naa n co lan hau tosaa nanu nuaa yɛ le. Kani hau nanu, vana-vana co ɲɛ hɛnan ndu-o tosaa mɛɛ o yeema yɛ.

⁹ Kani háá hau, la tiiya vɔ nɛɛ pɛngiaa a o kɛ́ Mɛlɛka Hala niaa ke niaa-o nin te.

¹⁰ Kɛ lɔ́ɔ́ niaa taŋnin peo Yurdɛn mì la kɔ cal o lɛŋnde Mɛlɛka Hala niaa yɔngu niaa kɛ́ɔ len nin-ndo, Mɛlɛka yɔngunin niaa pɛngio a yaamɔaa niaa balunin niaa-a kpow, haliko mi la vannun icali o kɔlɲuloo nin o lɛŋnde len nin.

¹¹ O fonda Mɛlɛka Hala niaa hɛlinin kon le diola ndɔlan vaa biilɔnndo lenin-ndo niaa vanin hunɔɔ a ɲɛm ya dimul niaa le yɔngoo-on ni: sálàla loamaala niaalan, sálàla niaala celenndan, o-tɔ́ndɔla niaalan, ɲɛm niaa vanin yɔngoo a yeemɛi-yon a ɲɛm niaa vanin hunɔɔ le yoole niaa baa o Mɛlɛka lo len timbio-on.

¹² La vanin a kɔlkɛndɔɔ Mɛlɛka Hala niaa o hɔl: niaa pila, poaa niaa, cuavaa niaa laandua, buɛyaa niaa piaandua, buɛyaa niaa laandua a leviaa vanin o kobila niaalan nin-nda. Kani leviaa kan nda nɔ ɲɛ a kɛ́ lelɛŋ maa niaa le.

¹³ La mandan le sálàla loamaalan solio o fonda oo fonda niaa vanin komallo.

¹⁴ O fonda Mɛlɛka pila hɛlinin o tàndàla polama niaan tɛɛn-ndo kínɛí niaa bɛnda le sálàla loamaala niaalan solio ni, lon kínɛí niaa bɛnda le ɲɛ ya dimul niaa le tosaa-o tosaa ni.

¹⁵ Kɛ o va bɛɛ lende, la nɔla mì la dii cɔlua mɛɛ ɲɔɔ hɛnan niaa yɛ, mi la de visin mun o kobila niaalan kpow nin mɛɛ Mɛlɛka Hala niaa vanin niaa duaa dɔvɔɔ yɛ. Vanndo va o diandaa, o va o diandaa le, o nɔla mo de visin mun mɛɛ vana dia visin púvɔ́ɔ́ a visin kial piaandoo yɛ.

¹⁶ Koovan kínɛí niaa bɛnda mì la de le ni. La bɛnda mì la cuiŋi man lɛŋ maa mamɛn.

¹⁷ Kɛ nduyɛ, la bɛnda mì la de o-tɔ́ndɔ niaa vanin solio o malun niaa nin, o mɔima niaama sɛnɛiyan nin a o cuɛima niaan nin-ndo o kobila niaalan nin te. Ɲɛm niaa bɛnda vɛlɛ mi la de o kobila niaalan nin te-on co mun ni: cɔlua piaandua tasea cɔlua niaa vanin komɔɔ-a, ɲɛm niaa baanin yoolen o Mɛlɛka lo le ndu mun yɔngoo-on, ɲɛm niaa tuunin le yɔngoo a yeemɛi-yon a ɲɛm niaa vanin faŋaa o kɔmnde valta niaalan coo le Mɛlɛka yɔngoo-on.

¹⁸ Mɛlɛka Hala niaa o hɔl, o fonda ndu pila hɛlinin-ndo niaa bɛnda le ɲɛla lan dioo ni. Niaa pila, poaa niaa, cuavaa niaa laandua, buɛyaa niaa piaandua, buɛyaa niaa laandua a leviaa vanin o kobila niaalan nin-nda bɛnda le ɲɛla lan dioo ni. O kon, la dɔwnun ɲaale Mɛlɛka Hala niaa o hɔl le kɔmnde niaa vanin sɔlaa o valta niaalan nin-nden.

¹⁹ Mɛ̀ɛ́-mɛ̀ɛ́ niaa viow o lɛŋnde niaale len nin, la caa taw, yɔŋii niaa pɔɛɛnun leviia.

²⁰ Te Mɛlɛka Hala niaa cɔɔlu pɛ lɛŋnde niaalen kuundiaa mɛɛ o yiilu niaa kpemaa yɛ, te hiluan ma bii pɛ niaa le vision dioo mì la dimi aa: ‹N yeema mi n de vision›, la nɔla mì la de mun mɛɛ ɲɔɔ hɛnannin niaa yɛ.

²¹ Te fonda Mɛlɛka Hala niaa hɛlinin le diola ndɔlan vaa biilɔnndo lenin-ndo bandu pɛ a nɛɛ niaa vanin icali-a, la nɔla mì la dii cɔlua niaa bɛndua a à pɔmbɔa Mɛlɛka kenin niaa-a, mì la tosa mɛɛ ya dimul niaa le tosaa yɛ. O kon, la nɔla mi la de ɲɛm hɛnannin niaa-on kpow o fondala niaa vanin icali lan.

²² Kɛ la bɛnda mì la de ɲɛm mun mɛɛ vana dia visin púvɔ́ɔ́ a visin kial piaandoo yɛ. Vanaa co a diandaa-a a vanaa co a nɔɔlɛiya-a nɔla ma de ɲɛm mun.

²³ Kɛ nduyɛ, la mandan le vision dioo a koovan, kani koovan ma co yoomu ɲɛ yoomaa ni. La bɛnda mì la de yoomoo a vision te.

²⁴ Lelan la dia koovan te, la bɛnda mì la cuiŋi man lɛŋ maa mamɛn.

²⁵ La dia man te few, haliko mi la sɔla dɛnɛ kɛndɔɔ le niaa pila a le hɔ́aa niaa koma vanin niaa kɔɔli fɛɛn-fɛɛn-nda. Kani te la di man te, mɛɛ la tosa dɛnɛ sandaa Mɛlɛka o hɔl.

²⁶ Kɛ la bɛnda mì la cua cɔlua niaa tuu le sálàá solio-a, a co cɔlua niaa kpeekpeiya-a, a cɔlua niaa baa yoolen o Mɛlɛka lo le ndu yɔngoo-a, mì la hin a nda o fonda Mɛlɛka hɛlinin-ndo.

²⁷ La bɛnda mì la soli sálàla niaala loamaalan, mì la heelu vision a koovan o fonda-loamaa-lasálà Mɛlɛka Hala niaa coo. Kooma cɔlua sálàá niaa ma bɛnda mì ma talan o fonda-loamaa-lasálà Mɛlɛka Hala niaa coo, vision mún, mì la de mun.

²⁸ La manda tɔŋnda ya co niaa hau yɔngoo lan kpow, mì la kela lecoo. O kon, la sɔlanin dɛnɛ kɛndɔɔ le fɛɛn a fɛɛn, kandɔɔ niaa pila kɔ bii a hɔ́aa niaa siɔdii laci. Kani te la manda lan pɛ, mɛɛ dɛnɛ kɛndɔɔ a dɛnɛ sandaa niaa tosa kon Mɛlɛka Hala niaa o hɔl ni.»

La vial yungoo Kanaan a piɔmnda sooloo le

²⁹ «Lɔ́ɔ́ Mɛlɛka Hala niaa toawnin vanaa-mangalaa-isɔaa niaa co kuello le nda lɛŋnden hiɔlɔɔ o ba-a-o, lɔ́ɔ́ niaa toawnin nda mì la koma cal o lɛŋnde ndalen coo-o,

³⁰ lɔ́ɔ́ nda cuunin itambu lende niaa laci-o, fɔ mi la mandan taw, yɔŋii niaa haw o yaŋɔɔlen mì la kela maa nda, mì la holnun halaa nda co sooloo-a mì la dimi aa: ‹Vɛɛ nɛ vannda ha ndáà sooluu yɛ tombun ndan? Naa bɛɛ n yeema mì n tosa maa nda.›

³¹ La caa dɛ! La tósà lende a Mɛlɛka Hala niaa le. Kani vanaa-mangalaa-isɔaa kan a va dɛnnda nɔɔlɛilan a ɲɛ Mɛlɛka yeema loo tosaa a halaa ndaa. A va bɛɛ hɔ́aa ndaa lomɔɔ le halaa ndaa kan sálàlan solullo.