Tɔŋ miingua 10 - BII BILA

Mɛlɛka mal Israɛlla haki le naw téndé ndáà cɔw-vo

¹ «O telen kon, mí Mɛlɛka dimul-la aa: ‹Siɔl powta yɛ́ndɛ́lan tan tiɔn maa lataselan, ma sɛl vɛlɛ kesu yɔmndo, ma hel nɛɛ ya co o pembei coo-a.

² I sɛvanin sɔɔn va n'sɛvaa o powta yɛ́ndɛ́la tasela n pesi lan coo-on o powta yɛ́ndɛ́la n sialnin-ndan coo. I cii pɛ sɛva, a kɛsi powta yɛ́ndɛ́la lan o kesu yɔm kon nin.›

³ O kon, mí sial kesoo a pɛngɛn akasia, mí sial powta yɛ́ndɛ́lan maa lataselan. Mí hel o pembei coo a powta yɛ́ndɛ́la tiɔnnda lan o ba.

⁴ Mí Mɛlɛka sɛva tɔŋnda tɔ́lan o powta yɛ́ndɛ́la yáà kɔɛ o ba lan coo mɛɛ ndóò sɛva lan o powta yɛ́ndɛ́la taselan coo yɛ. Tɔŋnda ndóò yɔngu o pembei coo o yinnden tɛɛn paale niaa va a cuungiannda ndu o hɔl-ten-ndan pɛɛn. Mó cua lan, mó yɔngu ya.

⁵ Mí mulin, mí toal pembei. Mí kɔ kɛsi powta yɛ́ndɛ́la lan o kesu yɔm yáà sɛl-lo nin, mí la va lakɛsiaa lon mɛɛ Mɛlɛka pila dimi yɛ.

⁶ Mí Israɛlla faŋan o soonnda kólaalan Beerɔt-Bene-Yaakan, má kɔa Mosera. Lon Aarɔn vi ni, má kumbu ndu vɛlɛ lon. Mí Eleasar po ndɔ cua fonda ndɔɔ, mó siŋnun bolle vanaa-solia-lasálàá.

⁷ Mɛɛ nda faŋan ndon, má kɔa Kudkoda, má faŋan Kudkoda, má kɔa Yɔtbata, nɛɛ peela pɔmbɔlan la co taw-va.

⁸ O telen kon Mɛlɛka hɛli polale Levii len le kesu kpema Mɛlɛka-o cuaa a le simndan Mɛlɛka o hɔl ni, le baala ndɔɔ tosaa a le vannda duaa dɔvɔɔ o diola Mɛlɛka lan. Lende nda co yɛ tosaa háá paalen nden ni.

⁹ Le sabu kon, polale Levii len le sɔla kɛ́ lelɛŋ maa puapilɛa ndaa tɔ̀a le. Mɛlɛka Hala niaa co kɛ́ ndaa ni, maa mɛɛ ndu pila yiilu nda kpemaa yɛ.

¹⁰ Mí lo o pembei coo lon háá palɛi belehiɔɔlu a malɔ belehiɔɔlu maa o tasendɔ. O kon vɛlɛ, mí Mɛlɛka muli piɛile nilen muli kɛndɛ, o diw niaa le.

¹¹ Mó dimul-la aa: ‹Cɔn ma kɔ sim vannda ha laci le kɔlan lɛŋnde ya yiilu fuɲaa ndaa mamaa kpemaa le nda keo len hiɔlɔɔ.›»

Tɔŋndo le kaolaa a le sɔɛi biyɔɔ

¹² «Sisa, ɲɛ Mɛlɛka yeema mi niaa Israɛlla tosa-o co hoo ni: siòòŋii ndɔɛi nɔu, kelaa o nɛila o cɔm niaa lan coo, kaolaa ndu, vallo ndu tosallo a kɔlta niaalan kpow a á yoomu niaa kpow.

¹³ O yeema mì la bii tɔŋnda ndɔlan a silala ndɔla ya co niaa hau tɛɛngullo lan, haliko mi la sɔla dɛnɛ kɛndɔɔ.

¹⁴ La tofa vɔ, Mɛlɛka Hala niaa nɔ halataala, halataala co lenin di-di-o, lɛŋnden a ɲɛm co o lɛŋnden coo-on kpow ni.

¹⁵ Kɛ nduyɛ, fuɲaa niaa mamaa daama Mɛlɛka ndóò holnun ni, nda ndóò kaola ni, niaa cuavaa ndaa imamaa kínɛí o hɛli o vanaa-mangalaa-isɔɔa kpow tɛɛn maa mɛɛ niaa co ndi hau cɔu yɛ ni.

¹⁶ La dìí kɔlta niaalan tooma, la simùl lɛ Mɛlɛka le.

¹⁷ Kani Mɛlɛka Hala niaa, ndu co Hala hiow halaa kpow-vo ni, ndu co Maalii hiow maaliia-o ni, ndu co Hala bɛndoo ni, Hala kpaayaa, a kpúlúnkùmaa o co ni. O híyàn vana le, vana nɔla mà luɛi ndu nin a ɲɛ-sɔlaa le.

¹⁸ Ndu tosal vííyo a vanalanɔ pɔnɔ ndɔ vi-o dɛnɛ sandaa ni. Ndu kaola miallo mò yɔngu ndu ɲɛdiaa a volɔɔla cuɛinanndan ni.

¹⁹ Niaa bɛɛ, la bɛnda mì la kaola mialaa vanin icali niaa tɛɛn-nda, kani mialla niaa bɛɛ yɔŋnun o lɛŋnde Esipte len nin ni.

²⁰ La bɛnda mì la nɔ siòòŋii Mɛlɛka Hala niaa, ndu niaa bɛnda le biiloo ni, ndu kínɛí niaa bɛnda le holnɔndo ni, o diola ndɔlan daama niaa bɛnda le mɛnanndo ni.

²¹ Ndu co vana niaa bɛnda le lisaa-o ni, ndu co Hala niaa ni. Ndu tosa kaamaalan a sɔɔn kpúlúnkùman bɛndun niaa ce-on le niaa ni.

²² Fuɲaa niaa mamaa kɔɛ lɔ́ɔ́ kon Esipte-a, à va n'van belaŋɔmmɛw daama, kɛ sisa Mɛlɛka Hala niaa vangala niaa mí la kui sɛ́lɛ́ bɛndoo maa loeon o halataala.»