Daniɛl 4 - BII BILA

Lɔma diinndɔma Nebukanɛsar sɔl-lan

¹ «Ya Nebukanɛsar, i vannun icali yili o ya lo cɛinin, i va a kɔlkɛndɔɔ o cɛi ni lemasaa nin.

² Icɔllo pum, mí sɔl lɔan. Mí siòònde bii ya taw, kani yiyannda luɛi ya o kɔl o kpele nuu coo lan a vunduma ya ce o yiyan nuu nin-ndan máà vueinun ya taw.

³ Mí yɔngu diomndo le ya vanaa kɔlkalua o lɛŋnde Babilɔn-nden nin kpow cuuo, haliko mi ndáà cɔm ya kɔlɔ lɔma yáà sɔl man-ndan.

⁴ Mɛɛ vanaa viamaa yavaa, vanaa soaa a loeon o kɔɔ-a, mandea a vanaa mangalaa súúlan kpow a tiiya o ya lo, mí cɔm nda lɔma ya sɔl-lan, kɛ a nɔla ya kɔlɔ ndɔɔ cɔmndo le.

⁵ O mɛɛlulan, mí Daniɛl nda ke diolan aa Bɛlsasar mɛɛ diola hala nuu pilɔɔ la co yɛ-o bɛɛ tiiya o ya lo. Daniɛl kon pɛɛn, o nɔ kɔlkalu halaa diandaa nin-ndo. Mí cɔm ndu lɔma ya sɔl-lan.

⁶ Mí dimul ndu aa: ‹Bɛlsasar, bolle vanaa mangalaa, i sina maa a nɔ kɔlkalu halaa diandaa nin, nduyɛ dɛnɛ viannan súú-súù kindu a nɔm te. Tofa vɔ lɔma ya sɔl-lan, cɔm ya kɔlɔ ndɔɔ.

⁷ I va o kpele nuu coo, mí ca vunduan man: Yɔm bɛndu-bɛndoo va isisi o lɛŋnden tɛɛn.

⁸ Mí yɔm kon hindu taw, mó sɔla kpaayaa, mí bolle ndɔlen le tiiya háá o halataala. Nɛɛ-nɛɛ vanáà sim pɛ o ceendo coo, áà ce ndu.

⁹ Pei ndɔɛi ndíì naŋ o tofaa, ndóò kom kɔmnden pila. Ɲɛ-ɲɛ ka va baloo dɔwnɔnndo a yɔm kon. Visia va hunɔɔ pɛngio o vunduma ndɔan bɛngu, yowva va vɛɛnde tangullo o lɛvun ndɔn coo, ɲɛ-ɲɛ yoomaa va baloo dɔwnɔnndo a yɔm kon.

¹⁰ I va vɔ ihini, mí ca mɛlɛkanɔ cumulaa, ɲɛ yoomaa diandaa va tolɔɔ fulaa o halataala-o pɛɛn.

¹¹ Mó deŋi coocoo aa: «La kioŋ yɔmndo ho! La kilikili lɛvun ndɔn! La keenduu pei ndɔɛi kpow! La sɛŋi kulun ndɔn yaa-yaa! Mì visia piɔl a kiltan, mà faŋan lebɛngu, mì yowva mɛi vɛɛnde, mà ɲaanun!

¹² Kɛ mì la mɛi ciiye a puundon yondoo nin, mì la yii ndi a yɔlɔn n'cilinndon a á yɔlɔn n'daɲan. Màá i liva o kɛmndan nin, mì i de billo maa visi!

¹³ Kɔl ivanacieeyaa faŋannin ndu nin, mì kɔl ivisiyaa luɛi ndu nin, mò lo lende háá vɔsilan laŋɔmmɛw!

¹⁴ Sɔɛi fula mɛlɛkaa Hala-a o sondo-e i co hee ni, ɲaa yoomaa diandaa pɛɛn, haliko mi vanndacieea kpow a sina maa Ó-Hiow-Ɲɔɔn-Kpow-vo masalen o ceendo coo le co o labɛngunin ni. Vana o yeema pɛ le masalen yɔngoo, o yɔngu ndu. O tiwba mò heelu vana hiow dɔɔnanndo vannda o hɔl-lo.»

¹⁵ «Ya masaa Nebukanɛsar, lɔma ya sɔl-lan ma co man ni. Nɔm, Bɛlsasar, cɔm ya kɔlɔ ndɔɔ, kani vana pilɛ bɛɛ nɔla ya kɔlɔ ndɔɔ cɔmndo o vanaa kɔlkalua co o masale nilen nin-nda tɛɛn te. Kɛ nɔm, a nɔla ma tɛɛsial-la man, kani a nɔ kɔl halaa diandaa nin.»

Daniɛl cɔm masaa kɔlɔ lɔma o sɔl-lan

¹⁶ Mí Daniɛl, o nda ke diolan aa Bɛlsasar-o dɔawnun kɔndɔfili o telen pum bɛngu, mí siòònde bii ndu. Kɛ mí masaa dimul ndu aa: «Siòòŋii bii nɔm le vundulen-nden a le kɔlɔ ndɔɔ le, Bɛlsasar.» Mí Bɛlsasar mulul ndu aa: «Àá masaa! Lɔma n sɔl man-ndan maa bɛnda mì maa va le yaamɔaa nɔmnda, mì kɔlɔ ndɔɔ ndóò va le vanaa nɔ nɛyɔn nɔmndo-a.

¹⁷ Yɔm bɛndu-bɛndu n ce hoo mó nɔ kpaayaa taw, mó tiiya bandei háá o halataala-o, o vanáà sim kon nɛɛ-nɛɛ ka o ceendo coo ma ce ndu-o,

¹⁸ o nɔ kon pei kɛndɛi a kullon taw-vo, yɔm yɔngu kon ɲɛ-ɲɛ yoomaa ɲɛdiaa-o, ò visia yondoa pɛngi kon o vunduma ndɔan bɛngu, mì yowva coocoo tangul vɛɛnde o lɛvun ndɔn coo-o,

¹⁹ nɔm pila ni masaa! A siŋnun vana bɛndoo a vana kpaayaa. Tɔ́ɔ́ nɔmndo tiiya háá o halataala, vanabɛnduyɛi nɔmnde tiiya háá nɛɛ lɛŋnden le mɛɛlu-a.

²⁰ Má ca mɛlɛkanɔɔ, ɲɛ yoomaa diandaa va kon tolɔɔ fulaa o halataala-o, mó dimi aa: ‹La kioŋ yɔmndo ho! La kilikili ndu! Kɛ mì la mɛi ciiye a puundon yondoo nin, mì la yii ndi a yɔlɔn n'cilinndon a á yɔlɔn n'daɲan. Mì i liva o kɛmndan nin, mì i de billo maa visi, mì i lo lende háá vɔsilan tan ŋɔmmɛw.›

²¹ Òó masaa! Kɔlɔ ndɔɔ co hoo ni: yamɛi Ó-Hiow-Ɲɔɔn-Kpow-vo kilu nɔm-nde co hee ni:

²² A toawnunnin ma faŋan vanndacieea tɛɛn. Nɛɛ nɔmaa calaa vanin yondoo nin niaa visia latulu ni. A yɔngunin nɔm billo le dioo maa naw. A liwviaanin nɔm yɔ́-yɔ́ o kɛmndan nin, ma lo lende háá vɔsilan laŋɔmmɛw, háá ma sina maa Ó-Hiow-Ɲɔɔn-Kpow-vo nɔ masalen o ceendo coo o labɛngunin ni. Nduyɛ vana hɛnan ndu-o, ndu o sííngùù masaa ni.

²³ Diomndo ho yɛ aa: «La mɛi ciiye a puundun ndɔn!» Kɔlɔ ndɔɔ co hoo ni: Masale nɔmnden le muungunin nɔm o ba lɔ́ɔ́ n sinanin maa Ó-Hiow-Ɲɔɔn-Kpow-vo nɔ halataala o ba ni-o

²⁴ Lelan, yandi masaa, yaŋ nilan o sila nuu. Mulul hakila nɔmndan kɔɔ, mal yɔŋ vɔɔndo, ma tosa dɛnɛ sandaa a toɲaa. Mal kɔlvesɛiyo, ma tuinun vanaa co o sangaa nin-nda iɲíí, haliko ma viow o dɛnɛ kɛndɔɔ nin.»

Lɔma sɔlaan ma peelun

²⁵ Mí sɔɔn mun kpow n peelun masaa Nebukanɛsar coo.

²⁶ Kani paangon tɔ́ a n'miun hiovɔɔ, o va balɔɔ o cɛi ndɔ bɛndu lemasaa coo Babilɔn,

²⁷ mó deŋi coocoo aa: «Babilɔn co hoo ni! Kobi bɛndu ya tangul le vaa kobi ni lemasaa-o, i tangul ndu a kpaaya ni bɛndoo, le biilu ni lemasaa cɔmndo.»

²⁸ O va sɔɔn mun dimio kínɛí, mí diomndo pum soaa o ndu lo fulaa o halataala aa: «Nɔm masaa Nebukanɛsar sɔɛi he dimulun ni. Masalen le hɛlun nɔm fɔ́!

²⁹ A co townɔn ma faŋan vanndacieea tɛɛn. Nɛɛ nɔmaa calaa vanin yondoo nin niaa visia latulu ni. A yɔngunin nɔm billo le dioo maa naw. Ma lo lende háá vɔsilan tan ŋɔmmɛw, háá ma sina maa Ó-Hiow-Ɲɔɔn-Kpow-vo masalen o ceendo coo le co o labɛngunin ni. Nduyɛ, vana hɛnan ndu-o, ndu o sííngùù masaa ni.»

³⁰ O foofo kon, mí sɔɛi ken i peelun dɔ́ɔ́ Nebukanɛsar coo. Mó toawnun mó faŋan vanndacieea tɛɛn, mó dia billo maa naw, mó liva yɔ́-yɔ́ o kɛmndan nin, háá mi yiiŋii ndɔɛi yimbu maa bɔɔla kovɛ. Mí yɛmbɛn ndɔn bandu maa yɛmbɛn yow.

Siongɔɔ Nebukanɛsar-o

³¹ O vɔsila ŋɔmmɛwla Mɛlɛka kelu lan-ndan mɛɛlulan, mí ya Nebukanɛsar heelu hɔlla o halataala, mí kɔlkalu ivanacieeyaa muungu ya nin. O kon, mí candu Ó-Hiow-Ɲɔɔn-Kpow-vo, mí lisa Vana-Co-Yoomu le fɛɛn a fɛɛn-ndo, mí sangala ndu. Ò vanabɛnduyɛi ndɔɛi nɔ lamɛɛlu loo, ò masale ndɔlen le co le fɛɛn a fɛɛn-ndo.

³² Vanndacieea o ceendo coo kpow a co a bɔɔ ndu o hɔl te, mɛɛ hɛnan ndɔɔ co yɛ o tosa a mɛlɛkaa cɔwva o halataala a á vanndacieea o ceendo coo ni. Vana-vana nɔla baala ndɔɔ kuuna le, o co vɔ bɛɛ le ndu ɲunaale aa: «Vɛ tosaa nuaa?»

³³ O telen kon bɛngu, mí kɔlkalu ivanacieeyaa muungu ya nin. Le bɛɛle masale nilen, mí biiloo a naŋɔɔ muungu ya o ba. Mí vanaa nia silaa a vanaa bɛndua hun ya kɔɔli. Má mingi ya kɛsi o masale nilen coo. Mí tɔ́ɔ́ nuu a vanabɛnduyɛi nii cɔɔlu kui taw hiovɔɔ maa paandu.

³⁴ Lelan sisa, ya Nebukanɛsar, i candu Masa kpeekpei co o halataala-o. I lisa ndu, i co ndu biiloo. Dɛnnda ndɔlan kpow, dɛnnda toɲalan la co ni. Nɛila ndɔlan kpow, nɛila sandaalan la co ni. O tiwba mò tuisi vanaa co kelaa o kuundianndo nin-nda siɛmbulan.»