Daniɛl 3 - BII BILA

Tɔŋndo le piɔm n'sianio sooloo

¹ Mí masaa Nebukanɛsar cɔaw piɔmndo a sianion bandei dunndo belaŋɔmpum, buo dunndo leŋɔmpum. Mó simi ndu o dɛɛlaa Dura nin, o tàndá Babilɔn-ndo nin.

² Mó viam kiilaa le kɔlan masaa latàndàá, vanaa co masa bɛndoo ikɛi-ya, vanaa kialaa n'yamaa, masaa n'bungaa, vanaa mandaa bolofaa a vanaa bɛndua kpow veeloo le kɔlan piɔm masaa Nebukanɛsar cɔw kon-ndo kandɔɔ sooloo.

³ Mí masaa latàndàá, vanaa va masa bɛndoo ikɛi-ya, vanaa kialaa n'yamaa, masaa n'bungaa, vanaa mandaa bolofaa a vanaa bɛndua kpow cuungian, má kɔ sim piɔm kon o hɔl le ndu kandɔɔ sooloo.

⁴ Mí vana yondaa heelu diomndo kpélén aa: «Niaa vanaa-mangalaa-isɔɔa a yungulan kpow, a niaa vanaa dimi sɔɔn mangalan yɛ́-yɛ́ɔn o lɛŋnden coo-a, la yaŋ nilan o sɔɛi masaa dimi-e.

⁵ Te la tuei pɛ buloo, sɛ̀ŋnden, bangaa, koelelen, bondomaa, boosei a ɲɛm-caan súú-súù ka diom, la tundun piɔm n'siani masaa Nebukanɛsar cɔw-vo o labɛngunin, la sooluu ndu!

⁶ Vana-vana tundun mò sooluu piɔm kon te, a co vana kon viovɔɔ fɔ́ɔ́fɔ̀ o tóndó bɛndu leyinndo nin.»

⁷ Le hee, mɛɛ vannda tuei buloo, sɛ̀ŋnden, bangaa, bondomaa, boosei a ɲɛm-caan súú-súù ka diom, má tundun, má sooluu piɔm n'siani masaa cɔw kon-ndo.

Caaŋaa Daniɛl-la kɛɛ le piɔmndo sooloo

⁸ O telen pilɛ kon bɛngu, mí Babilɔnnda pum kɔ lɔalu Yuifia o masaa Nebukanɛsar lo,

⁹ má dimul ndu aa: «Òó masaa, màá viow yoomu fɔ́!

¹⁰ Nɔm masaa pila dimi ni maa vana-vana tuei pɛ buloo, sɛ̀ŋnden, bangaa, koelelen, bondomaa, boosei a ɲɛm-caan súú-súù ka diom, o bɛnda mò tundun mo sooluu piɔm n'sianio.

¹¹ Nduyɛ vana-vana kɛɛ pɛ le tundɔnndo, mò kɛɛ le piɔmndo sooloo, a bɛnda mà viow ndu o tóndó bɛndu leyinndo nin.

¹² Kɛ tofa vɔ! Yuifia n siinguu simlacia o tàndá Babilɔn-ndo nin-nda: Sadrak, Mesak a Abɛd-Neko, a ci sɔɛi nɔmnde ɲɛ-ɲɛ le. Òó masaa! À kɛɛ le halaa nɔmnda a piɔm n'siani n cɔw-vo sooloo.»

¹³ O kon, mí masaa tuulu kɔl taw-taw, mó viam vannda le hunɔɔ a Sadrak, Mesak a Abɛd-Neko. Má hun a nda o ndu lo.

¹⁴ Mó ɲuna nda aa: «Niaa sei! Sadrak, Mesak, Abɛd-Neko, ì co toɲa maa la tosal halaa nia baalaa le? Maa la sooluu vɛlɛ piɔm n'siani ya cɔw-vo le?

¹⁵ Nihau, la bɛɛndian! Te la tuei pɛ buloo, sɛ̀ŋnden, bangaa, koelelen, bondomaa, boosei a ɲɛm-caan súú-súù ka diom, la tundun, la sooluu piɔm ya cɔw-vo. Te la sooluu ndu le, a co niaa viovɔɔ o tóndó bɛndu leyinndo nin sisa. Nduyɛ, hala kuɛɛ baŋa yɛnin niaa ya o ba nɛ?»

¹⁶ Mí Sadrak, Mesak a Abɛd-Neko a mulul ndu aa: «O co sɔɛi naa n kɔɔsa coo le co hee le.

¹⁷ Òó masaa! Mɛɛ te lende ni, Hala naa naa n co baalaa tosallo-o tiwba mò baŋa naa. O solinin naa o tóndó bɛndu leyinndo nin, mò baŋa naa nɔm o ba.

¹⁸ Kɛ hali mò tosa lende le masaa, sina maa n tosalnin halaa nɔmnda baalaa le. Nduyɛ, n sooluunin vɛlɛ piɔm n'siani n cɔw-vo le.»

¹⁹ O kon, mí masaa Nebukanɛsar tuulu kɔl taw-taw, háá mí hɔlaa ndɔa diw vaŋ. Mí mɔnɛi bii ndu a Sadrak, Mesak a Abɛd-Neko. Mó viam vannda le tóndó bɛndoo tuuloo bɛmbɛ leŋɔmmɛw hiovɔɔ maa paandu.

^20-22 Mɛɛ masaa dimi lende, má tuulu tóndó bɛndu kon kpɛi-kpɛi. O kon kɔɔli, mó dimul langbaa kalaa nɔ kpaayaa o kunda vanaa ndɔa cɔwva nin-nda le Sadrak, Mesak a Abɛd-Neko yiiyo mà ŋɔw nda peŋ, mà viow nda o tóndó bɛndu leyinndo nin. Lelan, má yii nda peŋ a domala ndala bɛndulan, lɛmbɛla ndalan, mɔsilta ndalan a volɔɔla tɔ̀la va nda lekɔɔ lan kpow, má viaw nda o tóndó bɛndu leyin kon nin. O kon, mí vanaa viow Sadrak, Mesak a Abɛd-Neko o yin-nda ŋɔa a yelenyelen va fulaa o yin-ndo, má vu.

²³ Mí Sadrak, Mesak a Abɛd-Neko a del a yiyaa kpede o tóndóó nin.

Caaŋaa yaa Daniɛl-la fula kɛndia

²⁴ Mí siòònde bii masaa Nebukanɛsar taw. Mó can a kiltan, mó kɔ ɲuna vanaa ndɔa silaa aa: «O co langbaa nda yáá le naa n viow a yiyaa peŋ o yinnden nin te?» Mí kan mulul ndu aa: «Lende kpeekpei i yɔŋnun ni masaa.»

²⁵ Mó dimi aa: «Kɛ i co vannda nda hiɔɔlu cɔu a timbia ma va balɔɔ o yinnden nin. Ɲɛ-ɲɛ vɔɔn co nda yɔŋnɔn te. O hiɔɔlundɔɔ ndu, hɔlla maa po-halaa.»

²⁶ Mí Nebukanɛsar sɔɔnguu o tóndó bɛndu leyinndo sondoo, mó veelu coocoo aa: «Sadrak! Mesak! Abɛd-Neko! Vanaa baalaa Hala-Hiow-Ɲɔɔn-kpow-vo-a, la fula mì la hin nanu!» O kon, mí Sadrak, Mesak a Abɛd-Neko a fula o yinnden nin.

²⁷ Mí masaa latàndàá, masaa nɔ hɔlten ɲɔɔn coo-a, masaa n'bungaa a vanaa silaa cuungian le nda mɛɛndianndo. Yinnden le nɔla falun ndan lomɔɔ le few, yiiŋii va nda o lebol-le ŋue le, domala ndala bɛndulan bɛɛ la ŋue le, hali cun leyinndo ve nda lekɔɔ le.

²⁸ Mí Nebukanɛsar heelu diomndo, mó dimi aa: «Biiloo co le Hala Sadrak, Mesak a Abɛd-Neko-o! Ndu vem mɛlɛkanɔ ndɔɔ ni mó hun baŋa vanaa ndɔa baalaa, a kɛsi ndu kɔllo coo má kɛɛ diom masaa biyɔɔ-a pɛɛn. A cɛl le sangaa sɔlaa haliko a sooluu hala celen o Hala ndaa kɔɔli le-a.

²⁹ Lelan, la yaŋ nilan nihau o sɔɛi ya co dimi-e. Niaa vannda súúlan a yungulan kpow, a vanaa soaa sɔɔn mangalan yɛ́-yɛ́ɔn-nda, vana-vana dimi pɛ diomnde vɔɔnnden a Hala Sadrak, Mesak a Abɛd-Neko-o, a sɛɛsiaanin ndu, mà pesi cɛila ndɔlan, mì la siŋnun bémbélan. Kani hala celen co mò baŋa vannda baŋa vaa nuaa le.»

³⁰ O kon kɔɔli, mí masaa cɔɔlu Sadrak, Mesak a Abɛd-Neko fondala hiow lataselan ndan ke o tàndá Babilɔn-ndo nin.

³¹ Mí masaa Nebukanɛsar soli diomndo, mó dimul vannda súúlan a yungulan kpow, a vanaa soaa sɔɔn mangalaan yɛ́-yɛ́ɔn ma va icali o lɛŋnden coo-a aa: «Màá kɔlɲulu bɛndoo yɔngun niaa!

³² O hɛnan ya mì cɔm dɛnnda bɛndulan a sɔɔn kaaman bɛndun Hala-Hiow-Ɲɔɔn-kpow-vo tosal-la-on.

³³ Dɛnnda ndɔlan la co labɔɔ! Sɔɔn ndɔn kaaman mun, n co sɔɔn kpaaya dɛ! Masale ndɔlen, masale fɛɛn-fɛɛnnden le co ni! Vanabɛnduyɛi ndɔɛi viaw le lambilan a lambilan!»