Condii lisai 95 - BII BILA

Le kɔlan Mɛlɛka sangalaa a ɲaaloo

¹ «La hun mì n solulun Mɛlɛka condun ɲaalon. N melnun Pow kpova co Vana Ciindiaa naa-o balika.

² N kɔnnun ndu o hɔl mì n melnun ndu balika, mì n lɔɔnun ɲɛm-caan, mì n solin condon.

³ Kani Mɛlɛka co Hala bɛndoo ni, ndu co Masa bɛndoo halaa kpow coo ni.

⁴ Ɲɛm co o lɛŋnden bɛngu-on co ndu o ba, ndu nɔ vɛlɛ pembon ni.

⁵ Ndu nɔ mɛmma ihɛllan ni, kani ndu toosiaa man ni. Ndu nɔ vɛlɛ lɛŋnden ni, a laba o cɔw len ni.

⁶ La luɛi mì n tundun, mì n piɛinun, mì n baŋnun vulan Mɛlɛka cɔw naa-o o labɛngunin.

⁷ Kani ndu co Hala naa ni, naa co cɔlua ndɔa o co billo yɔngoo-a ni, a o nɔ hɔlten coo-a pɛɛn. La tuei-yɔ ɲɛ o dimi hau-vo aa:

⁸ ‹La kindi nilan mɛɛ niáà kindi lan Meriba yɛ le, mɛɛ niáà tosa lɔ́ɔ́ kon o lɛŋnde veselɛilen nin Masa yɛ,

⁹ nɛɛ fuɲaa niaa ndáà tɔɔndan ya-a. Ɛ̀ɛ̀ nduyɛ, má ca ɲɛ ya tosal nda-o.

¹⁰ O vɔsilan belehiɔɔlu bɛngu, polale len le hɛnan ya le, mí dimi aa: Vannda ha sinà ɲɛ ya yeema-o le.

¹¹ O kon mí mɛnan a kɔl tambɛiyo aa: A lueinin o lɛŋnde ya toosial nda le pɛngio len nin te few.›»