Condii lisai 94 - BII BILA

Mɛlɛka mìngì màá vanaa lakafaa ni

¹ Kpòkóó Mɛlɛka, Hala vana mingiaa màá, Hala vana mingi màálan-ndo, cɔm diondɔɔ nɔmndo!

² Cɔn, nɔm vana kialaa n'yamaa lelɛŋndo, mà mingul vanaa yongaa mɛɛ dɛnnda ndalan la co yɛ.

³ Háá telen kuɛɛ nɛ Mɛlɛka? Háá telen kuɛɛ vanaa yɔŋ vɔɔnda lo yɛnin ɲaaloo dɔwnɔnndo ho?

⁴ A co sɔɔn yongan dimio, vanaa yɔŋ vɔɔŋaa kan kpow a co kuundianndo.

⁵ A co vanaa nɔmnda tɛɛmbuuo, a tol kɛ́ nɔmndo coo.

⁶ A co vanalanɔ pɔnɔ ndɔ vi-o a miallo diyɔɔ, a co vííya diwvo,

⁷ ma va dimio aa: «Mɛlɛka co cɔ le, Hala Yakɔb-o co ɲɛ-ɲɛ bila biyɔɔ le.»

⁸ La caa dɛ, niaa diɔmnda ha. Niaa vanaa kindu ha lakɔl te-a, lɔ́ɔ́ kuɛɛ niaa sɔ̀là yɛnin kɔlkaloo?

⁹ Vɛ̀ɛ̀ Mɛlɛka toosiaa nilan-ndo co tueyɔɔ le? Vɛ̀ɛ̀ ndu toosiaa hɔltan-ndo co cɔ le?

¹⁰ Ndu míngí vanaa-mangalaa-isɔɔa o nɛi-yo, vɛ̀ɛ̀ o tiwba mò tuisi vana sangaa coo le? Ndu yɔngu vanndacieea dɛnɛ sinaa le pɛɛkoo-o,

¹¹ o sinà tuula ndalan kpow, o sinà maa la co ɲɛ-ɲɛ le.

¹² Duaa co le vana n co silaa a sionnden-ndo Mɛlɛka, vana n co tɔŋ nɔmndo pɛɛkoo

¹³ le ndu kɔlɲuloo keo o palɛi dɛnɛ palɛi bɛngu, háá mì soondo townun le vanaa yɔŋ vɔɔnda-o.

¹⁴ Kani nɔm Mɛlɛka melnin vanaa nɔmnda le, a faŋanin kɛ́ nɔmndo balan coo le.

¹⁵ Yamɛi kialunnin vɛlɛ mì toɲaa cennun, vanaa dendu kɔltan-nda kpow delnin toɲa kon kɔɔli.

¹⁶ Kpòkóó mɔnɛi. Ɔ́ɔ̀ vana cannin mò simul vanaa lahakia ha le ya-o? Nɛ̀ɛ́ simul-lɛnin vanaa yɔŋ vɔɔnda ha le ya?

¹⁷ Te Mɛlɛka ndóò ve ya malaa le, maa yáà kɔɛnnun nin ciee-piɔ́m.

¹⁸ Telen oo telen ya dimi pɛ aa: «I co delɔɔ», kaola nɔmndo saa ya, nɔm Mɛlɛka pɛɛn.

¹⁹ Telen buulanndan la kui ya o kɔl-lo, má ɲɔɔlu ya, má mingi ya ɲaaloo o kɔl.

²⁰ Yɛɛ co yɛ nɔm tɛɛn niaa vanaa kialaa n'yamaa kɔlta vesɛiya ha, a co haa tɔŋnda nɔmndan malɔɔ ma va caanda kuɛi tuisio coo-a?

²¹ A co yiinanndo le vana sandaa delɔɔ coo, le vana tɛɛmbuu isɔɔ loo yaalaa.

²² Kɛ ya ya, Mɛlɛka co nɛɛ nia viannannda ni, Hala nuu co pow kpova ya viannun nin-ndo ni.

²³ O mingulnin nda mɛɛ tɛɛmbuula ndalan la co yɛ, mò tɛɛmbuu nda le hakila ndalan. Mɛlɛka Hala naa tɛɛmbuunin nda.