Condii lisai 90 - BII BILA

SƐBƐ HIƆƆLUNDƆƆ (Condun lisan 90—106) Ceen vanacieo co hiovɔɔ mì Hala lo yoomu le fɛɛn a fɛɛn

1 Piɛile Moise, vana Hala-o.

¹ Piɛile Moise, vana Hala-o. Éé Mɛlɛka! Kabi paandu, nɔm yɔŋnun nɛɛ viannannda le naa ni.

² Lɔ́ɔ́ pá mí pembon fula, lɔ́ɔ́ pá mí lɛŋnden a ceendo kandun, nɔm co Hala fɛɛn-fɛɛndo ni.

³ Nɔm mingì vanacieo o puuloo nin ni, bau a dimi aa: «Niaa poaa vanndacieea, la muungu o puuloo nin.»

⁴ Kani vɔsilan vàá pilɛ la co macoaa nɔm o hɔl maa paale pilɛ, le hiownun nin-nden, te kon te maa ɲumma paale pilɛ.

⁵ A basu pɛ vannda o lepilɔɔ, a hiownun mɛɛ vana hiawnun o lɔan idii nuaa yɛ. Mɛɛ billo hiaw nuaa yɛ,

⁶ Idii o yandu, o kon kɔɔli o hiownun. Icɔl o ɲɔfɔliaa, o kon kɔɔli o vesan.

⁷ Kɔltuw nɔmndo tol naa coo, hiilɛi nɔmnde mingi naa yulan-yulan.

⁸ Tɛɛmbuula naalan la co nɔm o hɔl, ɲɛ-tengaa nɔmndo co hakila naa n co tosaa o vionnɔnndo nin-ndan teengiaa.

⁹ N co palɛi nɛi kpow hivio o kɔltuw nɔmndo bɛngu, n co vɔsila naalan siowvo o mɔnɛi nin.

¹⁰ N viow pɛ yoomu tei, vɔsilan belaŋɔmmɛw, te kon te vɔsilan belaŋɔmaa le vanaa kendu diallon-nda. Kɛ o sangaa nin a o mɔnɛi nin naa n co lan hivio lende ni. Vɔsilan la co bɔɔ keleŋaa hiovɔɔ, n co cɔnɔnndo coo le kɔlan ciee-piɔ́m.

¹¹ Ɔ́ɔ̀ vana sina kpaaya kɔltuw nɔmndo-o? Nɛ̀ɛ́ sina yɛ kɔl tambɛi nɔmndo, o yɔŋ mì siòòŋii nɔmnde bii naa-o?

¹² Pɛɛku naa mɛɛ naa n bɛnda mì n cɔm palɛi nɛi yɛ, o kon mì kɔlta naalan la pɛ a kɔlkaloo.

¹³ Éé Mɛlɛka! Háá telen kuɛɛ n lo yɛnin kɔl tambɛiyo ho? Tuinun naa vanaa nɔmaa baalaa iɲíí.

¹⁴ Le sɛ dɔ́ɔ́ pɛ, a pimi naa a kaola nɔmndo, o kon, mì n va condon solio a ɲaaloo lɔ́ɔ́-lɔ́ɔ̀.

¹⁵ O co nin lɔ́ɔ́ levil, a co naa mɔnɛi lueiyo, ke niko naa kɔlkɛndɔɔ mɛɛ naa n cii vɔsilan o mɔnɛi nin yɛ.

¹⁶ Màá dɛnnda nɔmndan la cɔmnun naa vanaa nɔmaa baalaa, mì biilu nɔmndo cɔmnun cuavaa-imamaa ndaa!

¹⁷ Maalii Hala naa, màá kɛndɛi nɔmnde tol naa coo! Luei dɛnnda naa n co tosaa a laba lan yoomuan, a toɲa, luei lan yoomuan!