Condii lisai 9 - BII BILA

Mɛlɛka baŋà vanaa co o sangaa nin-nda ni

¹ Condii David-e, í fula o condun simlacinɔ vanaa n'condua nin-nde. A ɲɛm-caan comulan o condu ndi ni.

² Mɛlɛka, i lisanin nɔm a kɔl nuu kpow, i cɔmnin dɛnnda kaamaala nɔmndan kpede.

³ I naŋnin kɔl, mì dɔwnun ɲaale o nɔm nin. I solinin condei le diola nɔmndan lisaa, nɔm Hala Hiow-Ɲɔɔn-Kpow-vo pɛɛn.

⁴ Yaamɔaa nia co muungoo a makɔɔ, a co boŋio mà va ɲumndo nɔm o hɔl.

⁵ Kani nɔm Hala, a ce sandii nii má ke ya dío, a co icali o kpɛŋɛ nɔm lemasaa nin, má va yaman sandan kiolɔɔ.

⁶ A co vanaa-mangalaa-isɔɔa kɔngɔlanndo, a co vanaa kɔlvesɛiya ciiyo, má va diola ndalan ɲumio le fɛɛn a fɛɛn.

⁷ Yaamɔaa ve lɛnin te, a cii nda tɛɛmbuu le lɔ́ɔ́-lɔ́ɔ̀, má tɛɛmbuu kobila ndalan. Vana yiyan ndɛnin a lan o kɔɔ le.

⁸ Mɛlɛka co masaa le fɛɛn a fɛɛn ni, o kɛsi kpɛŋɛ ndɔ lemasaa le yamɛi kiolɔɔ.

⁹ Ndu kialunin yaman a sandei o ceendo coo ni, ndu kialunin yaman sandan le vanaa-mangalaa-isɔɔ kpow ni.

¹⁰ Mɛlɛka co kpakio le vanaa nda co saangiaa-a ni, kpaki nda viannun nin telen dɛnɛ palaa-o.

¹¹ Éé Mɛlɛka! Màá vanaa sina diola nɔmndan-nda tiindan nɔm! Kani nɔm, a múlùl vanaa co hunɔɔ o nɔm ndo-a kɔɔ le.

¹² La soli condon le Mɛlɛka, Mɛlɛka co icali Siɔn-ndo pɛɛn. La yonda dɛnnda ndɔla bɛndulan vanaa súúla celennda tɛɛn.

¹³ Kani o co màá vanaa nda co diwvo-a mingio, o co yiyanndo a nda o kɔɔ. O pɔɛɛnun cɛɛŋɔnnda vanaa sangaa co coo-a le.

¹⁴ Éé Mɛlɛka! Tofa vɔ mɔnɛi yaamɔɔa co ya lueiyo-e, Tuinun ya iɲíí, ma faŋa ya o dio piɔ́mndo sondoo.

¹⁵ O kon, i sangalanin nɔm, mì dimi ɲɛ vem ya nɔm lisaa-o kpow o diola luɛyaala kobio Siɔn sondoo, mì viow kponyoo le ciindiaa n ciindiaa ya-o.

¹⁶ Vanaa-mangalaa-isɔɔa deli o soon nda pila tow-vo nin, pelun ndan co haw o yala nda pila tondu sɔ́ɔ́-sɔ́ɔ́-o nin.

¹⁷ Mɛlɛka cɔmnun, mó soli dɛnɛ sandaa ceen, vana kɔlvesɛiyo haw o yaŋɔɔle ndu pila yaŋ-nden.

¹⁸ Vanaa kɔlvesɛiya biinin nɛiyo le kɔlan ciee-piɔ́m, vanaa-mangalaa-isɔaa kan pɛɛn, a pɔɛɛnun Hala-a.

¹⁹ Kɛ Hala pɔɛɛnunnin vana bala fondoo lɔ́ɔ́-lɔ́ɔ̀ le, tiindan vanaa ikɔɔa tembunin le fɛɛn a fɛɛn te.

²⁰ Mɛlɛka, cɔn fɔ́! Cɛl mì vanacieo sɔla kpaayaa le. Màá yamɛi vanaa-mangalaa-isɔɔa kpede i kiolun nɔm o hɔl!

²¹ Mɛlɛka, luei vanaa-mangalaa-isɔaa kan siòònde taw, mì nda pila sinà maa vanndacieea daama nda co ni.