Condii lisai 89 - BII BILA

Éé Mɛlɛka! Kuɛɛ nɛ dɛnnda kɛndɛla n va David tosallo paandu lan la co yɛ?

¹ Condii Etan Ɛsrahiinɔ-e.

² «I vanin dɛnnda kɛndɛla nɔm Mɛlɛka lan cɔmndo lɔ́ɔ́-lɔ́ɔ̀ o condon nin. Sondo nuu vanin lambila hunnin-ndan cɔmndo mɛɛ n lo o lediom coo yɛ.

³ I dimulnin vannda mɛɛ kaola nɔmndo co le fɛɛn a fɛɛn yɛ, mɛɛ n lo o lediom coo yɛ.

⁴ Kani nuaa n dimi aa: ‹I yii kpemaa naa vana ya hɛli-o, mí cua ciɛ́ɔn naa David, vana baala nuu maa:

⁵ I siinguunin vana pilɛ o polale nɔmnden nin masa fɛɛn-fɛɛndo, i siminin masale nɔmnden yili, mì le va le lɔ́ɔ́-lɔ́ɔ̀.›

⁶ Éé Hala, màá mɛlɛkaa a mel nɔm balika o halataala le dɛnnda kɛndɛla n tosa lan a le lo n lo o lediom coo-o!

⁷ Nduyɛ, nɛ̀ɛ́ co yɛ o halataalaa maa Mɛlɛka? Ɔ́ɔ̀ vana siiman a ndu o vanndacieea tɛɛn-ndo?

⁸ Ɲaa-fàngà Hala co vanaa diandaa taw tɛɛn ni, Kpúlúnkùmaa le vanaa balu ndu-a.

⁹ Éé Mɛlɛka, Hala-Nɔ-Kpaayaa-Kpow-vo! Ɔ́ɔ̀ vana nɔ kpaayaa maa nɔm-ndo? A vownun lo o lediom coo maa lavolɔɔ.

¹⁰ Nɔ̀m kpaa yonga mɛmma ihɛl-lo ni, ma cɛn pɛ iyongban-yongbannde, a kɛsi man.

¹¹ Nɔ́m pesipesi Ɲɛ yoomaa kɔndɔfili co o mɛmma ihɛllan nin-ndo ni, má tɛɛmbuu ndu, má puusiaa yaamɔaa nɔmnda a kpaaya nɔmndo.

¹² Nɔm o ba hataalaa co ni, lɛŋnden le co nɔm vɛlɛ o ba, nɔ̀m cɔw ceendo a ɲɛm co lenin-ndon ni.

¹³ Nɔ̀m cɔw maluaŋ a too ni, pembon Tabɔr a mun Hɛrmɔn co ɲaaloo dɔwnɔnndo le diola nɔmndan.

¹⁴ Ba nɔmndo pɛ cá a kpaayaa, a nɔ kpaayaa, ba kɛndɛ nɔmndo co o heelaa.

¹⁵ O sakpoyɛi a o sandei coo kpɛŋɛ lemasa nɔmndo kɛsi tumndo ni. Kaolaa a lou o lediom coo co nɔm o hɔl.

¹⁶ Duaa co le vanaa co ɲaaloo dɔwnɔnndo le nɔm-nda, Mɛlɛka, a co kelaa o ɲɛ-tengaa nɔmndo nin-nda pɛɛn.

¹⁷ Niinoo kpɛŋ, a co yolan a ɲaaloo le diola nɔmndan, a co cɔnɔnndo isisi le tùú n sandu-o.

¹⁸ Kani nɔm co biilu ndaa a kpaayaa ndaa ni. N co hiovɔɔ laci a yoomuan sɔlaa o kɛndɛi nɔmnde bɛngu.

¹⁹ Kani vana nɔ naa hɔlten coo-o co nɔm o ba bɛngu. Nɔm o ba bɛngu masa naa co ni, nɔm O-Diandaa Israɛlla pɛɛn.

²⁰ Ɲin pum, má soaa o vundulen nin o vanaa lo o lediom coo a nɔm-nda lo, má dimi aa: ‹I yii kpemaa naa kuubanɔ cɔwvo, i heelu langbanɔ felengoo vannda tɛɛn.

²¹ I komal David, vana baala nuu, mí pɔla ndu a cuɛima nima diandan.

²² I malanin ndu, i lueinin ndu yoomuan.

²³ Yaamɔɔa nɔlanin ndu le, vana vɔɔn kɛ́-kɛ̀ saangiaanin ndu le.

²⁴ Kani i puusiaanin yaamɔaa ndɔa ndu hɔl, i lɔɔanin vanaa co ndu simullo-a.

²⁵ Kaola nuu a kɛndɛi nii vanin ndu ikɛi, o sɔlanin kpaayaa o diola nilan.

²⁶ O sɔlanin kpaayaa mɛmma ihɛllan coo, peelan bɛɛ la vanin ndu o ba bɛngu.

²⁷ O veelunin ya mò dimi aa: Nɔm co fuɲa nuu ni, Hala nuu, pow kpova co vana ciindiaa nuu-o.

²⁸ I siinguunin ndu hɔ́ɔ́ ni tasoo, o hiawnin masaa co o lɛŋnden coo-a kpede tɔ́ɔ́.

²⁹ Kɛndɛi nii vanin ndu coo le fɛɛn a fɛɛn, kpema co naa tɛɛn-ndo tembunin te.

³⁰ I kɛsinin polale ndɔlen lɔ́ɔ́-lɔ́ɔ̀ mì le sim yili. Te halataala co vɔ pɛ, mɛɛ masale nɔmnden le va vɔ nin.

³¹ Te poaa ndɔa kɛɛ pɛ le tɔŋ nuu biyɔɔ, mà kɛɛ le kelaa o silala nilan coo,

³² taa tɛɛmbuu pɛ silala nilan, mà kɛɛ le tɔŋnda nilan biyɔɔ,

³³ i lɔaanin nda a sionnden le hakila ndalan, mì soŋ nda le pɔwla ndalan.

³⁴ Kɛ i faŋanin kaola nuu nda coo le, i tɛɛmbuunin diomnde nilen te.

³⁵ I tɛɛmbuunin kpema nuu le, i mangalanin sɔɛi fula ya o sondo-e le.

³⁶ I cii nin mɛnan paale pum o diondɔɔ nuu nin aa: I huinin David lɔ́ɔ́-lɔ́ɔ̀-le,

³⁷ polale ndɔlen le vanin masalen tosaa lɔ́ɔ́-lɔ́ɔ̀, kpɛŋɛ lemasa ndɔɔ vanin ya o hɔl maa lepal.

³⁸ Mɛɛ paangei co le lɔ́ɔ́-lɔ́ɔ̀ yɛ, lende koni polale len le vanin masalen tosaa ni, kani paangei co sei toɲaa le dɛnnda co tosanndo o yumbuyumboo nin-ndan ni.›

³⁹ Kɛ nduyɛ, á mal masa n pɔla-o, má tambu kɔllo a ndu.

⁴⁰ A tɛɛmbuu kpema n yiilu vana baala nɔmndo-o, má mal mɔsil ndɔ lemasaa o cundoo nin.

⁴¹ A buuluu tɛɛngon o kpakila ndɔlan kpow, má tɛɛmbuu calta vanaa ndɔa cɔwva.

⁴² Vanaa hiavannda cii ɲɛm ndɔn poondiaa kpow, vanaa nda cal latulu-a co ndu mamɔɔ.

⁴³ A ke vanaa nɔ nɛyɔn ndɔɔ-a kpaayaa, má nɛŋi yaamɔaa ndɔa kɔltan.

⁴⁴ A kpeeŋa mɔɛi ndɔɛi cɔwve, má mingi ndu a makɔɔ, a mala ndu o cɔwvo nin te.

⁴⁵ A cii bɛɛle ndɔlen tɛɛmbuu, má mal masale ndɔlen lɛŋ.

⁴⁶ A dɔɔniaa palɛi felengiyɛi ndɔɛi, má tuisi ndu siɛmbulan.

⁴⁷ Háá telen kuɛɛ n lo yɛnin vionnɔnndo ho nuaa? Háá lɔ́ɔ́ kuɛɛ n lo yɛnin kɔllo fulaa maa leyin?

⁴⁸ Loonun-ndɔ mɛɛ yoomu nuu bingi yɛ. Vɛ̀ɛ̀ le nda tɛɛmbuuo kpow n cɔw vanndacieea ni?

⁴⁹ Ɔ́ɔ̀ vanaciee tiwba mò lo yoomu o vi loo, te kon te, mò kpakpala ciee-piɔ́mndo?

⁵⁰ Maalii, kuɛɛ nɛ kaola nɔm óò nɔ paandu-o co yɛ, o nɔm óò mɛnalan David a dɛnɛ nɔm kɛndɔɔ-o?

⁵¹ Loonun-ndɔ mɛɛ nda yeow vanaa baala nɔmndo yɛ Mɛlɛka. Loonun-ndɔ mɛɛ dɛnɛ palaa sɛ́lɛ́ bɛndoo ho co ya coo yɛ.

⁵² Éé Mɛlɛka! Yaamɔaa nɔmnda tɛɛmbuu vana n pɔla-o bɛ̀ɛ̀lan, má sui ndu diɔmnde o nɛilan kpow coo.

⁵³ Biiloo co le Mɛlɛka, Hala fɛɛn-fɛɛndo. Amiina! Màá o tosan lende!»