Condii lisai 85 - BII BILA

Mɛlɛka, cɔm naa kaola nɔmndo

¹ Condii poaa Kore-a le simlacinɔ vanaa n'condua.

² Éé Mɛlɛka! A tosal lɛŋnde nɔmnden dɛnɛ kɛndɔɔ, má mingi poaa Yakɔb-a va o biyɔɔ nin-nda nanu.

³ A faŋa tɛɛmbuula vanaa nɔmnda, má mal nda haki a hakila ndalan kpow.

⁴ A mal kɔltuw nɔmndo kpow, má yɛlɛma kɔl nɔm óò fula a naa-o.

⁵ Mingi naa yoomuan nin, Hala vana ciindiaa naa, pɛngi nin kɔltuwvo ho a naa.

⁶ Vɛ̀ɛ̀ le fɛɛn a fɛɛn n tambu kɔl a naa nuaa ni? Vɛ̀ɛ̀ le lambilan a lambilan n fula kɔllo nuaa ni?

⁷ Vɛ̀ɛ̀ a minginin naa vanaa nɔmnda yoomu, mì n dɔwnun ɲaale o nɔm nin te?

⁸ Éé Mɛlɛka! Cɔm naa maa vana lo o lediom coo-o n co ni, mà ciindiaa naa.

⁹ I tuɛi ɲɛ Mɛlɛka dimio, o co sɔɛi le kɔlɲulu vanaa ndɔa a vanaa laalan ndu-a, haliko a muungu lɛ o diɔmii ndɛi nin te.

¹⁰ A toɲa, cinda ndɔɔ co vanaa nɔ siòòŋii ndɔɛi-ya levil te, biilu ndɔɔ co o lɛŋnde naalen nin.

¹¹ Kaolaa nda toɲaa bɔŋan, dɛnɛ sandaa nda kɔlɲuloo co kɔɔmianndo.

¹² Toɲaa co vulɔɔ fulaa lɛŋ, dɛnɛ sandaa co fulaa coocoo.

¹³ Mɛlɛka bɛɛ yɔngunin dɛnɛ kɛndɔɔ, mì lɛŋnde naalen le naŋ tɔlɔɔlan.

¹⁴ Dɛnɛ sandaa hiawnin Mɛlɛka laci, mò toosiaa nɛiyo le pelon kɛsio.