Condii lisai 83 - BII BILA

Éé Hala, meinun nuaa le!

¹ Condei, condii fula o condun Asaf-on nin-nde.

² Éé Hala, lo meiyo ho nuaa le! Kɛɛ le sondoo vowvo o sɔɛi he nin te, káfàlà balan a dɛnɔɔ ho le, yandi Hala!

³ Tofa vɔ mɛɛ yaamɔaa nɔmnda co cɔnɔnndo yɛ, mɛɛ vanaa nɔ nɛyɔnndo a nɔm-nda co bolle heeloo yɛ.

⁴ A co tuula vɔɔnndan le vanaa nɔmnda ciŋilanndo, má va vanaa n nɔ baa coo-a dúmbóó yiiyo.

⁵ A co dimio aa: «N kɔnnun, n kɔ ciinun vanaa-mangalaa-isɔɔa ha, o kon, vana loonun ndɛnin a diola Israɛlla o kɔɔ le.»

⁶ Nda kpow o co cɛlanndo, a co kpemaa yiiyo le nɔm cɔlɔbaa.

⁷ Vanaa kan a co haa ni: Edɔmnda, Ismaɛlla, Moabua, vanaa fula o polale Akar len nin-nda, vanaa fula Kebal-la,

⁸ Amɔnnda, Amalɛkea, Filistia a vanaa fula Tir-a.

⁹ Asiriia bɛɛ sɔɔnguu nda ikɛi le vanaa fula o polale Lɔt len nin-nda malaa.

¹⁰ La tòsá a nda mɛɛ niaa tosá a Madian, Sisera a Yabin o pee pɔmbɔɔ Kison yɛ,

¹¹ á nda diw o soon mamɛnndo Ɛin-Dɔr, má siŋnun puulu sállo-a pɛɛn.

¹² La tòsá a cuaa lemasaa ndaa mɛɛ niaa tosá a Orɛb nda Seɛb yɛ, mì la tòsá a simlacia ndaa mɛɛ niaa tosá a Seba nda Salmunna yɛ,

¹³ á va kan dimio aa «N hiɔlun lɛŋnde Hala len»-nda pɛɛn.

¹⁴ Hala nuu, hìŋ nda mà siŋnun maa bil hoeiye saŋ fásàn-ndo,

¹⁵ mà siŋnun mɛɛ yinnden le loam bundɔɔ nuaa yɛ, mɛɛ yelenyelen leyinndo kumbu pembon nuaa yɛ.

¹⁶ Tisa nda kɔɔli o hoeyii fùkù-fùkùei nin, ma luei nda siòònde a hoeyii felenfelennde.

¹⁷ Éé Mɛlɛka! Tuisi nda siɛmbulan mɔ́ɔ̀yɔ̀ɔ̀, haliko mà muungu nɔm o ibuŋ.

¹⁸ Màá siɛmbulan la tol nda mà va a siòònde lɔ́ɔ́-lɔ́ɔ̀! Màá a tambu labɛɛ, mà cuu kpede!

¹⁹ O kon, mà sinà maa nɔm pilɛ kpé co Mɛlɛka ni, maa nɔm co Hala-Hiow-Ɲɔɔn-Kpow-vo o lɛŋnden coo ni.