Condii lisai 81 - BII BILA

Vannda co Hala diom tueyɔɔ le

¹ Condii Asaf-e, í fula o condun simlacinɔ vanaa n'condua nin-nde. A banga Kat-o o soli condei he ni.

² «La solul Hala co yoomuma naan-ndo condon a ɲaaloo, la heelu diomndan o Hala Yakɔb-o lo.

³ La lɔɔ ɲɛm-caan: la lɔɔ dundoo, la lɔɔ banga diom kɛndɔɔ mì la lɔɔ bondomaa.

⁴ La hɔŋ bulu lee saa o kafo paangii sɛnɛiyo coo, mì la hɔŋ vɛlɛ ndu telen paangii diandɛi o paale kafo naa coo.

⁵ Kani tɔŋ Israɛlla bɛnda ma bii-yo co kon ni, ɲɛ Hala Yakɔb-o kelu-o co kon ni,

⁶ sila o baŋ yungu Yosɛf-o le biyɔɔ tuma o ciŋilan lɛŋnde Esipte len-ndo pɛɛn. Mí tuɛi diom ya sina loo ya dimullo aa:

⁷ ‹I faŋa volɔɔ lusulaa niaa o congú, mí soli niaa o baalala nda va niaa baŋɔɔ tosaa lan nin.

⁸ La va o mɔnɛi nin, mí la cɛɛŋun, mí baŋa niaa, mí mulul niaa o diom mataŋndo nin, mí soli niaa kɔlɔ o mɛnndan Meriba ikɛi.

⁹ Niaa vanaa nia, la yaŋnun-ndɔ mì dimul niaa ɲɛ yɔŋnunnin-ndo. Àá niaa Israɛlla, te niáà tuei ya pɛ diom!

¹⁰ O bɛnda mi hala celen va niaa tɛɛn te. La biilu halaa celennda le!

¹¹ Ya co Mɛlɛka ni, Hala niaa pɛɛn, ya soli niaa o lɛŋnde Esipte len nin ni. La kumbi sondola niaalan kumbio pila, mì pei lan cá.

¹² Kɛ niaa yungu nuu, la tui ya diom te, Israɛlla yeema ya le.

¹³ Le hee, mí mal nda a bɛɛlala ndalan, má tosa yiyannda nda pila lan.

¹⁴ Àá! Te yungu nuu ndóò tuei ya pɛ diom, te Israɛlla ndáà kela pɛ o nɛila nilan coo!

¹⁵ I va yaamɔaa ndaa malɔɔ nda o ba sisa, mì yáà ciŋilan vanaa co nda ciŋilanndo-a.

¹⁶ O kon, vanaa nɔ nɛyɔnndo a Mɛlɛka-a va ndu Mɛlɛka sangala, mì Israɛlla ndáà vannun a kɔlkɛsiaa lɔ́ɔ́-lɔ́ɔ̀.

¹⁷ Ya Mɛlɛka, yáà dɔawnin niaa balo a malun kɛndɛ-kɛndɔn, mì yáà ke niaa lɛma co fulaa yondoo nin-ndan le dioo.›»