Condii lisai 80 - BII BILA

Éé Hala, nɔm vana co Israɛlla mandaa-o, tuei naa diom!

¹ Condii Asaf-e, í fula o condun simlacinɔ vanaa n'condua nin-nde. A bangaa o soli condei he ni.

² Nɔm co maa Vana mandaa n'saa le Israɛl-lo, yaŋ naa nilan yandi, nɔm co vanaa nɔmnda simndan laci maa cɔlua kunda-o, nɔm co icali mɛlɛkaa kanda ɲɛm Hala-on-nda tɛɛn-ndo, cɔmnun vakpa o biilu nɔmndo nin.

³ Timbi kpaaya nɔmndo ma hun ciindiaa naa polama Efraim, Bɛnyamɛn a Manase-an o hɔl.

⁴ Éé Hala, mingi naa nɔm o ibuŋ. Bíí naa biyɔɔ kɛndɔɔ, mì n sɔla cindaa.

⁵ Mɛlɛka, Hala-Nɔ-Kpaayaa-Kpow-vo, a piɛile vanaa nɔmnda co nɔm len-nden kpow, háá lɔ́ɔ́ kuɛɛ n lo yɛnin a kɔltuwvo ho?

⁶ Nɔm Hala, a co vanaa nɔmnda baloo dɔvɔɔ a mɔnɛi, a co nda hiwvo pimio a mɛmɛan.

⁷ A siinguu naa ɲɛ vannda cɔlɔba coo-o le vanaa naa n cɛɛlian-nda, yaamɔaa naa co naa mamɔɔ.

⁸ Nɔm Hala-Nɔ-Kpaayaa-Kpow-vo, mingi naa nɔm o ibuŋ. Bíí naa biyɔɔ kɛndɔɔ, mì n sɔla cindaa.

⁹ Nɔm óò sungɔɔ rɛsɛn tumndo Esipte, má toaw vanaa-mangalaa-isɔɔa le ndu tɔlɔɔ.

¹⁰ Má toosiaa fondaa le ndu, mó soli dumbon, mó tiw o lɛŋnden kpow nin.

¹¹ Mí vunduma ndɔan ma kumbu pembon, mí lɛvun ndɔn kumbu sɛɛdrii bɛndu-bɛnduei.

¹² Mí lɛɛndun ndɔn kɔa háá o mɛmma ihɛllan coo, mí tɛyun ndɔn tiiya háá Efrate o peelo.

¹³ Le yɛɛ n pɛl-lɛ niko kunga ndɔɔ, mì vanaa hiavannda va kpɔ̀nyɔ̀la ndɔlan kiɔndɔɔ?

¹⁴ Pevaa yondoa co o bundɔɔ nin-nda co ndu tɛɛmbuuo, visia yondoa co hunɔɔ diólan ndon.

¹⁵ Nɔm Hala-Nɔ-Kpaayaa-Kpow-vo, muungu naa o ibuŋ yandi! Nɛɛ n co o halataala-a, tofa vɔ lɛŋ ma ce. Mulul rɛsɛn tumndo ho hɔlla.

¹⁶ Kanda ɲɛ nɔm pila tɔl-lo, poaa nɔm pila suili-a pɛɛn.

¹⁷ Vannda lom rɛsɛn tumndo ho, má kialu ndu. Kɛ a vueenunnin-nda a hɔlaa nɔmnda mà cuu ɲum pɔ́lì.

¹⁸ Màá ba nɔmndo lo masa co icali nɔm o ba kɛndɔɔ coo-o coo, po vanaciee nɔm pila luei yoomuan-ndo pɛɛn!

¹⁹ N kue lɛnin nɔm levil te. Mingi naa yoomoo o milin, mì n va diola nɔmndan piɔlɔɔ.

²⁰ Mɛlɛka, Hala-Nɔ-Kpaayaa-Kpow-vo, mingi naa nɔm o ibuŋ. Bíí naa biyɔɔ kɛndɔɔ, mì n sɔla cindaa.