Condii lisai 8 - BII BILA

Biilu Hala-o co o bɔɔ o lɛŋnden kpow coo

¹ Condii David-e, í fula o condun simlacinɔ vanaa n'condua nin-nde. A banga Kat-o o soli ndi ni.

² Éé Mɛlɛka! Maalii naa! Diola nɔmndan la co labɔɔ o lɛŋnden kpow coo! Bɔɔbɔɔyɛi nɔmnde hiow halataalaa helɔɔ.

³ A sondola cuaambɔa pɔmbɔa a á sondola cɛlɛkpɛa co vɔɛiyo-a n cɔlɔbà yaamɔaa nɔmnda ni. A sondola lan n kinda yaamɔaa yeema le nɔm màá mingullo-a sondolan ni.

⁴ I tofa pɛ halataalaa, vali n tosa a laba-o co kon ni, mì tofa paangei a loeon n toosiaa-on,

⁵ yɛɛ vanacieo co yɛ, ma yiyan ndu coo? Yɛɛ nɛ po vanacieo co yɛ, ma landu hɔlla ndu coo?

⁶ Ɲɛ-pɔmbɔ koni ɲaa yoomaa co o halataala-a hiow ndu ni. A dovi ndu a naŋɔɔ a á biiloo,

⁷ má suili ndu masaa ɲɛ-ɲɛ n cɔw a laba coo, má kɛsi ɲɛm mun kpow ndu o labɛngunin:

⁸ saa, cuinnda, nawva, hali visia yondoa,

⁹ yowva coocoo, suvaa co o peelo-a, a ɲɛ-ɲɛ co kelaa o mɛnndan nin.

¹⁰ Éé Mɛlɛka! Maalii naa! Diola nɔmndan la co labɔɔ o lɛŋnden kpow coo!