Condii lisai 79 - BII BILA

Hun mà mala naa Mɛlɛka, kani n del

1 Condii Asaf-e.

¹ Condii Asaf-e. Éé Hala, vanaa-mangalaa-isɔɔa del kɛ́ nɔmndo coo fɔ́! A cii Cɛi nɔm diandaa nɔɔliaa, a cii Yerusalɛm siinguu powta bémbélan.

² À cii vanaa baalaa nɔmaa vi-a siinguu balo yovaa co kelaa coo-a, má mingi visin vanaa lo o lediom coo a nɔm-nda balo visia yondo-a.

³ Má cuuŋuu kooma ndan lɛŋ maa mamɛn o kobio Yerusalɛm balɔɔ sɔ́, vana sɔlan le nda kumbɔɔ le.

⁴ Vanaa naa n cɛɛlan-nda co naa yeowlan, vanaa balu naa-a co naa mamɔɔ.

⁵ Mɛlɛka, háá lɔ́ɔ́ kuɛɛ n lo yɛnin a kɔltuwvo ho? Háá tuma kuɛɛ paŋala nɔmndo ho lo yɛnin sandei he maa leyin?

⁶ Tuisi kɔltuw nɔmndo vanaa-mangalaa-isɔaa coo, à sina kan nɔm te-a pɛɛn, tuisi ndu masɛi pel hee diola nɔmndan tei coo.

⁷ Kani vanaa kan poondiaa ɲɔɔn cuavaa Yakɔb-a o ba, mà tɛɛmbuu lɛŋnde ndalen.

⁸ Míngì tɛɛmbuula fuɲaa naa mamaa naa coo le. Kɛ tuinun naa iɲíí, hun naa ikɛi cɔ́-cɔ́! Kani diallon vi naa bɔɔ!

⁹ Sɔɔnguu ma mala naa, Hala vana ciindiaa naa, haliko mì bɛɛlen le kennun nɔm. Báŋá naa ma mal naa haki le hakila naalan, haliko mì diola nɔmndan la kela tɔ́ɔ́.

¹⁰ Vɛ̀ɛ̀ mì vanaa súúla celennda ɲuna aa: «Ɔ́ɔ̀ Hala ndaa?» Vanaa kan bɛnda ma sina, mì naa bɛɛ n ce mɛɛ n mingi màá le vanaa nɔmaa baalaa nda diw-va yɛ.

¹¹ Yaŋ nilan a ɲííye o cɛɛŋɔnnda vanaa kaasoo co lan, kanda vanaa piɔ́mndo co hinullo-a a kpaaya nɔmndo!

¹² Maalii, vanaa súúla celeŋaa balu naa-a tiŋ nɔm! Mingul nda màá háá bɛmbɛ leŋɔmmɛw le yeowla nda yeow nɔm lan-ndan.

¹³ Kɛ naa n co vanaa nɔmnda-a, naa vanaa n co mandaa-a, n vanin nɔm lisaa lɔ́ɔ́-lɔ́ɔ̀ o condon nin. N vanin nɔm biiloo le fɛɛn a fɛɛn.