Condii lisai 77 - BII BILA

Te sangaa komal-la pɛ, i yiyan a dɛnnda kaamaala Mɛlɛka tosa sindɛ lan o kɔɔ

¹ Condii Asaf-e, í fula o condun simlacinɔ vanaa n'condua nin-nde. Mɛɛ Yedutun soli ndi yɛ:

² «I co koŋullo Hala o lani le ya malaa, i co ndu cɛɛŋɔnndo o lani le ya diomndo tueyɔɔ.

³ Ɲin dɛnɛ palaa komal-la pɛ, i nuwviaa Maalii. Lɔan pii, i pɛngi balan heeloo o ndu lo le, I cɛl mì vana ɲɔɔlu ya le.

⁴ Te i yiyan pɛ a Hala o kɔɔ, i koŋul, te i keela pɛ kɔllo, diallon vi ya.

⁵ A tosa mí kpennda lahɔl, kɔllo hiŋnun ya nin, i nɔ ɲɛ dimia le.

⁶ Te i yiyan pɛ a palɛi hiow sindɛ-e, mì yiyan vɛlɛ a vɔsila hiownun nin-ndan o kɔɔ,

⁷ te i yiyan pɛ mɛɛ yáà soli condon icɔl-lɛ, mì keela kɔllo, ya pila ɲunan aa:

⁸ ‹Vɛ̀ɛ̀ le fɛɛn a fɛɛn Maalii kɛɛ naa nuaa ni? Vɛ̀ɛ̀ o ci lɛnin naa ɲia le?

⁹ Vɛ̀ɛ̀ cuvɔɔ vanakɛndɛyɛi ndɔɛi cuu nuaa ni? Vɛ̀ɛ̀ o dimul-lɛnin naa isɔɔ lɔ́ɔ́-lɔ́ɔ̀ le?

¹⁰ Vɛ̀ɛ̀ pɔɛɛnɔnndo Hala pɔɛɛnun le naa ɲííye tuinɔnndo nuaa ni? Vɛ̀ɛ̀ kɔl ndɔɔ o kindal naa a kɔltuwvo nuaa ni?›

¹¹ I co dimio aa: ‹Ɲɛ co ya palaa-o ndu co ni ndu co ni maa Ó-Hiow-Ɲɔɔn-Kpow-vo co lɛ naa mala maa paandu le.›

¹² Mɛlɛka, i yiyannin dɛnnda nɔmnda n tosa lan, a toɲa, i yiyannin vɛlɛ dɛnnda kɔndɔfilta n tosa sindɛ lan.

¹³ I keelanin kɔllo o dɛnnda kaamaala n tosa lan kpow coo, mì yiyan dɛnnda nɔmnda bɛndulan.

¹⁴ Éé Hala, nɛila nɔmndan la dendu bɔɔ! Ɔ́ɔ̀ hala co o bɔɔ maa nɔm Hala-o?

¹⁵ Nɔm co Hala tosa dɛnnda kaamaalan-ndo ni, a cɔm vanaa súúla celennda kpaaya nɔmndo.

¹⁶ A baŋa vanaa nɔmnda a kpaaya nɔmndo, vanaa fula o polale Yakɔb len nin a o polale Yosɛf len nin-nda pɛɛn.

¹⁷ Òó Hala! Mɛɛ mɛnndan ma ce nɔm, toɲaa mɛɛ mɛnndan ma ce nɔm, mí ma ŋol, mí peela kɔltan la kalaŋan,

¹⁸ mí yumbuyumboo tuisi mɛnndan pɔ́lɔ̀-pɔ̀lɔ̀, mí piɔɔ va deŋio o halataala, mí kɔɔn nɔmndon va kɔlan nɛɛ-nɛɛ ka.

¹⁹ Mɛɛ ɲɔɔ va kɔlan a deŋio, mí piɔɔ-volia nɔmndo teengiaa ceendo, mí lɛŋnden le hiilun, mí le ɲiiya.

²⁰ A buli nɛiyo le nɔm pila o mɛmma ihɛllan tɛɛn, má soli pemalen o mɛmma bɛndu-bɛnduan nin, kɛ vana-vana seelun foofola nɔmndan te.

²¹ Má sɔaa yungu nɔmndo Moise nda Aarɔn o ba, má yàà nda mɛɛ vana kɔa a cɔlua kundaa nuaa yɛ.»