Condii lisai 76 - BII BILA

Hala cii cɔwvo Siɔn

¹ Condii Asaf-e, í fula o condun simlacinɔ vanaa n'condua nin-nde. A ɲɛ-caa iyoo o soli condei he ni:

² Hala sinan o tàndá Yuda-o nin, diola ndɔlan la co la bɔɔ o lɛŋnde Israɛl-ten nin.

³ Kùùle ndɔlen le co Salɛm, calta ndɔlan la co Siɔn.

⁴ Lon o yimi ɲɛm cɔwvon ni: kɔɔn, kɔ̀ɔ̀la cɔwlan a mɔɔn cɔwvon.

⁵ Nɔm Hala, a co diondɔɔ, a co tengaa a naŋɔɔ hiovɔɔ pembun masindɛ-sindɔn coo.

⁶ A cii kuubaa cɔwva yunga cúcúú! À hiownun o lɔma nda tindu lɛnin te-an. O pilɛ bɛɛ nɔla kindikindinndo le ndu pila le.

⁷ Mɛɛ nɔm Hala Yakɔb-o deŋul nda, mí vanaa ɲaanun o soa coo-a a soa ndaa kan a deli lɛŋ lɛ́ɛ́siɛn.

⁸ Nɔm kínɛí vannda bɛnda mà vo ni. Taa tuulu pɛ kɔl, nɛɛ nɔla yɛ mò simul nɔm?

⁹ A lo o halataala, má kialu yamɛi, mí siòònde bii lɛŋnden, mí vanaa co o lɛŋnden coo-a sim kpɛ́!

¹⁰ Ken tosan tuma kon kpeekpei, tuma nɔm Hala cɛn le dɛnɛ sandaa simio-o, telen n cɛn kon le vanaa co sangaa o lɛŋnden coo-a kpow baŋaa-o.

¹¹ Hali kɔltuw vanndacieea siŋnun biiloo le nɔm, mì vanaa lonin a kɔltuwvo-a vownun volɔɔla biisilan.

¹² La cua ciɛ́ɔn o Mɛlɛka Hala niaa lo, mì la peelu ciɛ́ɔn mun! Niaa vanaa balu ndu-a kpow, la cuu Hala kpúlúnkùmaa ɲɛm-kéan.

¹³ Ndu tɛ̀ɛ̀mbuu yonga simlacia ni, masaa co o lɛŋnden coo-a kpow a nɔ siòònde a ndu.