Condii lisai 74 - BII BILA

Piɛilen a Cɛi Mɛlɛka tambu-o o kɔɔ

1 Condii Asaf-e.

¹ Condii Asaf-e. Kpòkóó Hala! Le yɛɛ n co yɛ naa yomnɔnndo ho nuaa? Le kɔlɔ yɛɛ n co yɛ kɔllo tuuloo a naa, naa cɔlua n co mandaa-a?

² Loonun a vanaa nɔmnda o kɔɔ, vanaa n kɛsi le nɔm pila o co nin hau lɔ́ɔ́ levil-la. Loonun a vanaa fula o polama co kɛ́ nɔmndo-an nin-nda, vanaa kan pɛɛn à n baŋa-a. Loonun a pembei Siɔn o kɔɔ, nɛɛ n kila caltan nɔmndan-nda.

³ Hun tofa vɔ a kpengii ɲɛ tambɛi fɛɛn-fɛɛndo co-a, yaamɔɔa cii ɲɔɔn kpow tɛɛmbuu o Cɛi-Diandaa nin.

⁴ Yaamɔaa nɔmnda co pɛɛliaa o fonda naa n va bɔɔŋianndo naa niaa-a kpeekpei. Lon kpeekpei nda landu lɛfɛla landaala ndalan ni.

⁵ Velanndo nda pila a vanaa kiaŋ yɔmnde a cueon o bundɛlan nin-nda.

⁶ À cua cueon a kunduvalan, má tɛɛmbuu tuuliaala va o Cɛi nɔmndo lan kpow.

⁷ A mal Cɛi nɔm diandaa yin, à komba calta nɔmndan lɛŋ, má nɔɔliaa nɛɛ diola nɔmndan la co kan piɔlnɔnndo-a.

⁸ Nuaa nda va dimio ni aa: «N tɛɛmbun nda kpow.» Fonda oo fonda vannda va Hala biiloo o lɛŋnden nin, à cii lan lumi kpede.

⁹ N co lɛ latɔɔmasele cɔ le. Vanaa-tɛɛngaa-diom Hala-a co lɛ le, nduyɛ o naa tɛɛn, vana-vana sina telen dɛnndan ndan la cuunin-ndo le.

¹⁰ Kpòkóó Hala, háá telen kuɛɛ yaamɔɔ lo yɛnin nɔm yeowlan ndan nuaa? Vɛ̀ɛ̀ nuaa o lonin nɔm diolan tɛɛmbuuo ni?

¹¹ Le yɛɛ n calnun yɛ nuaa, a co ɲɛ-ɲɛ tosa le? Le kɔlɔ yɛɛ n kafala yɛ balan?

¹² Kabi masindɛ, nɔm Hala co masa nuu ni, nɔm tosa ni mì vannda sɔla baŋaa o lɛŋnden coo.

¹³ Nɔm Hala, má tɛnda mɛmma ihɛllan a kpaaya nɔmndo, má pesipesi tambálakáà co o mɛnndan nin-nda bolle.

¹⁴ Má pial N'Yalɛ́iyo bollen, má siinguu ndu balo ɲaa yoomaa co o lɛŋnde veselɛilen nin-nda.

¹⁵ Nɔm kumbi soonnda mamɛnndan a peelan ni, nɔm veeliaa peela ve vela lɔ́ɔ́-lɔ́ɔ̀ le lan ni.

¹⁶ Nɔm nɔ paalen ni, ɲumndan bɛɛ nɔm o ba ma co ni, nɔm cɔw paangei a paalen ni.

¹⁷ Nɔm handu pɛɛngula lelɛŋndan kpow ni, má soli vɔɔlen a sialten.

¹⁸ Yiyan-ndɔ hee Mɛlɛka: Yaamɔɔa co nɔm mamɔɔ, diɔmnda co diola nɔmndan pɛɛsaa.

¹⁹ Mal yoomu vanaa n kaola taw-va visia yondoa o ba le. Pɔɛɛnun ceen vanaa nɔmaa co o sangaa nin-nda le fɛɛn a fɛɛn te.

²⁰ Loonun a kpema nɔmndo o kɔɔ. Kani fondala yifidiila co o lɛŋnden nin-ndan la co lapiaalan a bɛmɛlta vanaa kɔlvesɛiya.

²¹ Màá vanaa nda co dɛnɛ palaa tuisio coo-a muungu a siɛmbulan te! Kɛ màá vanaa bala fondoa a vanaa sangaa co coo-a lisa diola nɔmndan!

²² Éé Hala, cɔn ma cɔlɔba le nɔm pila! Tofa vɔ mɛɛ diɔmnda ha co nɔm mamɔɔ tuŋ-tuŋ yɛ.

²³ Pɔɛɛnun yoondiaala yaamɔaa nɔmnda co lan te, vɔkɔ-vɔkɔ vanaa co nɔm ciŋilanndo-a co tuŋ-ndo pɛɛn.