Condii lisai 72 - BII BILA

Piɛilen haliko mi masaa sɔla duaa

1 Condii Salomɔm-nde.

¹ Condii Salomɔm-nde. Éé Hala, tosa mì masaa caa yaman kiolɔɔ maa num pila. Tosa mì poaa masaa sina dɛnɛ sandaa.

² O kon, o kialunin vanaa nɔmnda iyama o sandei nin, mò kelu yaman vanaa dɛnɛ palaa co coo-a a sakpoyɛi.

³ Pembun bɛndon cuunin vannda kɔlɲuloo, mì pembun pɔmbɔn cuu nda dɛnɛ sandaa.

⁴ Masaa tosalnin vanaa dɛnɛ palaa co coo o lɛŋnden nden nin-nda dɛnɛ sandaa, mò ciindiaa vanaa co o mɔnɛi nin vannda tɛɛn-nda. O pesipesinin vanaa co vannda delɔɔ coo-a.

⁵ Mɛɛ paalen a paangei co viovɔɔ le fɛɛn a fɛɛn yɛ, lende koni lambilan a lambilan la vanin nɔm masaa bɛɛlen keo ni.

⁶ Masalen ndɔlen le vanin tolɔɔ maa piɔɔ o lɛŋnde nda cii billo vuunda coo len coo, mɛɛ kɛmndan ma liwviaa lɛŋnden nuaa yɛ.

⁷ O palɛi ndɔɛi bɛngu, dɛnɛ sandaa puinin. Te paangei co vɔ pɛ, kɔlɲuloo kuinin.

⁸ O tosanin masalen kandɔɔ o mɛmma ihɛllan kpengei pilɛ, kɔlan tiiyaa háá kpengei pilɛi, kandɔɔ vɛlɛ o peo Efrate leeloo, kɔlan tiiyaa háá o lɛŋnden mɛɛlulan.

⁹ Vanaa co o lɛŋnde veselɛilen nin-nda baŋnin vulan ndu o labɛngunin, yaamɔaa ndɔa deembuunin cundoo lɛŋ.

¹⁰ Masaa co Tarsis-a a masaa co o lɛŋii co o mɛmma ihɛllan tɛɛn-nde coo-a a vanin ndu ɲɔɔn cuuo. Masaa Saba a masaa Seba a yoonin ndu ɲɛm-kéan cuuo.

¹¹ Masaa kpow a baŋnin vulan ndu o labɛngunin, mì vanaa-mangalaa-isɔɔa kpow a tosal ndu baalaa.

¹² Kani o baŋanin vana bala fondo co cɛɛŋɔnndo-o a vana ikɔɔ nɔ vana malaa loo.

¹³ O tuinunnin vana nɔ mayoomu loo a vana co o pɛŋnden nin-ndo iɲíí. O ciindiaanin vanaa nɔ ɲɛ-ɲɛ lea.

¹⁴ O baŋanin nda le delɔɔ coo a le kɔlvesɛiyo nda co nda tosallo-o, kani yoomu ndaa co ɲɛ sɔvɛ ndu hɔl.

¹⁵ Màá o viow yoomu, mì sianion Saba n yɔngun ndu! Màá vannda va Hala piɛiyo le ndu, ma va ndu duaa dɔvɔɔ telen oo telen!

¹⁶ Maalon kuinin o lɛŋnden coo, n vanin o pembon coo ba-ba fee, n naŋnin maa bil co Liban-ndo. N tiwnin o kobion nin maa bil co o yondoo nin-ndo.

¹⁷ Màá diola masaa la va le fɛɛn a fɛɛn! Màá la hiow laci maa lepala! Màá vannda va duaalan dɔavanndo a diola ndɔlan piɔlɔɔ! Màá vanaa-mangalaa-isɔɔa va dimio maa dɛnɛ kɛndɔɔ co le masaa!

¹⁸ Biiloo co le Mɛlɛka Hala, Hala Israɛlla pɛɛn! Ndu pilɛ kpé co dɛnnda kaamaalan tosaa ni.

¹⁹ Biiloo co le diola ndɔla biilaalan le fɛɛn a fɛɛn! Màá lɛŋnden kpow le piɔ a biilu ndɔɔ! Amiina! Amiina!

20 Nanu David, po Yisai-yo mɛɛlu piɛilen ni.

²⁰ Nanu David, po Yisai-yo mɛɛlu piɛilen ni.