Condii lisai 7 - BII BILA

Ke ya dío Mɛlɛka

¹ Condii cɛɛŋannde, condii David-e. A Kus fula o polale Bɛnyamɛn-nden nin-ndo o sondo o cɛɛŋun Mɛlɛka o lani ni.

² Mɛlɛka Hala nuu, nɔm o ibuŋ nɛɛ nia viannannda co ni. Baŋa ya vanaa co ya yɛlen tollo-a o ba, ma ciindiaa ya,

³ yɔŋii nda sɛɛsiaa ya mɛɛ yàlàá kpuva ɲɔɔ, vana sɔ́làn le ndu ndu hiɔlɔɔ o ba le yɛ.

⁴ Mɛlɛka Hala nuu, te i tosa pɛ dɛnɛ pum, te i luei pɛ balan o dɛnɛ vɔɔndo nin,

⁵ te i tosal pɛ vana sɔngɔ co naa tɛɛn too dɛnɛ vɔɔndo, te i poonda pɛ ɲɛ pum yaamɔɔ nuu o ba a kafalan,

⁶ màá yaamɔɔ nuu tow ya mò bii ya, mò kpuva ya o kiyɛiyo, mò cii ya labɛɛ o cundoo nin!

⁷ Mɛlɛka, cɔn a kɔltuw nɔmndo! Ciŋilan yaamɔaa nia hinul-la a hiilɛi-ya. Nɔm Hala simì dɛnɛ sandaa-o, vá lahɔl yékén ya ikɛi.

⁸ Màá vanaa-mangalaa-isɔɔa cuungian nɔm ikɛi, mà tosa masalen nda coo nɛɛ n co icali o kpɛŋɛ nɔm lemasaa nin o halataala-a!

⁹ Nɔm Mɛlɛka kialu yamɛi vannda súúlan kpow ni. Kiolu yamɛi toɲɛi mɛɛ dɛnɛ ni sandaa a kela ni kɛndɔɔ co yɛ.

¹⁰ Éé nɔm Hala sandaa! Nɔm sinà yiyannda vanndacieea-o, tosa mì dɛnnda vɔɔnnda vanaa kɔlvesɛiya la cuu, ma simi vanaa sandaa yili.

¹¹ Hala co kɔ̀ɔ̀ cɔw co ya kandaa-o ni, Hala co vanaa nɔ kɔlta sandaalan-nda ciindiaa-o pɛɛn.

¹² Yamanɔ sandaa Hala co ni, lepalaa-lepala ò nɔla mò tuulu kɔl.

¹³ Te yaamɔɔ mangala kela ndɔ vɔɔndo le, Hala cɛɛŋa mɔɛi ndɔɛi cɔwve, o sim kpeekpei, o yulul ndu kpaasiaa,

¹⁴ o toosiaa ɲɛm cɔvun dii vana-on, o bɛɛndiaa kɔɔn nɛyaa-nɛyan leyinndon.

¹⁵ Tofa vɔ! Vanndo cua pɛ foli dɛnɛ vɔɔndo, mò mɛ a yɔŋ vɔɔndo, o velu còòlan.

¹⁶ O tow pɛ soon yingilaa, o del o soon ndu pila tow kon-ndo nin.

¹⁷ O kon, dɛnɛ palaa o toosiaa-o del ndu pila o lebol, kɔlvesɛi ndɔɔ hulun ndu pila o kpokpo.

¹⁸ I candunin Mɛlɛka mɛɛ sandii ndɔɛi co yɛ, i solinin condei a diola Mɛlɛka lan o sondo, Hala-Hiow-Ɲɔɔn-Kpow-vo pɛɛn.