Condii lisai 68 - BII BILA

Condei le Hala nɔla dɛnndan kpow-vo lisaa

¹ Condei. Condii David-e, í fula o condun simlacinɔɔ vanaa n'condua nin-nde.

² Mɛlɛka co cɔnɔnndo, mí yaamɔaa ndɔa va sɔɔndianndo, vanaa nɔ nɛyɔn ndɔɔ-a co piɔllo ndu laci.

³ Mɛɛ kumnde ɲum nuaa yɛ, mɛɛ dukpaa tenga o yin nuaa yɛ, lende koni vanaa yɔŋ vɔɔnda co ɲumndo Hala o hɔl ni.

⁴ Kɛ vanaa sandaa co ɲaaloo dɔwnɔnndo, a co kponyoo viovɔɔ Hala o hɔl. A co huuluo a kɔlkɛndɔɔ.

⁵ La condu le Hala, la sangala diola ndɔlan o condon nin. La busa nɛiyo Vana co hunɔɔ o sow coo, o yumbuyumboo nin-ndo laci. Diola ndɔlan aa Mɛlɛka. La viow kponyoo ndu o hɔl.

⁶ O Cɛi ndɔ diandaa nin, ndu Hala, fuɲaa vííya, a Vana lɔaanun ibuŋ le vanlaandua piaandaa ndaa vi-a-o o co ni.

⁷ Hala ke vanaa co a pilɛn-nda-a yungulen ni, mò soli vanaa kaasoa o kaasoo, mà kɔɛnnun a ɲaaloo. Vanaa kɛɛ le sɔɛi ndɔɛi biyɔɔ-a daama lonin o lɛŋnde veselɛilen nin ni.

⁸ Òó Hala! Telen n fula ma va kɔlan vanaa nɔmnda laci-o, lɔ́ɔ́ n va kɔlan o lɛŋnde veselɛilen nin-ndo,

⁹ mí lɛŋnden le ɲiiya, mí halataalaa tuisi piɔɔ nɔm laci, nɔm Hala tosa ken Sinai-yo, nɔm Hala Israɛlla pɛɛn.

¹⁰ Má tuisi piɔɔ dɛnɛ kɛndɔɔ taw-taw, má mingi lɛŋnde nɔmnde yɔkpa len yoomuan luei.

¹¹ Òó Hala, lenin vanaa nɔmnda co icali ni, nɛɛ n kɛsi vanaa co o sangaa nin-nda o vanakɛndɛyɛi nɔmnde nin-nda pɛɛn.

¹² Maalii co diomndo malɔɔ, vanlaandua co Yoongu kɛndɛ kon yondaa-a co sɛ́lɛ́ taw:

¹³ Masaa vanaa cɔwva co ɲaanɔnndo, ɲaanɔnndo pila dɛ! Vanlanduaa lo cɛilan nin-nda co bolofaa cɔwvo piɔvanndo.

¹⁴ Vɛ̀ɛ̀ o hèélan nin niaa lonin ihini ni? Kumbannda poonpoondo la co latoosiaa a volin latámán, bɔɔla ndɔlan la co maa n'siani.

¹⁵ Telen Vana-Kpaayaa-Kpow puusiaa masaa, má sɛŋin o lɛŋnden nin-ndo, piɔɔ mɛmma n'kpungbaa va siaa o pembei Salmɔn coo.

¹⁶ Pembii diandɛi pembei Basan co ni, Pembii nɔ dúkúdúkùlan taw-ve i co ni, Pembei Basan pɛɛn.

¹⁷ Nɔm pembii nɔ hee dúkúdúkùlan taw-ve, le kɔlɔ yɛɛ n co yɛ pembii Hala hɛli le calle lecoo-e paŋalaa, nɛɛ Mɛlɛka vanin icali le fɛɛn a fɛɛn-nda pɛɛn?

¹⁸ Hala nɔ ɲɛla ɲaanannda cɔlua nan-ndan taw-taw, la co vàálan o vàálan nin. Maalii co lan tɛɛn o pembei Sinai coo, o fonda diandaa.

¹⁹ Nɔm Mɛlɛka, mɛɛ n va helɔɔ o pembei coo, le calta nɔmndan kilaa lon, ma hel a vanaa n bii-a, mí vanndacieea yɔngu nɔm ɲɛm-kéan. Hali vanaa simul nɔm-nda bɛɛ, má bii ɲɛm-kéan nda o ba.

²⁰ Biiloo co le Mɛlɛka lepalaa-lepala, o co naa kpekulan solio lepalaa-lepala-o. Hala kon co Vana ciindiaa naa ni.

²¹ Hala ciindiaa vana-o Hala naa co ni, Maalii, o co Hala-o tosà ni mì n tiwba le piɔ́mndo kpakpalaa.

²² Kɛ Hala pesipesinin yaamɔaa ndɔa bolle, o co yaamɔaa ndɔa dɔawnun kan ɲaale o dɛnɛ vɔɔndo tosaa nin-nda kpokpolan pesi.

²³ Maalii dimi aa: «I cuunin niaa yaamɔɔa fulaa Basan, i cuunin nda fulaa o mɛmma ihɛllan bɛngu.

²⁴ O kon la nɛwnin kooma ndan, mì tunaa niaa de visin yaamɔaa kan.»

²⁵ Òó Hala, vannda co nɔm cɔu hunɔɔ! Vannda co nɔm Hala, nɔm co Masa nuu-o cɔu hunɔɔ a vannda kɔɔli o Cɛi-Diandaa nin.

²⁶ Vanaa solia n'condua co kɔlan nda laci, Felengia laandua nda co kɔlan tɛɛn a dundulan lɔɔ, mì vanaa ɲɛ-caa nda va nda kɔɔli.

²⁷ La mel Hala balika o bɔŋannda niaalan, la mel ndu Mɛlɛka balika, niaa cɛn tum o polale Israɛl-ten coo-a.

²⁸ Yungu Bɛnyamɛn-ndo co nda laci ni, Bɛnyamɛn, polale hiow nda dɔɔnanndo len pɛɛn. O nda kɔɔli, simlacia fula o polale Yuda len nin-nda, a nɔ volɔɔla sɔɔlalan lekɔɔ-a. O kan kɔɔli, simlacia fula o polale Sabulɔn-nden nin a o polale Nɛftali len nin-nda.

²⁹ Òó Hala! Tosa mɛɛ kpaaya nɔmndo co yɛ. Cɔm naa kpaaya nɔmndo mɛɛ n tosa paandu yɛ.

³⁰ Cɛi nɔmndo co Cɛi latɔ́ɔ́-tɔ́ɔ́ Yerusalɛm ni, lon masaa co nɔm ɲɛm-kéan ndan yoo ni.

³¹ Tuisi visi co o kpɛ̀ndɛ̀an nin-ndo dɛnɛ palaa coo, tuisi vanaa connun maa navaa tovaa kunda-a a vanaa nda veelu aa navaa téndéa-a dɛnɛ palaa coo. A va vulan baŋɔɔ nɔm o labɛngunin má va nɔm volion yɔngoo taw-va pɛɛn. Tow vanaa yeema kan cɔwlan-nda, mà sɛŋin.

³² Vanaa bɛndua cannin Esipte, mà hin a ɲɛm cɔwnun a daɲan-ndon. Etiopiia hunnin a kiltan, mà heelu balan o nɔm Hala lo.

³³ Niaa masɛi co o lɛŋnden coo-e, la solul Hala condon, la solul Maalii condon mì la lisa ndu.

³⁴ La solul Ó co kelaa lɔ́ɔ́-lɔ́ɔ̀ o halataala kabi masindɛ-o condon. Tofa vɔ, o co diomnde solio, o co deŋio coocoo kpélén a diom ndɔ kpaayaa.

³⁵ La sina kpaaya Hala-o, ndu nɔ masalen Israɛlla coo ni. Kpaaya ndɔɔ hiow halataalaa helɔɔ.

³⁶ Hala kpúlúnkùmaa o co o Fonda ndɔ Diandaa nin ni, Hala Israɛlla co vanaa ndɔa kpaayaa yɔngoo, o co nda yoomuan lueiyo. Biiloo co le ndu Hala!