Condii lisai 61 - BII BILA

Hala, i yeema mì va o nɔm ndo cɛinin lɔ́ɔ́-lɔ́ɔ̀

¹ Condii David-e, í fula o condun simlacinɔ vanaa n'condua nin-nde. A ɲɛ-caa iyoo o soli condei he ni:

² Éé Hala, tuei cɛɛŋɔnnda nilan, yaŋnun piɛile nilen.

³ I co o lɛŋnden mɛɛlulan mì co nɔm veeloo, kani sanga kɔllo co ya coo. Yɔɔ ya o pow kpova ya nɔla tiiya coo loo coo.

⁴ Kani nɔm co nɛɛ nia viannannda ni, nɔm co cɛi coocoo vian ya le yaamɔaa nia-o ni.

⁵ I yeema mì va lɔ́ɔ́-lɔ́ɔ̀ icali o cɛi-kola-toandaa nɔmndo bɛngu, mì va vionnɔnndo o kumbannda nɔmndan bɛngu.

⁶ Kani nɔm Hala, a tuei yeemɛi nii, má ke ya kɛ́ vanaa co diola nɔmndan biiloo-a sɔla-o.

⁷ Cɔɔlu yoomu masaa bɛndi, mì vɔsila ndɔlan la cɔɔlun le fɛɛn a fɛɛn.

⁸ Màá o va masalen tosaa nɔm Hala o hɔl lɔ́ɔ́-lɔ́ɔ̀, mì kaola nɔmndo a toɲa nɔmndo va ndu kandaa!

⁹ O kon, i vanin diola nɔmndan sangalaa lɔ́ɔ́-lɔ́ɔ̀, i vanin ciɛ́ɔn ya cua-on peeloo lepalaa-lepala.