Condii lisai 6 - BII BILA

Mɛlɛka tuei piɛile nilen

¹ Condii David-e, í fula o condun simlacinɔ vanaa n'condua nin-nde. A banga yoei ŋɔmaa-o vana soli ndi ni.

² Éé Mɛlɛka! Soaŋ ya o kɔltuw nɔmndo nin te, saangiaa ya o hiilɛi nɔmnde nin te.

³ Tuinun ya iɲíí, Mɛlɛka! I co bɔɔ ɲawvo. Singi ya, kani paala nilan kpow la co ɲiiyaa.

⁴ I yɔŋnun yoloma-yoloma. Éé Mɛlɛka! Háá lɔ́ɔ́ kuɛɛ ya lo yɛnin o hee nin?

⁵ Muungu, Mɛlɛka, ma baŋa yoomu nuu. Ciindiaa ya, kani vana lo o lediom coo-o n co ni.

⁶ Bau vanndo vi pɛ, o yiyan ndɛ a nɔm o kɔɔ le. Ɔ́ɔ̀ vana lisanin nɔm ciee-piɔ́m-ndo?

⁷ I sanga nin a cɛɛŋɔnndan ndan. Icɔl oo icɔl, i co kpele nuu pɔɔliaa a caŋndo, i co kpele nuu liwviaa a mɛmɛan.

⁸ Le tùú yaamɔaa nia co sɛ́lɛ́ taw-vo, hɔlta nilan la yɔŋnun yifidii a mɔnɛi, i co lɛ cɔ valan a lan te.

⁹ La fàŋán ya ikɛi, niaa vanaa tosaa dɛnnda vɔɔnda ha! Kani Mɛlɛka tuei caŋnda nilan.

¹⁰ A toɲa, Mɛlɛka tuei tɛɛlɔn nuu, o cɛl piɛile nilen.

¹¹ Màá siɛmbulan la tol yaamɔaa nia kpow! Màá siòònde bii nda, mà ɲiiya a siɛmbulan!