Condii lisai 59 - BII BILA

Éé Hala nuu, baŋa ya yaamɔɔa o ba!

¹ Condii David-e, í fula o condun simlacinɔ vanaa n'condua nin-nde. A ɲɛ-caa nɔ diolan aa: «Tɛ́ɛ́mbùù le»-o o soli ndi ni. Tuma Saul vem vannda cɛiyo balɔɔ le David diyɔɔ-o ndu David soli condei he ni:

² Éé Hala, baŋa ya yaamɔaa nia o ba, ciindiaa ya vanaa co ya simullo-a.

³ Baŋa ya vanaa yɔŋ vɔɔnda o ba, ma ciindiaa ya vanaa diuvaa n'vannda o ba.

⁴ Tofa vɔ mɛɛ nda co ya mɛngɛlaa yɛ. Vanaa langbaa kalla co ya dúmbóó yiiyo, nduyɛ, i co vana diyaa n'van te, i tosa dɛnɛ vɔɔn kɛ́-kɛ̀ le, Mɛlɛka.

⁵ I tɛɛmbuu bɛɛ ɲɛ-ɲɛ nuaa le, kɛ vannda ha co hunɔɔ a kiltan, à co bɛɛndianndo. Cɔn Mɛlɛka! Hun ya diomɔɔ ma mɛɛndan.

⁶ Sisa Mɛlɛka, Hala-Nɔ-Kpaayaa-Kpow-vo, nɔm Hala Israɛlla. Cɔn ma tuisi vanaa-mangalaa-isɔɔa ha kpow sangaa coo. Tuínùn vanaa kɔlvesɛyaa yiyaa ladúmbúa ha iɲíí le.

⁷ Icɔl, a muungu a pɛɛliaa a yolɛi maa n'tun, à cɛn à balu cieo sɔ́.

⁸ Dɛnɛ vɔɔndo co nda o piaa o lasondo cá, sɔɔn fula nda o sondo-on co n'luɛyaa maa mɔɔn cɔw. Nɛ̀ɛ́ celen tuɛi yɛ nda diom?

⁹ Kɛ nɔm Mɛlɛka, a co nda mamɔɔ, a co vanaa-mangalaa-isɔaa kan kpow mamɔɔ.

¹⁰ Nɔm ya co tofaa ni, nɔm vana co ya kandaa-o, kani nɔm Hala co fonda ni mayoomoo ni.

¹¹ Hala co ya dɛnɛ kɛndɔɔ tosallo-o co hunɔɔ ya laci, o co vanaa co ya congoo-a cɔɔmuuo ya hɔl.

¹² Nɔm Maalii, nɔm co kɔɔ cɔwvo le naa-o, dii nda le, yɔŋii yungu nuu pɔɛɛnun nɔla nɔmndo. Hiiluu nda a kpaaya nɔmndo, mà deli.

¹³ Vanaa kan co hakilan cuaa a sɔɔn nda co solinndo o lasondo-on. Màá nda pila biinun a sɔɔn yongan ndan mún! Kani a co keiyo mɛɛnianndan a sɔɔn lacòòvan dimio.

¹⁴ Cii nda kpow a kɔltuwvo, cii nda mà ɲum le fɛɛn a fɛɛn. O kon mì vannda sina maa háá o lɛŋnden mɛɛlulan, nɔm Hala Hiow-ɲɔɔn-kpow-vo co masalen tosaa pulun Yakɔb-on coo ni.

¹⁵ Icɔl, a muungu a pɛɛliaa a yolɛi maa n'tun, à cɛn à balu cieo sɔ́.

¹⁶ A co kelaa ilaasi-laasiei ɲɛdiaa nuwviaa, taa seelun ɲɛ-ɲɛ le, a lɔl ŋɔɔcianndo pii.

¹⁷ Kɛ ya ya, i lisanin kpaaya nɔmndo o condon nin. Idii, i lisa sakpoyɛi nɔmnde. Kani fonda mayoomoo n co le ya ni, nɛɛ viannannda o palɛi ya và o buulanndo nin-nde nin.

¹⁸ Òó nɔm Hala co kpaaya nuu-o! I solinin condon le nɔm lisaa. Kani nɔm Hala co kpaki nuu ni, nɔm co vana co ya dɛnɛ kɛndɔɔ tosallo-o ni.