Condii lisai 55 - BII BILA

Piɛile vana nda pala-o soli len

¹ Condii David-e, í fula o condun simlacinɔ vanaa n'condua nin-nde. A ɲɛ-caa iyoo o soli condei he ni:

² Éé Hala, yaŋ nilan o piɛile nilen! Viaŋnun ya tuma ya co cɛɛŋɔnndo nɔm o lani-o le!

³ Tuei ya diom, ma mulul-la. I co laasianndo a yoomoo fúù-fùù, i muungu yoloma-yoloma,

⁴ le tueyɔɔ ya co yaamɔɔ nuu sɔɛi-yo, a le kɔlvesɛi vanaa kɔlvesɛiya co ya tuisio coo-o. À co ya dɛnɛ palaa tuisio coo, à co ya tolɔɔ kɔɔli a kɔltuwvo.

⁵ Kɔllo co ya ɲiiyaa nin nákà-nàkà, siòòŋii piɔ́mnde tol-la coo.

⁶ Siòònde a buulanndo simbu ya, misimisio tiw ya o n'dial kpede.

⁷ I va yiyanndo aa te yáà sɔla pɛ kumbanndan maa poonpoon, i va cɔnɔn mì yáà kɔɛnnun nɛɛ celen.

⁸ I va ɲaanɔn levil-vil, mì yáà kɔɛnnun o lɛŋnde veselɛilen nin.

⁹ I va keleŋa poondan mì yáà nuwviaa nɛɛ viannannda. I va hoeyii fùkù-fùkùei a felenfelenndo hiovɔɔ keleŋaa.

¹⁰ Éé Maalii, puusiaa tuula vanaa kɔlvesɛiya ha, ma luei nda diomnda hiŋanndan tɛɛn. Kani dɛnnda kpoku-kpokulan a sɔngɔlan kínɛí ya co cɔu o kobio ho nin ni.

¹¹ Niinoo a lɔan, a co keiyo o kpaki kobio coo. Dɛnɛ vɔɔndo a delɔɔcoo co bɔɔ o kobio ho nin.

¹² Diuvanndo tuŋ co lenin ni, delɔɔcoo a kafalan la co cuvɔɔ lenin te.

¹³ Te ndóò va pɛ yaamɔɔ va ya pɛ yeowlan ni, yáà tiwba mì yáà biwnun. Te vana nɔ nɛyɔn nuu-o ndóò simul-la ni, yáà nɔla mì yáà vennun ndu.

¹⁴ Kɛ nɔm ni, nɔm co vanacieo maa ya-o, nɔm caan nuu, nɔm vana co naa nɔm lɔ́ɔ́-lɔ́ɔ̀-o,

¹⁵ nɔm vana náà n cii paandu balio-o, nɔm náà n va kɔlan o Cɛi-Hala-o nin sɛ́lɔ́ɔ́ tɛɛn-ndo!

¹⁶ Màá piɔ́mndo voolu yaamɔaa nia, mà tol a kiyɛi kpow ciee-piɔ́m! Kani dɛnnda kɔlvesɛilan la co lapiaa nda o lakɔl.

¹⁷ Ya ya, Hala ya co piɛiyo ni, nduyɛ, ndu Mɛlɛka ciindiaanin ya.

¹⁸ Icɔl, idii, a ipala déŋ, i co yoomula ifùù-fùùe a somisominndo. O co ya diomndo tueyɔɔ.

¹⁹ O ke ya kɔlɲuloo, mó baŋa yoomu nuu. O cii vanaa va ya ciŋilanndo-a cɔlɔba. Vanaa kan yɛ, a va sɛ́lɛ́ taw.

²⁰ Màá Hala tuei sɔɔn ndan, mò tuisi nda siɛmbulan, ndu co Masaa kabi sindɛ-o! Kani vanaa kan mangalanin kela ndaa le, a nɔ siòòŋii Hala le.

²¹ Caan nuu lɔ́ɔ́ kon bii vanaa nda va kelaa o kɔlɲuloo nin-nda. O peelu kpema o yii-o le.

²² Sɔɔn ndɔn sondon hiow lɛan yeelaa, kɛ cɔwvo co ndu o kɔl ni. Sɔɔn ndɔn co hili-hili hiovɔɔ cuɛiyan, kɛ maa mɔɔn cɔw n lɔwviaa vana ni.

²³ Mal Mɛlɛka sɔɔn nɔmndon o ba, mò toosiaa kpekula nɔmndan. O melnin vana sandaa siɛlaa mò del te.

²⁴ Nɔm Hala yɛ, a tuisinin nda o sɛiyo nin, Vanaa co vannda diwvo-a a vanaa kɔlkalu vɔɔnda. Palɛi n kilu nda le yoomu ndaa-e, à tiiyanin ndi bɛɛ tɛɛn te. Kɛ ya ya, nɔm ya tiindan ni.