Condii lisai 53 - BII BILA

Vanaa laalannda a Hala ndaa co o ceen luɛyɔɔninndo nin

¹ Condii David-e, í fula o condun simlacinɔ vanaa n'condua nin-nde. A sɛ̀ŋnden o soli condei he ni aa:

² Diɔmnda co dimio o kɔlta ndalan nin aa: «Hala co le.» A cuu laasian, má tosa dɛnnda nɔɔlɛilan, vana-vana co dɛnɛ kɛndɛ tosa o nda tɛɛn te.

³ Hala co coocoo o halataala, o co vanndacieea tofaa lɛŋ, le sinaa te vana pum co lon, ó nɔ kɔlkaloo, mó va ndu Hala nuwviaa-o.

⁴ Kɛ nda kpow, a mal nɛiyo má laasian. Vana-vana co dɛnɛ kɛndɛ tosa le, o pilɛ bɛɛ.

⁵ Hala dimi aa: «Vanaa co kan dɛnnda vɔɔnnda lan tosaa-a kpow a nɔ kɔlkalu le. Á co kan yungu nuu dioo mɛɛ vana dia ɲɛdiaa nuaa yɛ-a, à co bɛɛ ya Hala piɛi le.»

⁶ A ɲiiyanin a siòònde, nda vanaa siòòŋii ndíì bii kan te-a. Kani Hala saŋnin paala vanaa co yungu ndɔɔ saangiaa-a. Siɛmbulan la toalnin nda, kani Hala kɛɛ nda.

⁷ Àá mbɔ̀! Nɛ̀ɛ́ fula yɛnin Siɔn mò hun ciindiaa Israɛlla? Tuma Hala mangalanin dɛnɛ vanaa ndɔa-o, cuavaa Yakɔb dɔawnunnin ɲaale, Israɛlla naŋnin kɔl.