Condii lisai 52 - BII BILA

Mɛlɛka tɛɛmbuunin vana co bolofaa ndɔɔ tiindanndo-o

¹ Condii David-e, í fula o condun simlacinɔ vanaa n'condua nin-nde.

² Telen Doɛk Edɔmnɔ kɔɛ o Saul-lo, mó dimul ndu aa: «David kɔɛ o Ahimelɛk lo-o» ndu David soli condei he ni aa:

³ Nɔm vana kpaayaa ho sei! Le yɛɛ n co yɛ lisanndo le dɛnɛ vɔɔn n tosa hoo-o? Vanakɛndɛyɛi Hala-e vanin le lɔ́ɔ́-lɔ́ɔ̀.

⁴ Nɔm nɔm, tuula diuvaa n'vanndan koni la co nɔm o sondo ni. Maa kuisii luɛyaa sondo nɔmndo co le vannda dúmbúlan yiiyo ni.

⁵ Dɛnɛ vɔɔndo hiow nɔm hɛnan a dɛnɛ kɛndɔɔ, kafalan la hiow nɔm hɛnan a toɲaa.

⁶ Sɔɔn nɛyaa-nɛyaan hɛnan nɔm dimio ni, sondo huiyaa n'vanndo sondo nɔmndo co ni.

⁷ Lelan nɔm bɛɛ, Hala co nɔm tɛɛmbuu le fɛɛn a fɛɛn. O koondannin nɔm, mò soli nɔm o cɛi-kola-toandaa nɔmndo nin, mò faŋa nɔm o ceendo vanaa yoomaa ho coo.

⁸ Vanaa sandaa canin dɛnɛ kon, mà siòònde bii nda. À mamnin nɔm aa:

⁹ «La tofa vɔ langbanɔɔ ho, o ve Hala cɔ maa vana kandaa ndɔ le. Bolofaa ndɔ bɛndoo ndóò tiindan ni, a dɛnɛ palaa o va caanda tuisio coo-o ndóò kandan ni.»

¹⁰ Kɛ ya ya, i connun o Cɛi-Hala-o nin maa oliviee puiyaa. I co vanakɛndɛyɛi Hala-e tiindanndo lɔ́ɔ́-lɔ́ɔ̀.

¹¹ I vanin nɔm Hala lisaa lɔ́ɔ́-lɔ́ɔ̀ le ɲɛ n tosa-o. I tiindan diola nɔmndan, kani a naŋ le vanaa lo o lediom coo a nɔm-nda.