Condii lisai 51 - BII BILA

Mɛɛ vana piɛi Hala mò mal vana haki yɛ

¹ Condii David-e, í fula o condun simlacinɔ vanaa n'condua nin-nde.

² Telen David suunda a Bat-Seba mí Natan vana-tɛɛngaa-diom Hala-o komal ndu-o, ndu David soli condei he ni:

³ «Éé Hala, tuinun ya iɲíí mɛɛ kaola nɔmndo co yɛ. Mɛɛ vanakɛndɛyɛi nɔmndo co ibɔɔ yɛ, ɲumi hakila nilan.

⁴ Pulu ya cɛ́kɛ́lɛ́ le tɛɛmbuu nuu, ma dindi ya le haki ya tosa-o.

⁵ Kani i sina tɛɛmbuula nilan. Nduyɛ, i co haki nuu cɔnnɔnndo ya o hɔl lɔ́ɔ́-lɔ́ɔ̀.

⁶ I cua hakio a nɔm, nɔm pilɛ kpé, mí tosa ɲɛ co yɔŋ vɔɔndo nɔm o hɔl-lo. Le hee, sɔɛi-sɔɛi n dimi pɛ, a nɔ dí, yamɛi n kilunin ya-e venin yamɛi lakafa le.

⁷ O hakio nin ya velun ni, o yɔŋ vɔɔndo nin kala nuu cua foli nuu ni.

⁸ Kɛ ɲɛ hɛnan nɔmn-ndo, ndu co toɲa co o kɔllo nin di-o ni. Pɛɛku ya kɔlkaloo o kɔl nuu nin di-di.

⁹ Ɲumi haki nuu a hisɔp, mì dendu. Pulu ya, mì hiow fengbɔɔ diondɔɔ.

¹⁰ Tosa mì tuei condun kponyon a condun kɔlkɛndɔn. O kon mì dɔwnun ɲaale, ya vana n yimi hoo paalan-ndo.

¹¹ Faŋa hɔlla o hakila nilan. Vɔɔsuu yɔŋnda nila vɔɔnndan kpow.

¹² Òó Hala! Cɔw kɔllo ya nin o diandaa, mingi yiyan nuu o sɛnɛi, ma simi ndu yili.

¹³ Viaw ya ma faŋa ya nɔm o hɔl te, Hiálù kɔl nɔm diandaa ya o ba le.

¹⁴ Mingi ya ɲaale vana sɔla o cinda nɔmndo nin-ndo o kɔl, mì yiyan yeemɛi kɛndɔɔ sim ya mayoomu.

¹⁵ O kon, i pɛɛkunin vanaa co nɔm simullo-a nɛila nɔmndan, mì vanaa lahakia muungu nɔm o ibuŋ.

¹⁶ Òó Hala! Nɔm co vana ciindiaa nuu-o, baŋa ya ma soli ya piɔ́mndo o ba. O kon, i yondanin a ɲaaloo, mì diɛɛmule nilen le cɔm sandii nɔmndo.

¹⁷ Maalii, kumbi cɔcɔn nun, mì sondo nuu lisa nɔm.

¹⁸ Kani o co sálàlan te la tosa ma hini kɔl te. Te ndóò va pɛ lende, i va nɔm sálàlan solul. O co sálàla loamaalan te la hɛnan nɔm te.

¹⁹ Ɲɛ hɛnan nɔm-ndo co yiyan tuisianndo ni, kɔl tuisian tootoo ndu, kɔl mangalanndo, a pɛɛsa ndu maa kɛɛ ndu le.

²⁰ Tosal Siɔn dɛnɛ kɛndɔɔ a kɛndɛi nɔmnde, mingi kpakilan Yerusalɛm tangul.

²¹ O kon ma cɛl sálàla dɛnɛ sandaalan, sálàla loamaala kpúlúkálan pɛɛn. O kon kɔɔli, n solinin navaa tovaa sálà o fonda-loamaa-lasálà nɔmndo coo.»