Condii lisai 5 - BII BILA

Piɛile vana kɔɛ Mɛlɛka o hɔl-lo piɛilen

¹ Condii David-e, í fula o condun simlacinɔ vanaa n'condua nin-nde. A sɛ̀ŋndan vana soli ndi ni.

² Éé Mɛlɛka! Yaŋnun sɔɔn nun mun, ma bii cɛɛŋɔn nuu bila.

³ Éé Hala nuu, Masa nuu, tuei veelu ya co nɔm-ndo! Nɔm ya co piɛiyo nuaa ni.

⁴ Idii púŋ Mɛlɛka, a tuei ya diom. Idii púŋ i bɛɛndian le kɔlan nɔm o hɔl, i cal niko cumndo.

⁵ Kani nɔm, a co Hala naŋ kɔl a dɛnɛ vɔɔndo le, vana yɔŋ vɔɔndo cel nɔm ikɛi le.

⁶ Vanaa sondo bɛndua sim nɔm o hɔl te, vanaa pala caanda-a nɛinun nɔm bɔɔ!

⁷ Tɛɛmbuuo n tɛɛmbuu vanaa dimia lacòòvaa ni. Vanaa diuvaa n'vannda a vana nɔ kɔlkalu vɔɔndo-o nɛinun nɔm bɔɔ!

⁸ Kɛ ya yɛ, le lo n lo o lediom coo-o, i co luɛyɔ̀ɔ́ o nɔm ndo cɛinin, le vulan baŋɔɔ nɔm o labɛngunin a bɛɛlen o cɛi nɔm diandaa hɔl-ndɔ.

⁹ Mɛlɛka, sim ya laci o dɛnɛ sandaa nɔmndo nin le vanaa co ya cɔlɔbaa-a. Peelu nɛi nɔmndo tɛ́lɛ́lɛ́ ya laci.

¹⁰ Toɲa oo toɲa co nda o lasondo le, kɔlta ndalan la co lapiaa cá a tuula vɔɔnndan, bolola ndalan la co maa sɛi piɔlɛi, sɔɔn caan koni n co nda o lasondo ni.

¹¹ Òó Hala! Yaala nda, mì tuula ndalan la tɛɛmbuu nda pila. Kɛɛ nda le hakila ndala cuu cɔm te lan, kani a ciŋilan nɔm.

¹² O kon, mì vanaa co vionnɔnndo nɔm o ibuŋ-nda a dɔwnun ɲaale. Mà va yondaa a kɔlkɛndɔɔ le lɔ́ɔ́-lɔ́ɔ̀. Mì vanaa kaola nɔm-nda kpow a soli condon a ɲaaloo. Nɔm co nda kandaa ni.

¹³ Kani nɔm Mɛlɛka dɔaw vanaa sandaa duaa ni, mà balu nda a kɛndɛi nɔmnde mɛɛ kɔ̀ɔ̀ cɔwvo kanda vana yɛ.