Condii lisai 49 - BII BILA

Vanacieo vi pɛ o kue a ɲɛ-ɲɛ le

¹ Condii poaa Kore-a, í fula o condun simlacinɔ vanaa n'condua nin-nde.

² Niaa vanndacieea súúlan kpow, la tuei-yɔ! Niaa vanaa co o ceendo coo-a kpow, la yan-ndɔ nilan!

³ Niaa vanaa pɔmbɔa a niaa vanaa bɛndua, nia vanaa bolofaa a niaa vanaa bala fondoa kpow, la yaŋnun!

⁴ Sondo co sɔɔn kɔlkalon dimio. Kɔl nuu co yiyannda kɔlkalulan solio.

⁵ I yaŋnin nilan ɲɛkɛndɛi le talela kɔlkalulan tueyɔɔ, i tɛɛsiaanin sɔɔn kaaman o diom bangaa bɛngu.

⁶ Le yɛɛ siòònde bii yɛnin ya o palɛi dɛnɛ palɛi, telen vanaa yɔŋ vɔɔnda balunin ya le ya delɔɔ coo-o?

⁷ Ɲɛ-sɔlaa ndaa nda co tiindanndo ni, a co kuundianndo a bolofaa nda bɛndoo.

⁸ Kɛ vana-vana tiwba mò baŋa puapilɛ ndɔɔ le. Vana-vana nɔla mò yɔngu Hala ɲɛ pum le yoomu ndɔɔ baŋaa le.

⁹ Yoomula ndalan le kendu bɔɔ báà le lan nɔlaa baŋaa. Ken nɔla tosanndo lɔ́ɔ́-lɔ́ɔ̀ le.

¹⁰ Vɛ̀ɛ̀ nda lonin yoomu le lɔ́ɔ́-lɔ́ɔ̀ ni? À tulnin o sɛiyo nin te?

¹¹ Vannda co cɔu maa vanaa kɔlkalua co vuo, diɔmaa sondo vesɛiya a vanaa nɔ kɔlkalu le-a bɛɛ a co piɔ́mndo sɔlaa. À co ɲɛm ndan vanaa celen mello.

¹² A co yiyanndo maa yondola ndalan la vanin le nda le lɔ́ɔ́-lɔ́ɔ̀. Kɛ sɛilan la vanin calta ndalan le fɛɛn a fɛɛn ni.

¹³ Vanacieo, a ɲɛm kɛndɛn o co nin-ndon kpede, o lonin yoomu le. Paale pum, o vunin mɛɛ visia vu nuaa yɛ.

¹⁴ Tofa vɔ ɲɛ co le vanaa co nda pila tiindanndo-a-o, siɔdii laci vanaa yeema mì vannda yaŋ nda nilan-nda pɛɛn:

¹⁵ A co nda yɔɔ ciee-piɔ́m maa n'saa, mì piɔ́mndo dɔwnun balo a nda. O lo cobe mì vanaa dendu kɔltan-nda nɛw nda a labɛngu, mì naŋɔɔ nda kon tambu, mà kɔɛ cɛila ndala lemasalan levil.

¹⁶ Kɛ Hala solinin yoomu nuu ciee-piɔ́m o ba, Lekɛ́ndɛi, o puunin ya piɔ́mndo o ba.

¹⁷ Buulan te, te vanndo co pɛ bolofaa sɔlaa, mì ɲɛ kɛndɔɔ va hiovɔɔ laci o ndu lo cɛinin.

¹⁸ Kani lɔ́ɔ́ o vunin-ndo, o kuenin a ɲɛ-ɲɛ o ba le, ɲɛ-sɔlaa ndɔɔ dimnin ndu nɛiyo kɔɔli ciee-piɔ́m te.

¹⁹ Hali o va bɛɛ kulanndo telen o co yoomu-o, mì vannda va ndu candɔɔ le ceen ndɔ kɛndɔɔ,

²⁰ a kon kpede, mɛɛ mò dem fuɲaa ndɔa mamaa, á ci lɛnin ɲɛ-tengaa lɔ́ɔ́-lɔ́ɔ̀ le-a.

²¹ Vanacieo, a ɲɛm kɛndɛn o co nin-ndon kpede, o lonin yoomu le. Paale pum, o vunin mɛɛ visia vu nuaa yɛ.