Condii lisai 48 - BII BILA

Yerusalɛm, kobi Masa bɛndoo

¹ Condei. Condii poaa Kore-a.

² Mɛlɛka co o bɔɔ! Le ndu lisaa kpow bɛnda o kobi Hala naa nin a o pembii ndɔɛi diandɛi coo ni.

³ Yerusalɛm co o heelaa o naŋɔɔ nin, o co kɔlkɛndɔɔ yɔngoo o lɛŋnden kpow coo. O pembei Siɔn coo, i co a ba luaŋ-ndo-e, lon kobi Masa bɛndoo co ni.

⁴ O cɛila coocoolan Siɔn nin, vannda kpow a sina maa kpakio Hala co ni.

⁵ Kani tofa vɔ, masaa ndáà yiinan, mí ndáà hun latulu le Siɔn cɔlɔbaa.

⁶ Ndáà cɔu dɔ́ɔ́ Mɛlɛka, má dɔawnun kɔndɔfili, mí siòònde bii nda, má piɔl.

⁷ Má ɲiiya o foofo lon, mí ɲɔɔ nɛi nda mɛɛ o nɛi vanalanɔɔ o violɔɔ nuaa yɛ.

⁸ Má tambu mɛɛ hoeyii fula a ba paalen le can-ndo-e i tɛɛmbuu dɛ̀ndɛ̀la mamɛnndan Tarsis nuaa yɛ.

⁹ Sɔɔn naa n tuei-yon, mun naa n ce nuaa o kobi Mɛlɛka-Nɔ-Kpaayaa-Kpow-vo-o nin ni, o kobi Hala naa nin aa: Hala lueinin kobio ho yoomuan le lɔ́ɔ́-lɔ́ɔ̀.

¹⁰ Òó Hala, n co kɔllo keelaa o vanakɛndɛyɛi nɔmnde coo, o Cɛi nɔmndo nin.

¹¹ Òó Hala, lisa nɔmndo tiiya o lɛŋnden mɛɛlulan di mɛɛ diola nɔmndan la tiiya lon yɛ. Ba kɛndɛ nɔmndo co o piaa cá a dɛnɛ sandaa.

¹² Pembei Siɔn co a ɲaaloo, kobila co o tàndá Yuda-o nin-ndan la co a kɔlkɛndɔɔ le yaman n co kiolɔɔ-on.

¹³ La balu vɔ Siɔn mì la kela lenin, mì la cɔm cɛila cumulaa coocoola co lenin-ndan.

¹⁴ La mɛɛndian-ndɔ kpakila ndɔlan, mì la tofa fondala ndɔla mayoomulan ɲɛkɛndɛi, le vanaa hun vialunnin-nda dimullo

¹⁵ maa Hala hoo co Hala naa le fɛɛn a fɛɛn ni, o vanin naa simndan laci háá o mɛɛlulan.