Condii lisai 45 - BII BILA

Condii kaolaa-i

¹ Condii poaa Kore-a, í fula o condun simlacinɔ vanaa n'condua nin-nde. Condii kaolai, ì vana soli a ɲɛ-caa iyoo-e.

² Kɔllo co ya yusaa nin le sɔɔn kɛndɔn dimio, i co dimio aa: Le masaa dɛnnda nilan la co ni. Màá diɛɛmule nilen le siŋnun maa kpɛ̀kile vana sɛvaa kɔlkaloo!

³ Nɔm hiow vanndacieea kpow naŋɔɔ ni, sɔɔn sɔvɛɔn kínɛí n fulà nɔm o sondo ni. Lelan Mɛlɛka dɔw nɔm duaa ni le fɛɛn a fɛɛn.

⁴ Yiinun mɔɛi nɔmii cɔwve o càŋ, nɔm kuubanɔ kpaayaa ho. Mɔɛi ken cɔm biilu nɔmndo a naŋɔɔ nɔmndo ni.

⁵ A naŋɔɔ nɔmndo, hel ma piasa o ɲɛ ɲaandan nɔm cɔlua nan-ndo coo. Hel lecoo le toɲaa, le vanakɛndɛyɛi a le dɛnɛ sandaa! Kindu yoole kpaasiaa nɔmndo, Kpaasiaa kon viam ba nɔm kɛndɔɔ dɛnnda tuw-tuwlan tosaa ni.

⁶ Kɔɔn nɔmndon co n'siɛɛmbiaa siembulu-siembulu, n co vanaa súúla celennda mɛlio nɔm o labɛngunin. Kɔɔn mun co yaamɔaa masaa kɔltan buuluuo.

⁷ Masale nɔmnden le vanin le lɔ́ɔ́-lɔ́ɔ̀ a le fɛɛn a fɛɛn. Tinda nɔm lemasaa tinda dɛnɛ sandaa o co ni.

⁸ A kaola dɛnɛ sandaa mí kɔlvesɛiyo nɛinun nɔm. Le hee Hala nɔmndo pɔla nɔm ni, mó suu nɔm cuɛima kɔlkɛndɛan, ma hɛnan ndu hiovɔɔ caaŋaa nɔmnda coo.

⁹ Cun kɛndɛ mir, cun aloɛs a cun kɛndɛ kas co o domala nɔmnda bɛndulan coo. Diom ɲɛm-caa iyoo co fulaa le nɔm kɔllo nɛŋio o cɛila lemasala nda kɛɛmiaa a ciŋun kamaalan nin.

¹⁰ Cuavaa laandua masaa co nanu, a nɔ yɔɔvala kɛndɛlan o labolo. Masa laandoo co nɔm isisi o ba kɛndɔɔ coo, ɲɛm nda toosiaa a sianion Ofir-on co ndu lekɔɔ.

¹¹ Nɔm cua sei! Tofa vɔ, yaŋ-ndɔ nilan. Pɔɛɛnun vanaa nɔmnda a yungu fuɲa nɔmndo.

¹² Màá yeemɛi bii masaa a naŋɔɔ nɔmndo! Tundun ndu o labɛngunin, kani ndu co vana nɔm bɛndoo ni.

¹³ Vannda Tir cuunin nɔm ɲɔɔn, vanaa bolofaa cuunin nɔm ɲɛm kɛndɔn le nɔm hɛnanndo.

¹⁴ Cua masaa co a biiloo o cɛi lemasaa nin, sianin nda sɔɔluu doma ndɔ bɛndoo-on co volio ŋɛlɛngi-ŋɛlɛngi.

¹⁵ A co ndu yɔɔ masaa ikɛi, volɔɔla nɔ yinɔɔ súú-súù ka lan la co ndu lekɔɔ. Felengia laandua, a co caaŋaa ndɔa-a co kɔlan ndu kɔɔli le simndan masaa ikɛi.

¹⁶ A co kɔlan a nda a ɲaaloo a á kɔlkɛndɔɔ, a co luɛyɔɔ o cɛi lemasaa nin.

¹⁷ Poaa nɔmnda siŋnunnin masaa o fonda fuɲaa nɔmaa mamaa. Nɔm pila siinguunin nda masaa o lɛŋnden kpow coo.

¹⁸ I vanin vannda diola nɔmndan yiyalanndo le fɛɛn a fɛɛn, o kon, vannda vanin nɔm lisaa le lɔ́ɔ́-lɔ́ɔ̀ a le fɛɛn a fɛɛn.