Condii lisai 41 - BII BILA

Piɛile vana dɛnɛ palaa co coo len

¹ Condii David-e, í fula o condun simlacinɔ vanaa n'condua nin-nde.

² Dɛnɛ kɛndɔɔ co le vana kon, vana nɔ hɔlten vana nɔ mayoomu loo coo-o. Paale dɛnɛ palaa co ndu hinul-ten, Mɛlɛka baŋa ndu.

³ Mɛlɛka co yoomu ndɔɔ manda, mò yɔngu ndu dɛnɛ kɛndɔɔ o lɛŋnden coo, o melnin ndu mì yaamɔaa ndɔa tosa hɛnan ndaa a ndu le.

⁴ Mɛlɛka malanin ndu tuma o vanin ihini o kpele ndɔɔ coo a sangaa-o, mò cɛw ndu telen o delnin a nàá-o.

⁵ Ya, mí dimi aa: «Éé Mɛlɛka! Tuinun ya iɲíí, singi ya, kani i cua hakio a nɔm.»

⁶ Yaamɔaa nia co sɔɔn vɔɔnndon dimio a ya aa: «Ko lɔ́ɔ́ kuɛɛ o vu yɛnin, mì n pɔɛɛnun a ndu?»

⁷ Vanndo hin pɛ le ya cɔu, le sɔɔn fondon dimio ni. O hin pɛ, o pimin sɔɔn vɔɔnndon o kɔl, o fula dɔ́ɔ́ pɛ, o kɔ cɔn mun keeliaa cieo coo.

⁸ Vaanaa nɔ nɛyɔn nuu-a kpow a co ya siɔɔndiaa, a co tuula vɔɔnndan tuuvo le ya aa:

⁹ «Ɲɛ palaa vɔɔndo tol ndu coo nuaa ni. Má cè ndu ihini, o cen ndɛnin te.»

¹⁰ Hali caan ni yáà laalan-ndo, ó va ɲɛdiaa nuu dioo-o, ndu bɛɛ heelu bɛngoo le ya nɛiyo.

¹¹ Kɛ nɔm Mɛlɛka, tuinun ya iɲíí ma mingi ya simi. O kon, mì mingul nda o nda bɛnda le sɔlaa-o.

¹² Ɲɛ yɔŋ mí sina maa a kaola ya-o co hoo ni: yaamɔɔ nuu yonda lɛ maa o nɔla ya le.

¹³ Nɔm, a tosanin i venin vana tɛɛmbua isɔɔ le, A mandanin ya nɔm ikɛi lɔ́ɔ́-lɔ́ɔ̀.

¹⁴ Biiloo co le Mɛlɛka, o co Hala Israɛlla-o, kandɔɔ sindɛ pá kɔlan biyɔɔ le fɛɛn a fɛɛn! Màá ò tosan lende! Amiina!