Condii lisai 39 - BII BILA

Yoomu vanacieo bendu le

¹ Condii David-e, í fula o condun simlacinɔ vanaa n'condua nin-nde, Yedutun pɛɛn.

² «I va dimio aa: Fɔ mì mandan o kela nuu nin, yɔŋii ya cua hakio a lediɛɛmu. Te vanaa kɔlvesɛiyo co vɔ pɛ ya o hɔl, mɛɛ mì bii sondo nuu.

³ Le hee, mí meinun, i ve isɔɔ le, i ve ɲɛ-ɲɛ sɔvɛ dimi le. Kɛ i ve dɛnɛ kɛndɛ sɔla o ken nin te, sanga nuu koni va cɔɔlɔnndo ni.

⁴ Kɔl nuu va ŋɔu ya nin maa leyin. Cɛɛŋɔnnda nilan la ya kɔllo lomɔɔ maa leyin. O kon, mí kumbi sondoo, mí dimi aa:

⁵ ‹Éé Mɛlɛka! Cɔm ya mɛɛlula ceen nuu. Cɔm ya mɛɛ palɛi n kelu le yoomu nuu-e co yɛ, haliko mi sina mɛɛ ya connun ɲɛ nɛi itambu loo yɛ.

⁶ A yɔngu yoomu nuu buo maa tongii ba ninndo, Ɲɛ fondoo fúú bandii yoomu nuu i co nɔm o hɔl ni. Vanacieo co balɔɔ o pelun ndɔn coo, kɛ hoeiye daama yoomu ndɔɔ co ni.

⁷ Vanacieo co kelanndo maa levundu. O co kpekulan taw tosaa, kɛ hoeiye fúú o co ni. O co bolofaa cuungiaa, kɛ o sinà vana nɔnin ndu le.

⁸ Sisa Maalii, yɛɛ ya cal-lɛ tiindan? Nɔm pilɛ kpé ya cal tiindan ni.

⁹ Baŋa ya a dɛnnda nila vɔɔnnda kpow. Cɛl mì diɔmnda mam ya le.

¹⁰ I meinun-ndɔɔ nihau, i co lɛhau ɲɛ-ɲɛ dimi le! Kani nɔm tuisi ya hee coo ni.

¹¹ Pɛngi ya lɔɔ! Ba nɔmndo cii yoomuan soli ya o n'dial.

¹² Le vanacieo mingio o nɛi n bandìla ndu ni, ma tuisi ndu sangaa coo le tɛɛmbuula ndɔlan, ma siɔŋi ɲɛ o kɛsi kɔllo coo-o mɛɛ kaangoa sɔam ɲɔɔ nuaa yɛ. Hoeiye daama vanacieo co ni.

¹³ Mɛlɛka, tuei piɛile nilen, ma yaŋ nilan o cɛɛŋɔnnda nilan. Meilul-la o koŋul nuu nin te. Kani miallo ya co o nɔm ndo ni, vana hiawnanndo ya co nin mɛɛ fuɲaa nia mamaa yɔŋnun vanaa hiawnannda yɛ.

¹⁴ Pɛngi ya tofaa ho, haliko mì hɔlla tenga ya, lɔ́ɔ́ pá ya kɔannun, mì ɲum bòmbò.›»