Condii lisai 37 - BII BILA

Silalan le dɛnndan tosaa a kɔlkaloo a le Hala kaolaa

1 Condii David-e.

¹ Condii David-e. Tambu kɔllo a vanaa vɔɔnda le! Paŋala vanaa co yɔŋ vɔɔndo tosaa-a le!

² Kani nda keleŋanin ɲɔfɔliaa maa bil, mà simbulun maa bil puiyaa.

³ Laalan Mɛlɛka, mà tosa dɛnɛ kɛndɔɔ. O kon, a calnunnin nila ɲulu o lɛŋnden nin, ma dɔwnun balo a vanakɛndɛyɛi.

⁴ Siinguu Mɛlɛka vana n dɔawnun ɲaale nin-ndo, mò yɔngu nɔm ɲɛ kɔl nɔmndo yeema-o.

⁵ Mal dɛnnda nɔmndan Mɛlɛka o ba, ma laalan ndu, o tosanin.

⁶ O cɔmnin sandii nɔmnde vakpa maa ɲɛ-tengaa paale siaa, mò cɔm dɛnɛ sandaa nɔmndo mɛɛ ɲɔɔ tenga a paale kálà-kálàlen nuaa yɛ.

⁷ Biwnun ma cum Mɛlɛka o meiyo nin. Tambu kɔllo le vanaa dɛnndan la co bɛndaa o ba-a le, tuulu kɔllo a vanaa co dɛnndan tosaa a kɔlkalu vɔɔndo-a le.

⁸ Mal kɔltuwvo, ma mal kɔlfulaa. Tuulu kɔllo le, yɔŋii n tosa dɛnɛ vɔɔndo.

⁹ Kani vanaa yɔŋ vɔɔnda cuunin, kɛ vanaa tiindan Mɛlɛka-a sɔlanin lɛŋnden kɛ́ɔ.

¹⁰ O lo nin ɲɛ-pɔmbɔ cobe, vana kɔlvesɛi ve lɛnin te, à nuwviaanin o fonda o va-o, à seelunin vana le.

¹¹ Kɛ vanaa tuisin tootoo-a sɔlanin lɛŋnden kɛ́ɔ, a vannunnin o kɔlɲulu bɛndoo nin.

¹² Vana kɔlvesɛiyo co kɔlkalu vɔɔndo nuwviaa le vana sandaa dúmbóó yiiyo, o co ndu ciŋndon kumbillo kpangaɲan.

¹³ Kɛ Maalii co vana kɔlvesɛi kon mamɔɔ, kani o co cɔu maa paale ndɔlen le co tiiyaa.

¹⁴ Vanaa kɔlvesɛiya co mɔɔn ndan cɔwvon nanɔɔ, a co kpaasiaala ndalan kindɔɔ le vana bala fondoo a vana ikɔɔ yɔlɔɔ lɛŋ, a le vanaa co kelaa o nɛila sandaalan coo-a diwvo.

¹⁵ Kɛ mɔɔn ndan cɔwvon tɛndanin nda pila kɔltan, kpaasiaala ndalan la yominin.

¹⁶ Ɲɛ-pɔmbɔ vana sandaa nɔ-o co fisa a bolofaa bɛndu vanaa kɔlvesɛyaa bɔɔ-bɔɔ.

¹⁷ Kani bala vanaa kɔlvesɛiya la yominin, kɛ Mɛlɛka co vanaa sandaa yoomuan lueiyo.

¹⁸ Mɛlɛka sinà ceen vanaa co kelaa o nɛi toɲaa coo-a. Lɛŋnde nda sɔla len le vanin kɛ́ ndaa le fɛɛn a fɛɛn.

¹⁹ Siɛmbula biinin nda tuma dɛnɛ palaa toalnin-ndo le. A pumnin cá o palɛi yima fololɛi nin.

²⁰ A toɲa, vanaa kɔlvesɛiya ɲumnin bómbò, yaamɔaa Mɛlɛka-a piawnin mɛɛ bil puiyaa kɛndɔɔ piaw nuaa yɛ. À ɲumnin bómbò, à ɲumnin bómbò o kumnde nin.

²¹ Vana kɔlvesɛiyo dɔndan pɛ ɲɔɔ, o mingi le. Kɛ vana sandaa ndu, a kɛndɛi o piɔw ɲɛm ndɔn ni.

²² Vanaa Mɛlɛka co duaa dɔvɔɔ-a sɔlanin lɛŋnden kɛ́ɔ, kɛ vanaa o co dangaa dɔvɔɔ-a cuunin.

²³ Mɛlɛka tosa ni mì kela vanacieo sim yili, o kon mò hini kɔl a kelaa o nɛi ndɔɔ coo.

²⁴ Vana kon siɛla bɛɛ, o del te, kani Mɛlɛka bii ndu baa.

²⁵ Kandɔɔ tuma ya va felengi-o, háá o yuuvɛi nii he nin, i ci vɔ vana sandaa o malnanndo le, i ci vɔ cuavaa ndɔa vannda ɲɛdiaa piɛiyo le.

²⁶ Lepalaa-lepala vana sandaa co vannda kɛndɛi tosallo, o co nda ɲɔɔn dɔndaa. Duaa cuavaa ndɔa siŋnùn ni.

²⁷ Kpakpala dɛnɛ vɔɔndo, ma tosa dɛnɛ kɛndɔɔ, o kon, a vanin o lɛŋnden coo lɔ́ɔ́-lɔ́ɔ̀.

²⁸ Kani Mɛlɛka kaola dɛnɛ sandaa, o mel vanaa lo o lediom coo-a le. O co nda mandaa lɔ́ɔ́-lɔ́ɔ̀, kɛ cuavaa vanaa kɔlvesɛiya ɲumnin bómbò.

²⁹ Vanaa sandaa sɔlanin lɛŋnden kɛ́ɔ, mà cal lenin le fɛɛn a fɛɛn.

³⁰ Sɔɔn kɔlkalon vana sandaa biiŋuu sondoo coo ni, sɔɔn sandan diɛɛmule ndɔlen le dimi ni.

³¹ Kani tɔŋ Hala ndɔɔ co ndu o kɔl, o siɛ́là o kela ndɔɔ nin te.

³² Vana kɔlvesɛiyo co vana sandaa mɛngɛlaa, o co nɛilan nuwviaa le ndu diyɔɔ.

³³ Kɛ Mɛlɛka melnin vana sandaa ndu o ba le. O cɛlnin vɛlɛ mà yaala vana sandaa o yamɛi kiolɔɔ le.

³⁴ Tiindan Mɛlɛka, ma kela o nɛi ndɔɔ coo. O heelunin nɔm, ma sɔla lɛŋnden kɛ́ɔ. O kon, nɔm pila canin vanaa kɔlvesɛiya ɲumndo bòmbò.

³⁵ Mí saalun vana kɔlvesɛiyo pum a kɔlvesɛi ndɔ bɛndoo, o va hiovɔɔ laci maa yɔm puiyaa.

³⁶ Kɛ o ɲum bòmbò, o co lɛ le, i sanga ndu nuwviaa, o cínnún-ndɛ le.

³⁷ Mɛɛndan vana toɲaa, dɔw vana dendu kɔllo-o taasi. Dɛnɛ kɛndɔɔ co le siɔdii laci vana kɔlɲuloo.

³⁸ Kɛ vanaa yɔŋ vɔɔnda tambunin o lepilɔɔ, siɔdii laci kɛndɛ venin le vanaa kɔlvesɛiya le.

³⁹ Mɛlɛka o ba cinda vanaa sandaa fula ni. Ndu co fonda mayoomu ndaa o telen dɛnɛ palaa nin ni.

⁴⁰ Mɛlɛka co nda malaa, o co nda baŋaa. O co nda hiɔlɔɔ vanaa kɔlvesɛiya o ba. O co nda ciindiaa le tùú nda vennun ndu o ba bɛngu-o.