Condii lisai 33 - BII BILA

Biiloo co le Hala cɔw ɲɔɔn kpow-vo!

¹ Niaa vanaa sandaa, la viow kponyoo le Mɛlɛka, kani dɛnɛ kɛndɔɔ o co le vanaa sandaa ndu lisaa.

² La lisa Mɛlɛka a bondomaa, la sangala ndu a banga nɔ yoei tɔ́-o.

³ La lisa ndu a condii sɛnɛiye, la lɔɔ ɲɛm-caan mì la yonda a ɲaaloo.

⁴ Kani sɔɛi Mɛlɛka-e sandu, dɛnnda o co tosaa lan kpede la co lapeelaa kpéŋ-kpéŋ.

⁵ Dɛnɛ sandaa a sakpoyɛi o yeema ni. Vanakɛndɛyɛi ndɔɛi pɛ o lɛŋnden coo cá.

⁶ A sɔɛi sondoei Mɛlɛka cɔw halataalaa ni, mí hoeyii fula ndu o sondo-e cɔaw loeon co kundaa lon-ndon.

⁷ Ndu nɛɛnuu mɛmma ihɛllan ni, mó dii man nɛɛ pilɛ, mó bii mɛmma ihɛlma bɛnduan o fondala mandaalan nin.

⁸ Lɛŋnden kpow le bɛnda mì le nɔ siòòŋii Mɛlɛka-e, mì vanndacieea o ceendo coo kpow a ɲiiya ndu o hɔl.

⁹ Kani o soo pɛ, sɔɛi ken peelun, o dimi dɔ́ɔ́ pɛ ɲɔɔ tosan.

¹⁰ Mɛlɛka cii tuula vanaa-mangalaa-isɔɔa puusiaa, mó tɛɛmbuu kɛɛsuula vannda súúla celennda.

¹¹ Kɛ tuula Mɛlɛka lan la co o fonda ndɔɔ le lɔ́ɔ́-lɔ́ɔ̀, kɛɛsuula o nɔ o kɔl-tan la co le fɛɛn a fɛɛn.

¹² Dɛnɛ kɛndɔɔ co le vanaa kan, à Mɛlɛka co Hala ndaa-a! Dɛnɛ kɛndɔɔ co le vanaa kan, vanaa o hɛli le vaa kɛ́ ndɔɔ-a!

¹³ Mɛlɛka lonnùn o halataala, mò tofa, mò ce vanndacieea kpede.

¹⁴ O lònnun icali o calta ndɔlan, mò mɛɛndiàn vanaa co o lɛŋnden coo-a kpow.

¹⁵ Ndu cɔw kɔlkalula ndalan a yeemɛi ndɛi ni, o co dɛnnda ndalan kpow taasio dɔvɔɔ.

¹⁶ O co le vanaa cɔvaa sɛ́lɛ́a le masaa sɔla cindaa le. Kuubanɔ cɔwvo sɔla baŋaa le kpaaya ndɔ bɛndoo le.

¹⁷ Còòlan i co le soo vanndo ciindiaa ni, mɛ̀ɛ́-mɛ̀ɛ́ o nɔ yoomuan o baŋa vana le.

¹⁸ Kɛ Mɛlɛka nɔ hɔlten vanaa nɔ siòòŋii ndɔɛi-ya coo, vanaa co kɛndɛi ndɔɛi tiindanndo-a pɛɛn.

¹⁹ O nɔ nda hɔlten coo le kɔlta ndalan solio ciee-piɔ́m, mò manda yoomula ndalan o telen yima fofolan.

²⁰ Naa naa, vana naa n kɛsi kɔltan coo-o co Mɛlɛka ni, ndu co naa malaa ni, ndu co vɛlɛ naa kandaa ni, mɛɛ kɔ̀ɔ̀ cɔwvo kanda vana yɛ.

²¹ O ndu nin kɔlta naalan la dɔawnun ɲaale ni, kani n laalan diola ndɔla diandaa lan.

²² Màá vanakɛndɛyɛi nɔmnde va naa coo, Mɛlɛka! Bau nɔm naa n tiindan ni.