Condii lisai 29 - BII BILA

Diom Mɛlɛka-o co sɔɛi o hoeyii fùkù-fùkùei nin

1 Condii David-e.

¹ Condii David-e. Niaa poaa Hala-a, la yɔngu Mɛlɛka biiloo! La yɔngu Mɛlɛka biiloo mì la cɔm kpaaya ndɔɔ.

² La yɔngu Mɛlɛka biiloo le diola ndɔlan! La baŋ ndu vulan Mɛlɛka o labɛngunin tuma diondɔɔ ndɔɔ co cɔmnɔnndo-o.

³ Diom Mɛlɛka-o co deŋio o mɛnndan coo, Hala biilaa co piɔndio maa piɔɔ deŋia, Mɛlɛka co o mɛmma bɛnduan coo.

⁴ Diom Mɛlɛka-o nɔ kpaaya, Diom Mɛlɛka-o comul bɔɔ.

⁵ Diom Mɛlɛka-o co yɔmii sɛɛdrei yimiyimio, Mɛlɛka co yɔmii sɛɛdrei Liban yimio.

⁶ O co pembon Liban pesio maa naw téndé, o co pembei Hɛrmɔn puusiaa maa cìí téndé.

⁷ Diom Mɛlɛka-o co yinnde ŋalamu-ŋalamulen solio.

⁸ Diom Mɛlɛka-o co tosaa mì lɛŋnde veselɛilen le va ɲiiyaa, Mɛlɛka co lɛŋnde veselɛilen Kadɛs hiiloo.

⁹ Diom Mɛlɛka-o co tosaa mì kialla va komɔɔ. Yɔmii co o bundɛlan nin-nde co bɛɛsiaa a diom ndɔɔ. Vannda kpow a co yondaa o Cɛi ndɔɔ nin aa: «Biiloo co le ndu!»

¹⁰ Mɛlɛka co icali o mɛmma nɔ lamɛɛlu le-an coo, o co icali o kpɛŋɛ ndɔ lemasaa coo le fɛɛn a fɛɛn.

¹¹ O kenin vanaa ndɔa yoomuan, ò dɔawnin nda duaa, mò yɔngu nda kɔlɲuloo.